Saýalda akademık Zımanovtyń otandyq zań ǵylymynyń damýyna sińirgen orasan zor eńbegi jáne elimizde bilikti zańgerler daıarlaýdyń negizin qalyptastyrǵan ustazdyq qyzmeti jan-jaqty baıandalǵan.
"Ol 1961 jyly Máskeýde doktorlyq dıssertasııasyn qorǵaǵannan keıingi bar ǵumyryn qazaqstandyq zań ǵylymynyń damýyna arnady. Qazaq memlekettik ýnıversıtetiniń zań fakýltetin, Ulttyq ǵylym akademııasynyń Fılosofııa jáne pravo ınstıtýttaryn basqaryp, myńdaǵan shákir tárbıelep, 30-dan astam ǵylym doktory men kandıdattaryn daıarlady. Onyń shákirtteri Qazaqstanda ǵana emes, TMD elderinde kóptep sanalady", degen Muhtar Qul-Muhammed akademık kóziniń tirisinde-aq «qazaq zań ǵylymynyń patrıarhy» degen beıresmı ataqqa ıe bolǵanyn aıtty.
Shyn máninde, Salyq Zımanov memleket teorııasy men tarıhy, saıası jáne quqyqtyq ilimder tarıhy, konstıtýsııalyq quqyq, qazaqtyń ata zańdary jáne zań ǵylymynyń ózekti máselelerine arnalǵan kóptegen monografııalar men ǵylymı eńbekter jazyp, sońyna 10 tomdyq mol ǵylymı-shyǵarmashylyq mura qaldyrǵan tulǵa.
Salyq Zımanov dese, eń aldymen, elimizdiń egemendigi eske túsedi. О́ıtkeni, Qazaqstannyń táýelsizdigine dańǵyl jol salyp bergen basty qadam 1990 jyldyń 25 qazanynda qabyldanǵan Qazaq KSR-niń "Memlekettik egemendigi týraly" Deklarasııasy edi. Onyń jobasyn daıyndaǵan depýtattyq komıssııanyń basshysy dál osy Zımanov bolatyn. Keıin 1991 jyly 14-16 jeltoqsanda "Qazaqstan Respýblıkasynyń Memlekettik táýelsizdigi týraly" konstıtýsııalyq zańyn qabyldaý barysynda másele tyǵyryqqa tirelgende taǵy da kelisim komıssııasynyń quramyna kirip, tarıhı qujattyń qabyldanýyna Joǵarǵy Keńestiń zańger depýtaty retinde zor úles qosty.
"Onyń sol kezde sóılegen sózderi men tegeýrindi pikirleri Parlament muraǵatynda saırap tur. Ol 1994 jyly Joǵarǵy Keńeske ekinshi márte depýtat retinde saılanyp, ómiriniń sońyna deıin elimizdiń qoǵamdyq-saıası ómirindegi eleýli oqıǵalardyń bárine derlik abyz aqsaqal retinde belsene aralasty. Senat pen Májilis Tóraǵalary, Premer-Mınıstr jáne respýblıkalyq quqyqtyq organ basshylaryna udaıy óziniń tolymdy usynys, taǵylymdy pikirlerin joldap otyrdy. Elbasynyń saıası-quqyqtyq reformalaryna únemi qoldaý kórsetti", dedi senator.
Saýalda Salyq Zımanovtyń Uly Otan soǵysyna qatysqan maıdanger ǵana emes, naǵyz qaharman ekenine de nazar aýdarylǵan. Ásirese, onyń "I dárejeli Otan soǵysy" ordenimen marapattalǵany, dańqty qolbasshy, marshal K.K.Rokossovskııdiń tikeleı basshylyǵymen shaıqasqany jáne soǵysty ańyzǵa aınalǵan batyr Baýyrjan Momyshulymen birdeı áskerı shende – polkovnık dárejesinde aıaqtaǵany erekshe aıtylǵan.
Muhtar Qul-Muhammed akademıktiń ǵasyrlyq mereıtoıyn laıyqty deńgeıde atap ótýdiń ulttyq jáne eldik múdde turǵysynan mańyzy óte zor ekenin aıtyp, Úkimetke osy baǵyttaǵy birqatar usynystaryn joldady. Naqty aıtqanda, senator qaharman ǵalymnyń ómiri men shyǵarmashylyǵyna arnalǵan halyqaralyq ǵylymı-praktıkalyq konferensııa, tanym-taǵylymdyq sharalar ótkizý, onyń esimin Atyraý men Almaty qalalarynyń kóshelerine jáne Nur-Sultan qalasyndaǵy jańadan salynǵan mektepterdiń birine berý, týǵan jerinde eńseli eskertkishin ornatý máselesin qarastyrýdy suraıdy.
