Kúzdiń qara sýyǵy. Qyrbaq qar bir jaýyp erip jatqan ólara mezgil. Tús qaıta Evgenıı Domashev Taıynty aýylynan О́skemenge qaraı jolǵa shyqqan. Júz shaqyrym bolar-bolmas eki ara qoıyn-qolatty, orman-toǵaıly ań-qusy shýlaǵan kórikti jer.
Buralań jolda zýlap kele jatqan E.Domashev bir belesten asqanda jolǵa qaraı jortqan qońyrqaı ańdy baıqaıdy. Alǵashynda ıt pe dep te oılaǵan. Jaqyndaı kele sileýsinniń balasy ekenin baıqaıdy. Fotoapparatyn árqashan saılap júretin ol jol jıegine toqtaı qalyp, túz taǵysyn úsh-tórt ret fotoǵa túsirip úlgergen. Qońyr ań asyqpaı-saspaı qara joldan syrǵı basyp ótip, qalyń jynysqa enip joǵalǵan. Jankeshti fotograf artynan tura júgirgenimen, qarasyn qaıtip baıqamaǵan.
– Ol kezde qaýiptiń baryn esten shyǵaryp alyppyn. Qýyp baryp, taǵy bir-eki kadr jasaımyn ba dep oılaǵam. Sonda kúshigin qorǵaımyn dep, aldymnan enesi shyqsa, bitken jerim sol edi, – deıdi ózindik qoltańbasy bar kásibı fotograf Evgenıı Domashev.
Álbette, sileýsin – jyrtqysh ań. Betpe-bet kelip qalǵan ańnyń ózi odan ońaı qutyla qoımas. Mysyq tuqymdas bolǵanymen, bitimi shombal, myqty keledi. Turqy 90-105 sm, salmaǵy 15-20 kılo bolady. Kóbinese usaq ań-qustarmen qorektenedi. Qulaǵynda qylshyqty shashaǵy, eki urtynda sándi saqaly bar bul jyrtqyshtyń sany jer betinde az. Sondyqtan da Halyqaralyq tabıǵat qorǵaý odaǵynyń jáne Qazaqstannyń Qyzyl kitabyna tirkelip, aýlaýǵa qatań tyıym salynǵan.
Sileýsindi jol-jónekeı sýretke túsirgen Evgenıı Domashevtyń izine Zaısan óńirinde qasqyr da túsken eken. Aıtýynsha, buryndary ańshylarmen birge Saýyr-Saıqan taýyn aralap júrgen. Qarýlanǵan ańshylar sál uzap ketkeni sol, sońynan ilese sybdyr estiledi. Dala janýarynyń kele jatqanyn sezip, júrisin jyldamdatady. Abyroı bolǵanda, qarýlanǵan ańshylarǵa belgi berip úlgergen. Ańshylar da kásibı. Kóp uzamaı ormannyń sur jendetin sulatyp túsiripti. Sóıtse esik pen tórdeı arlan eken.
Fotograf áý basta anımalıstik janrda sýret túsirýmen áýestenip kórgen. Biraq sátti sýretter shyqpaǵan soń peızaj janryna kóshken. Al búginde qalanyń qurylysyna qatysty foto túsirýmen shuǵyldanyp júr.
Shyǵys Qazaqstan oblysy
