Túzetý mekemesinde jazasyn óteı júrip, tártibine baılanysty shartty túrde merziminen bosaǵan jas jigit bostandyqqa shyqqan boıy kásipkerlikpen aınalysýǵa sheshim qabyldaǵan. Jastyq qyzýlyqpen qatelikke urynyp, ómirden ashy sabaq alǵan Danııar osy kúni "Adal eńbek qana adamdy túzetedi" degen tujyrymǵa kelgen. Ol jasóspirim kezinde ózine durys baǵdar kórsetetin jannyń tabylmaǵanyna qapalanady.
- Qylmystyq jaýapkershilikke tartylyp, sottalyp, túzeý mekemesinde jazamdy ótep júrgende, tártibime baılanysty shartty jazaǵa aýystyryldym da, bostandyqqa shyqqan soń Muǵaljar aýdandyq probasııa qyzmetiniń esebine alyndym. Mine, osy kezden bastap probasııa qyzmetkerleri maǵan kásipkerlikpen aınalysýǵa usynys berip, jolyn kórsetti, deıdi Danııar Salamatov.
"Atameken" Ulttyq kásipkerler palatasynyń "Bastaý Bıznes" baǵdarlamasy boıynsha kásipkerlik negizderine oqyp, jobasyn sátti qorǵap shyǵyp, kóktemde 441 myń 500 teńge qaıtarymsyz grant alǵan boıy Danııar oǵan eki sıyr satyp alady. Bul jerde Danııardyń kelinshegi erine qoldaý kórsetip, kómekke kelgen. Kóktemde mal tóldegende, kelinshegi sıyr saýyp, odan qurt, maı, irimshik jasap, jaz boıy satylymǵa shyǵarady.
Eki bas malymyz qazir tórt basqa kóbeıdi. Men de jaz boıy aýylda shóp oryp, maldyń qystyq azyǵyn ózim daıyndadym. Endi aldaǵy kóktemde sharýashylyǵymdy odan ári keńeıtsem degen josparym bar. О́ıtkeni, kezinde dánekerleýshi mamandyǵyn oqyp bitirgenmin. Qora soǵý, taǵy basqa aýyl úıdiń sharýasyn ózim retteımin. Jobany qorǵaý kezinde iri qara malynyń basyn kóbeıtkim keletinin de aıtqan bolatynmyn. Sondyqtan, meniń negizgi maqsatym – túliktiń osy basyn kóbeıtip, jeke qojalyq ashý. Sharýam alǵa bassa, ózim sekildi esepte turǵan azamattardy jumysqa qabyldasam deımin. Kezinde túzetý mekemesinen shyqqan soń qaıda bararymdy bilmeı basym qatqan sátterde maǵan qoldaý kórsetken Muǵaljar aýdandyq №1 probasııa qyzmetine alǵysym sheksiz, deıdi Danııar.
Jas jigittiń minez-qulqyna probasııa qyzmetiniń ınspektory da oń baǵasyn berdi.
– Esepte turǵan Danııar probasııa uıymdastyrǵan qoǵamdyq jumystarǵa belsendi aralasady. Jaýapkershiligi joǵary. Bergen ýádesin oryndaıdy, birsózdi, deıdi Muǵaljar aýdandyq №1 aýdandyq probasııa qyzmeti bóliminiń aǵa ınspektory Gúlsezim Eshmaǵambetova.
Danııar qosymsha jumys retinde aýyl mektebiniń qazandyǵyn jaǵyp, qosymsha tabys ta taýyp otyr. Bul sábıli bolǵan jas otbasyǵa edáýir kómek. Atalǵan maýsymdyq jumysqa esepte turǵan azamatty Muǵaljar aýdandyq №1 probasııa qyzmetiniń ınspektorlary ornalastyrǵan bolatyn, deıdi Aqtóbe oblysy boıynsha QAJ departamentiniń baspasóz hatshysy Gúlfaırýz Tóremuratova.
