Ýnıversıtet qabyrǵasynda jańadan jasaqtalǵan kabınette jazýshy ómiriniń ár jyldarynan syr shertetin fotosýretter, eńbekteri men kitaptary, ol týraly baspasóz betterinde jarııalanǵan maqalalar toptastyrylǵan. Jınalǵandar aldynda Qazaqstan Jazýshylar odaǵynyń tóraǵasy, aqyn Ulyqbek Esdáýlet Qajyǵalı Muhanbetqalıulynyń shyǵarmashylyǵy týraly esteliktermen bólisti.
О́tken ǵasyrdyń 60-shy jyldarynan bastap qazaq ádebıetinde ózindik qoltańbasymen tanyla bastaǵan Qajyǵalı Muhanbetqalıulynyń "Juldyzdy túnder", "Toǵaı sybdyry", "Jańǵyryq", "Qaıdasyń, sen mahabbat" kitaptary jaryq kórgen. Sondaı-aq oqyrman 2016 jyly Qazaqstan Respýblıkasynyń Memlekettik syılyǵyna ıe bolǵan, Syrym batyr beınesi men sol dáýirdiń qaıshylyqty oqıǵalary týraly jazylǵan "Tar kezeń" tarıhı romanyn jaqsy biledi.
Q.Jubanov atyndaǵy Aqtóbe óńirlik ýnıversıtetiniń rektory, fılologııa ǵylymdarynyń doktory, professor Baýyrjan Erdembekov qabyrǵaly qalamger, ýnıversıtettiń qurmetti professory Qajyǵalı Muhanbetqalıulynyń kezinde oqý ordasynda ótkizilgen aıtýly sharalarǵa qatysyp, salmaqty oılarymen, zerdeli estelikterimen jas urpaq sanasyna rýhanııat ýyzyn sińire bilgenin jetkizdi.
Aqtóbe aımaǵyndaǵy tarıhı tulǵalardyń esimderin qaıta jańǵyrtý maqsatynda sońǵy jyldary osy ýnıversıtette "Aqtóbe aqtańgerleri" aýqymdy jobasy qolǵa alynyp, oqý ǵımarattaryna halyq aqyny Nurpeıis Baıǵanınniń, ǵalym Bekejan Súleımenovtiń, qoǵam qaıratkeri Muhtar Arynnyń esimderi berildi. Bul rette Qudaıbergen Jubanov, Tahaýı Ahtanov, Ábish Kekilbaev, О́tejan Nurǵalıev atyndaǵy konferens-zaldar, Nursulý Tapalova atyndaǵy horeografııa zaly, Roza Jamanova atyndaǵy mýzyka kabıneti, Derbisáli Berkimbaev, Álim Almat, Dosjan haziret, Bekejan Súleımenov, Rabıǵa Syzdyq, Eset Jubanov, Álııa Moldaǵulova, Bákir Tájibaev, Eltoq Dilmuhamedov, Amantaı О́tegenov syndy tulǵalar men Aýǵan soǵysy ardagerleri atyndaǵy dárishanalar ashyldy. Q.Muhanbetqalıulyn eske alý sharasyna jazýshynyń jubaıy Sulýhanym Ilııasova qatysyp, jınalǵandarǵa rızashylyǵyn bildirdi.
