Fransııada ótken dúısenbide 52 myńnan astam naýqas anyqtaldy. Osyǵan baılanysty el bıligi dabyl qaǵyp, shekteý sharalaryn kúsheıtýge kirispek. El prezıdenti Emmanýel Makron mınıstrler kabınetimen kezdesip, pandemııamen kúresý máselelerin talqylady.
Premer-mınıstr Jan Kasteniń aıtýynsha, jıyn barysynda densaýlyq salasyndaǵy qıyndyqtardy eńserý máselesi qaralǵan. Degenmen bılik ókilderi kóktemdegideı lokdaýn engizý bızneske zor soqqy ákeledi dep esepteıdi. Osyǵan baılanysty, vırýstyń ekinshi tolqynymen kúreste mundaı shekteýlerdi engizbeýge múddeli.
Indet juqtyrǵandar sany qaıta kóbeıgen Parıj bastaǵan birneshe úlken qalada 17 qazannan bastap komendanttyq saǵat engizildi. Densaýlyq salasyna jaýapty mekeme ókilderiniń sózine súıensek, vırýstyń qaıta órshýine adamdardyń áleýmettik qashyqtyqty saqtamaýy, karantındik talaptardy oryndamaýy áser etip otyr.
Qazirgi tańda Fransııada qaterli dertti juqtyrǵandar sany 1 mıllıon 138 myń adamnan asyp, 35 myńǵa jýyq naýqas ajal qushty. Ásirese kúz bastalǵaly beri COVID-19-dyń quryǵyna shaldyqqandar sany kúrt artty.
Ispanııada da vırýs juqtyrǵandar sany mıllıonnan asty. Pıreneı túbeginde indet birden kúrt kóbeımese de, naýqastar sany kún sanap artyp keledi. Bul elde de baqılyq bolǵandar sany 35 myńǵa jýyqtaǵan.
Osyǵan baılanysty Ispanııa bıligi ótken jeksenbide tótenshe jaǵdaı jarııalap, búkil el aýmaǵynda karantın jarııalady. Pandemııa qatty taramaǵan Kanar araldary ǵana ázirge mundaı shekteýden ada.
Italııa úkimeti turǵyndarǵa Eýropanyń basqa memleketterine barmaýǵa keńes beredi. Buǵan qurlyqtaǵy ahýaldyń nasharlaýy sebep. Syrtqy ister mınıstriniń habarlaýynsha, karantındik sharalar qatańdatylsa, shetelge barǵan ıtalııalyqtardyń sonda qalyp qoıý yqtımaldyǵy joǵary.
Sondaı-aq syrtqy ister mınıstrligi Apennın túbegi turǵyndarynyń Eýropadan alysqa barmaýyn surap otyr. О́ıtkeni álemniń basqa túkpirlerindegi jaǵdaı da turaqsyz.
El bıliginiń mundaı eskertý jasaýy beker emes. Kóktemde indet kúsheıgende 100 myńnan astam ıtalııalyq shetelderde qalyp ketken edi. Úkimet olardy elge ákelý úshin qyrýar qarjy men kúsh jumsady.
Koronavırýstyń Eýropadaǵy alǵashqy oshaǵy sanalǵan Italııada búginde 550 myńnan astam adam vırýs juqtyrǵan. Al qaıtys bolǵandar sany 38 myńǵa taıap qaldy. Qazan bastalǵaly beri Apennın túbegindegi epıdemııalyq ahýal kúrt nasharlap, naýqastar sany artyp keledi.
Belgııada da jaǵdaı kúrdeli. Bir apta boıy kúndelikti tirkelgen naýqastar sany 12 myńnan azaımaı tur. Associated Press agenttiginiń habarlaýynsha, test tapsyrǵandardyń ár besinshisi vırýs juqtyrǵany anyqtalyp otyr. О́kinishke qaraı, ajal qushqandardyń da sany kóbeıip barady. Máselen, ótken aptada kúnine qyryq shaqty adam baqıǵa attanǵan. Qazir eldegi aýrýhanalarda jatqan naýqastar da kóp.
