Úkimet basshysy Qazaqstannyń jahandyq ekonomıkalyq daǵdarys pen pandemııa jaǵdaıynda ekonomıkany odan ári damytýdy qamtamasyz etý boıynsha qabyldap jatqan sharalary týraly aıtty.
"Qazaqstannyń 2025 jylǵa deıingi Strategııalyq damý jospary ázirlendi, ol óńdeý ónerkásibi men aýyl sharýashylyǵynda qosylǵan quny joǵary eksportqa baǵdarlanǵan óndiristerdi ulǵaıtý, jedeldetilgen sıfrlandyrýdy júrgizý, densaýlyq saqtaý júıesin nyǵaıtý, ınfraqurylymnyń sapasy men qoljetimdiligin jaqsartý jónindegi sharalardy, sondaı-aq basqa da aspektilerdi kózdeıdi", – dedi A.Mamın.
A. Mamın Eýropalyq Odaq elshilerin Qazaqstannyń EO-men saýda-ekonomıkalyq jáne ınvestısııalyq yntymaqtastyǵyn qoldaý boıynsha odan ári ashyq jáne belsendi dıalogqa shaqyrdy. О́z kezeginde, otyrysta sóz sóılegen EO elshisi Sven-Olov Karlsson, Germanııa elshisi Tılo Iohanes Klınner, Nıderlandy elshisi Andre Karstens Qazaqstan ekonomıkasynyń turaqtylyǵyn jáne Qazaqstan Úkimeti qabyldaǵan daǵdarysqa qarsy sharalardyń júıeliligin atap ótti. Taraptar pandemııa saldaryn eńserý jáne ekonomıkany qalpyna keltirý máseleleri boıynsha Qazaqstannyń Eýropalyq Odaqpen yntymaqtastyǵynyń perspektıvalaryn talqylady.
Densaýlyq saqtaý salasyndaǵy ózara is-qımyl, "jasyl ekonomıkany" damytý jáne klımattyń ózgerýine qarsy kúres, AО́K, óńdeý ónerkásibi, kólik, energetıka, ınfraqurylymdyq qurylys salalarynda birlesken ınvestısııalyq jobalardy iske asyrý máseleleri qaraldy. Bıyl 1 naýryzda kúshine engen Qazaqstan men EO arasyndaǵy Keńeıtilgen áriptestik pen yntymaqtastyq týraly kelisimdi keshendi iske asyrýǵa erekshe nazar aýdaryldy. Bul qujat saýdany, ınvestısııany, ınnovasııalardy jáne ınfraqurylymdyq damýdy qosa alǵanda, 29 salany qamtıdy.
Kezdesýge Qazaqstan Úkimetiniń músheleri, "Atameken" UKP, "Kazakh Invest" UK" AQ, "Báıterek" UBH", "QazAgro" UBH" basshylyǵy, Eýropalyq Odaqtyń, Germanııa, Nıderlandy, Belgııa, Rýmynııa, Estonııa, Polsha, Shvesııa, Italııa, Slovakııa, Ispanııa, Lıtva, Horvatııa, Chehııa, Gresııa, Bolgarııa, Fınlıandııa, Vengrııa, Fransııa elshileri, Portýgalııa, Avstrııa, Latvııa ókilderi jáne t. b. qatysty.
EO Qazaqstannyń negizgi ınvestorlarynyń biri jáne iri saýda seriktesi bolyp otyr. Aǵymdaǵy jyldyń 8 aıynda taýar aınalymy $15,5 mlrd qurady.
