OPEC+ BAÁ uıymnan shyqqannan keıin, 3 mamyrda alǵash ret onlaın formatta jıyn uıymdastyrdy. Jıynǵa qatysýshy elder naryqtaǵy jaǵdaıǵa baılanysty óndiris kólemin qaıta qarastyrýǵa daıyn ekenin atap ótti. Iаǵnı, munaı naryǵyndaǵy baǵa men suranysqa qaraı ıkemdi saıasat saqtalady.
Kelisimge sáıkes, Qazaqstan úshin belgilengen kvota – táýligine 1,599 mln barrel munaı. Bul sońǵy aılarda óndiris kólemin qatarynan úshinshi ret arttyrý bolyp otyr.
Reuters agenttiginiń málimetinshe, óndiristi arttyrý týraly sheshimniń eki negizgi sebebi bar. Birinshisi – Taıaý Shyǵystaǵy geosaıası jaǵdaı men jetkizilimderge qatysty shekteýler, bul munaı baǵasynyń ósýine alyp kelýi múmkin. Ekinshisi – OPEC+ uıymynyń birtutastyǵyn saqtap, BAÁ uıymnan shyqqannan keıin de júıeniń jumys istep turǵanyn kórsetý.
BAÁ 28 sáýirde OPEC pen OPEC+ quramynan shyǵatynyn málimdegen edi. Olar bul qadamdy munaı salasyna kóbirek ınvestısııa salyp, óndirý kólemin shekteýsiz arttyrý qajettiligimen túsindirgen.
Qazir OPEC quramynda 11 memleket qaldy, al OPEC+ aıasynda budan bólek taǵy birneshe munaı óndirýshi el, sonyń ishinde Qazaqstan da bar.
