"Biz bas redaktorlarmen birneshe ret kezdesý ótkizdik, BAQ-ty damytý máseleleri boıynsha dóńgelek ústelder uıymdastyryldy. Dál sol jerde memlekettik aqparattyq tapsyrysqa qatysty barlyq problemalyq máseleler aıtyldy. Barlyq problemalyq máselelerdi eskere otyryp, memlekettik aqparattyq tapsyrysty qalyptastyrý men úlestirýdiń jańa erejelerin ázirleý aıaqtalyp qaldy. Jumys tobynyń quramyna barlyq BAQ endi, kún saıyn olarmen konsýltasııalar ótkiziledi. Maqsatymyz qandaı? Birinshi kezekte, biz BAQ ónimderiniń baǵa saıasatyn ózektendirý úshin marketıngtik zertteýler júrgizemiz. Sondaı-aq, analıtıkalyq materıaldardyń kóp bolýyn jáne olarǵa kóp qarajat jumsaýdy qamtamasyz etý baǵytynda jumys isteımiz. Búgingi jaǵdaıdy eskere otyryp, mýltımedııalyq ónimderdi kóbeıtýge tyrysamyz", - dedi AQDM basshysy.
Jumys toptary qyzmetiniń nátıjeleri jáne memlekettik aqparattyq tapsyrysty qalyptastyrý men úlestirýdiń jańa tásilderi brıfıng barysynda jeke aıtylady.
Al "BAQ týraly» zańnyń jańa redaksııasyna keler bolsaq, zań jobasy kelesi jyly ǵana daıyn bolady. "Egemen Qazaqstannyń eń alǵashqy zańy "Baspasóz týraly" boldy, keıin qoldanystaǵy zań paıda boldy, ol 1999 jyly qabyldandy. Osy jyldar ishinde 45 túzetý engizildi. Biraq bul jetkiliksiz, óıtkeni qazirgi zamanǵy syn-qaterler, kommýnıkasııanyń jańa quraldary, jańa uǵymdar paıda boldy. Jańa tujyrymdamada tujyrymdamalyq apparatty anyqtaýymyz kerek.
Zań jobasy jýrnalısterdiń, ásirese jańadan paıda bolǵan kommýnıkasııa quraldarynyń mártebesin, quqyqtary men mindetterin jáne "bloger" túsinigin anyqtaýǵa baǵyttalady", - dep atap ótti Balaeva bastamashyl azamattardy qujatty belsendi talqylaýǵa jáne usynys jasaýǵa shaqyra otyryp.