Dúısenbi kúni el bıligi karantın talaptaryn kúsheıtti. Shekteý sharalary 19 qarashaǵa deıin jalǵaspaq. Ýallonııa aımaǵy men Brıýsselde komendanttyq saǵat engizildi. Adamdar kóshede de, ǵımaratta da maska taǵýǵa mindetti. Kınoteatrlar, teatrlar, sport ortalyqtary jabyldy. Kelesi aptadan bastap mektep oqýshylarynyń demalysy uzartylyp, qashyqtan oqytýǵa kóshpek.
Germanııada da vırýs kúsheıip keledi. Kansler Angela Merkel indetti baqylaý qıyndap bara jatqanyn aıtyp dabyl qaǵyp otyr. Onyń sózine súıensek, alda nemis halqyn birneshe aı boıy óte qıyn kezeń kútip tur. Germanııadaǵy ahýal kúrdeli ári ár kún vırýspen kúresýde mańyzǵa ıe.
Chehııadaǵy epıdemııalyq jaǵdaı da qıyndap barady. Densaýlyq saqtaý mınıstri Roman Prımýlanyń sózine súıensek, koronavırýs juqtyrǵandar sany kóbeıýine jol bermes úshin elde komendanttyq saǵat engizildi. Soǵan sáıkes turǵyndarǵa 28 qazan men 3 qarasha aralyǵynda 21.00-den 05.00-ge deıin kóshege shyǵýǵa tyıym salý týraly sheshim qabyldandy.
Mınıstrler kabıneti barlyq memlekettik jáne jeke uıymdar men kompanııalarǵa jumysty qashyqtan jalǵastyrýdy usyndy. Sondaı-aq 27 qazanda úkimet parlamentten tótenshe jaǵdaı rejimin taǵy 30 kúnge uzartýdy suraǵan. Qazirgi tańda Chehııada 162 myńnan asa adam koronavırýs juqtyrǵan, sonyń ishinde 2337 naýqas qaıtys bolǵan.
Portýgalııanyń kez kelgen turǵyny kóshede maska taǵýǵa mindetteldi. El parlamenti osyndaı zań qabyldady. Oǵan baǵynbaǵandar birden jaýapqa tartylmaq. Aıyppul kólemi 500 eýroǵa deıin barýy múmkin. Budan bólek, Portýgalııa úkimeti turǵyndarǵa Helloýın merekesi kezinde saparǵa shyǵýǵa tyıym saldy. Bul shekteý 30 qazannan 3 qarashaǵa deıin kúshin joımaıdy. Portýgalııada sońǵy eki apta boıy kún saıyn shamamen 2 myń naýqas tirkelip keledi. Vırýs juqtyrǵandardyń jalpy sany 110 myńnan asyp ketken.
AQSh-ta 23 qazanda pandemııa bastalǵaly beri bir táýlikte koronavırýs juqtyrǵan naýqas sany boıynsha antırekord tirkeldi. Djons Hopkıns atyndaǵy ýnıversıtet deregine súıensek, bir kúnde 81521 adamnyń vırýs juqtyrǵany anyqtalǵan. Sondaı-aq qaıtys bolǵandar sany da óse tústi.
Sarapshylardyń aıtýynsha, qıyn jaǵdaı áli alda. Qazirgi tańda aýrýhanaǵa jatqyzylǵandar sany 75 paıyzǵa ósken. Osyǵan baılanysty qaıtys bolǵandardyń da sany kúrt ulǵaıýy múmkin degen qaýip bar. Densaýlyq salasyna jaýapty qyzmetkerler naýqastar sany kún sanap artyp bara jatqanyna alańdap, karantındik sharalardy kúsheıtýge shaqyrdy. Búginge deıin muhıttyń arǵy betinde 8,9 mıllıon adam qaterli dertke shaldyǵyp, 231 myńnan astam adam baqıǵa attandy.
Qytaıda da vırýs qaıta kúshine minýi múmkin. Keıingi derekterge súıensek, Shyńjań-uıǵyr avtonomııalyq aımaǵynyń turǵyndary koronavırýstyń bar-joǵyn anyqtaıtyn testiden ótip jatyr. Taıaýda ǵana osy óńirde 137 adamnyń sımptomsyz aýyrǵany belgili boldy.
