Prezıdent • 28 Qazan, 2020

Prezıdentke indetke qarsy otandyq vaksınanyń ázirlený barysy aıtyldy

39 ret kórsetildi

Memleket basshysy Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıany qabyldady, dep habarlaıdy Egemen.kz Aqordanyń baspasóz qyzmetine silteme jasap.

Qasym-Jomart Toqaevqa koronavırýsqa qarsy otandyq vaksınanyń ázirlený barysy týraly aqparat berildi.

Kúnsulý Zakarıanyń málimetine sáıkes búgingi tańda ınstıtýttyń bazasyndaǵy bes platformada koronavırýsqa qarsy vaksınalar daıyndalýda. Instıtýt ázirlegen belsendi emes vaksına Dúnıejúzilik densaýlyq saqtaý uıymynda maquldanyp, klınıkalyq zertteýlerdiń birinshi kezeńinen ótti jáne qazirgi ýaqytta Ulttyq ǵylymı ftızıopýlmonologııa ortalyǵynda zertteýdiń ekinshi kezeńi júrgizilip jatyr.

Koronavırýs indetine qarsy ázirlenip jatqan otandyq ekinshi sýbbirlikti vaksına DDSU tarapynan maquldanyp, klınıkalyq zertteýlerden sátti ótken. Bul vaksınanyń materıaldary Dárilik zattar men medısınalyq buıymdardy saraptaý ulttyq ortalyǵynda qaralyp jatyr.

Prezıdentke Qazaqstanda buryn-sońdy bolmaǵan ımmýndyq preparattar shyǵaratyn zaýyt qurylysy týraly da málimet berildi. Ǵylymı-zertteý ınstıtýtynda otandyq vaksınalar shyǵaratyn zaýyt qurylysy júrgizilýde. Zaýyttyń jobalyq qýaty jylyna 60 mıllıon mólsherde vaksına shyǵarýǵa jetedi. Osy arqyly otandyq naryqty ǵana qamtyp qoımaı, ony eksporttaýǵa da múmkindik týady. Atalǵan zaýyt iske qosylǵan kezde elimiz ımporttyq táýeldilikten arylady. 

Memleket basshysy ǵylymı-zertteý ınstıtýtynyń qyzmetkerlerine arnalǵan turǵyn úı qurylysynyń qarqynyn arttyrý usynysyn qoldady. Sonymen qatar kezdesýde qyzmetkerlerdiń jalaqysyn kóterý, atalǵan salaǵa jas mamandardy kóptep tartý, normatıvtik-quqyqtyq aktilerge vaksınany ýaqytsha tirkeý túsinigin engizý máseleleri qozǵaldy.

Kezdesý sońynda Qasym-Jomart Toqaev otandyq vaksınalardy daıyndaý isine qatysty birqatar naqty tapsyrma berdi.

Sońǵy jańalyqtar

Uqsas jańalyqtar