Shyqqan órt súrlemge jáne qoımalarǵa qaýip tóndirdi. Obekt kezekshisi órt týraly habarlama alǵannan keıin birden «101» qyzmetin jáne elevatordyń memlekettik emes órtke qarsy qyzmetin shaqyrdy. Sodan keıin daýys zoraıtqysh baılanysymen jumysshylardy qulaqtandyrdy.
Birinshi kezekte elevator jumysshylaryn evakýasııalaý jáne búkil ǵımaratty elektr jelisinen ajyratý jumystary uıymdastyryldy. Habar ala sala qıqýlatyp, shartty órt shyqqan jerge qutqarý jasaqtary kelip jetti. Tótenshe jaǵdaı oryn alǵan jerde jedel shtab qurylyp, quramyna nysannyń mamandary kirdi. Urysta turys joq. О́rt sóndirýshiler tez arada órtti sóndirýge kiristi. Tilsiz jaýmen arpalys kezinde órt sóndirý bólmesinde munara qyzmetkerlerinen «zardap shekken» adam tabyldy. Ony qutqarýshylar tútin aımaǵynan evakýasııalap, apattyq medısına ortalyǵynyń dárigerlerine jetkizdi. Ol jerde aq halattylar «tútinge ýlanǵan» adamǵa alǵashqy kómek kórsetip, janyn aman alyp qaldy.
«Oqıǵa» bolǵan jerge barlyǵy 10 birlik arnaıy tehnıka jáne 40-tan astam qutqarýshy mamandar tartyldy. «Qyzyl jalynnyń» betin qaıtarý úshin 4 birlik tehnıka jáne elevatordyń memlekettik emes órtke qarsy qyzmeti jumyldyryldy.
Kásibı mamandardyń úılesimdi is-qımyldarynyń arqasynda «órt» jedel sóndirildi. Qutqarýshylar keptirý munarasynyń galereıasyna «órtti» jibermeı ustap qaldy. Sóıtip daıyndyqtary saqadaı saı mamandar 49 myń tonna aýylsharýashylyq ónimin aman saqtap qaldy.
– Elevatorlardaǵy órt bola qalsa, tehnologııalyq oıyqtardyń, tasymaldaý taspasy jáne jeldetýdiń tarmaqtalǵan jelileriniń kóptiginen ottyń tez taralýy múmkin. Oqý-jattyǵýda ózara jedel qımyldaý, zardap shekkenderge kómek kórsetý pysyqtaldy, – dep túsindirdi oblystyq Tótenshe jaǵdaılar departamentiniń «О́rt sóndirý jáne apattyq qutqarý qyzmeti» mekemesi bastyǵynyń orynbasary Azamat Muqashev.
О́rt sóndirý qyzmetiniń jeke quramynyń daıyndyq deńgeıi, nysannyń ákimshiligi men qyzmet kórsetý personalynyń is-qımyldary «jaqsy» dep baǵalandy.
О́skemen