Qazirdiń ózinde aımaqtaǵy 2,8 mıllıonnan astam turǵyn testileýden ótti. Jalpy, barlyǵy 4,7 mln adam test tapsyrýy tıis. О́ńirdiń mundaı qadamǵa barýyna taıaýda bir adamnyń vırýs juqtyrǵany sebep bolyp otyr. Ol jergilikti toqyma kásipornynda jumys isteıdi eken. Ári aımaqtan tys jerlerge shyqpaǵan. Osyǵan baılanysty eń áýeli búkil tigin fabrıkasy qyzmetkerlerinen analız alynǵan. Áıtse de, Qytaıda jyl basyndaǵydaı kúrdeli jaǵdaı joq. Búginge deıin osy elde 86 myńǵa jýyq adam Covid-19 juqtyryp, 4634 adam o dúnıege attandy.
Iran koronavırýs indetine baılanysty qabyldanǵan shekteýlerdiń merzimin qarashanyń jıyrmasyna deıin uzartty. Atap aıtqanda, el astanasy Tegeranda mektepter, meshitter, dúkender men meıramhanalar jumys istemeıdi.
Indettiń órshýine baılanysty keıbir óńirlerdiń aýrýhanalarynda oryn jetispeı jatyr. Dárigerlerdiń aıtýynsha, el aýmaǵynda ár tórt mınýt saıyn bir adam osy derttiń saldarynan jaryq dúnıemen qoshtasady. Densaýlyq saqtaý mınıstrliginiń ókilderi eger halyq sanıtarlyq qaýipsizdik sharalaryn saqtamasa, kún saıynǵy ólim sany 600-ge deıin ósýi múmkin dep eskertti. Keıingi bir aptada Iranda kún saıyn 6 myńǵa jýyq adamnyń naýqastanǵany anyqtalady. El boıynsha bul aýrýdy juqtyrǵandardyń sany 574 myńnan asyp, 33 myń adam ajal qushty.
Reseıde COVID-19 juqtyrý boıynsha antırekord tirkeldi. Osy eldiń shuǵyl shtabynyń málimetine súıensek, keıingi táýlikte 17 347 adamnyń koronavırýs juqtyrǵany anyqtaldy.
Naýqastardyń kóbi Máskeýde (5224), Sankt-Peterbýrgte (715) jáne Máskeý mańynda (499) tirkeldi. Vırýs juqtyrǵandardyń ishinde tórtten bir bóliginen asa adamda aýrýdyń sımptomdary bolmaǵan. Keıingi táýlikte 219 adam qaıtys bolyp, 7 574 naýqas jazyldy.
Dúnıejúzilik densaýlyq saqtaý uıymynyń basshysy Tedros Adanom Gebreıesýs koronavırýstyń taralýyna baılanysty álemde qıyn jaǵdaı týyndaǵanyn habarlady.
«Álem, ásirese Soltústik jarty shar bul pandemııanyń kúrdeli kezeńinde tur. Aldaǵy birneshe aı óte qıyn bolady. Keı elderdegi ahýal múldem kúrdelenýi múmkin. Qazirgi tańda syrqattanǵan adamdar sany kúrt ósip jatyr», dep málimdedi T.Gebreıesýs.
DDU basshysy álem elderin ólim-jitim kóbeıip, densaýlyq saqtaý salasy daǵdarysqa tap kelip, mektepter qaıta jabylmaý úshin shuǵyl sharalar qabyldaýǵa shaqyrdy.
Qyrkúıektiń ortasynda naýqastar sany kúrt kóbeıgen Úndistanda jaǵdaı turaqtalyp kele jatqandaı. Qazir elde vırýs juqtyrǵandar birtindep azaıyp keledi. Áıtse de, kórsetkish áli kúnge joǵary deńgeıde qalyp otyr. Máselen, qyrkúıekte bir kúnde 98 myńǵa jýyq adamnyń dert tyrnaǵyna shaldyqqany belgili bolǵan edi. Búginde syrqattanǵandar sany 35-40 myńnyń aınalasynda. Degenmen indet bastalǵaly beri Úndistanda 8 mıllıonǵa jýyq adam naýqastanyp, 119 myńnan astamy ajal qushty.
Jalpy, álemde koronavırýs naýqastary sany 43 mıllıonnan asyp, 1 mıllıon 156 myń adam bul ómirmen qoshtasty. Dúnıejúzilik densaýlyq saqtaý uıymynyń habarlaýynsha, Eýropa indettiń oshaǵyna aınalǵan. Qazirgi tańda kún saıyn tirkeletin jarty mıllıon oqıǵanyń 200 myńy osy qart qurlyqqa tıesili.
