Monıtorıng nátıjesinde, 60-tan astam jataqhanada túrli kemshilikter anyqtaldy. Olardyń arasynda jıi kezdesetinderi: sanıtarlyq normalardyń saqtalmaýy, órt qaýipsizdigi sharalarynyń buzylýy, jataqhanalardaǵy bólmelerde stýdentterdiń shamadan tys kóp ekendigi.
Jas Otan JQ jetekshisi Elnur Beısenbaev atap ótkendeı, qazirgi jaǵdaıda stýdentterdiń onlaın formatta oqyǵanyna qaramastan, jataqhanaǵa qatysty problemalar ózektiligin joıǵan joq.
«Arman qýyp kelgen aýyl jastary úshin jataqhana – ekinshi úı. Sondyqtan stýdentterdiń qolaıly ómir súrýi úshin eń jaqsy jaǵdaı jasalýy kerek. Stýdentter úıinde turatyn problemalary bar kez kelgen stýdent bizge habarlasa alady. Sondaı-aq stýdentterdiń arasynan jas kóshbasshylardy osy aksııaǵa qatysýǵa shaqyramyn», dedi Elnur Beısenbaev.
Tekseristiń birinshi legi Shyǵys Qazaqstan, Soltústik Qazaqstan, Mańǵystaý, Qyzylorda, Pavlodar, Atyraý, Aqmola oblystarynda ótti. Jyldyń basynda bastaý alǵan monıtorıng eldegi jataqhana jaıynan tolyq aqparat berdi.
Máselen, ótken jyly Aqtaý qalasyndaǵy H.О́zbekǵalıev atyndaǵy polıtehnıkalyq kolledjiniń №5 jataqhanasynda birqatar kemshilik anyqtalyp, eskertý berilgen. Bıylǵy oqý jylynda «Jol kartasy» aıasynda atalǵan nysanda kúrdeli jóndeý júrgizilip, jataqhananyń materıaldyq qory jańartyldy. Jóndelgen jataqhanada qazir vaı-faı, baqylaý kameralary, kir jýatyn bólmeler, oqý jáne demalys bólmeleri bar. Sondaı-aq memleket-jekemenshik áriptestik aıasynda jergilikti kásipker Shamshadın Gýseınov bos qalǵan jataqhanany jóndep, stýdentterge jańa 180 oryn usyndy. Nysan ıesi jaqyn arada jataqhana aldynda stýdentterge arnalǵan sport zalyn salýdy josparlap otyr. Biraq jer ýchaskesiniń qujattarymen másele týyndap turǵan kórinedi. Nysan ıesi jaýapty adamdardan bul máseleni sheshýge járdem suraýda.
Jataqhanalarǵa monıtorıng elimizdiń ózge de óńirlerinde jalǵasyn taýyp, qazan aıynyn sońyna deıin sozylady.
