Bulaı sóz salmaqtaýymyzdyń óz baǵyt-baǵdary bar. Nege deseńiz, Halyqaralyq Túrki akademııasy jáne Iýnýs Emre atyndaǵy túrik mádenı ortalyǵynyń qoldaýymen ótken dóńgelek ústelde aǵaıynǵa aq lebizin aqtarǵan qoǵam zııalylarynyń túrik jurtyna degen ystyq yqylasynyń aıryqsha ekenin baıqadyq. Aldymen qatysýshylarǵa óz zamanynyń zańǵar perzenti Mustafa Kemalǵa arnalǵan kitap kórmesi usynylyp, tórinen tórt tarap nurly sóz kútken, kórkine kúlli el kóz tikken Túrkııa memleketiniń ǵasyrǵa jýyq ǵumyrnamasynan syr tartqan kórkemfılm kórsetildi.
Keleli kezdesýdiń tizginin ustaǵan Halyqaralyq Túrki akademııasynyń prezıdenti Darhan Qydyráli jınalǵandardy atalǵan merekemen quttyqtap, betashar sózdi Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjıge usyndy.
– Táýelsizdikten artyq qymbat dúnıe joq. Túrik Respýblıkasynyń qazirgi qol jetken tabystary azattyq jolyndaǵy azapty jyldardyń jemisi. Túrik halqy bul kúnge ońaı jete qoıǵan joq. Ol jolda qanshama baýyrymyzdyń qany tógildi. Ult bolyp uıysý men memleket bolyp qalyptasýdyń nebir kezeńderinen ótti. Baqytymyzǵa oraı 1923 jyly 29 qazanda erkindikke qol jalǵap, sol ýaqyttaǵy jas respýblıkamyzdyń tuńǵysh prezıdenti bolyp marshal Mustafa Kemal saılandy. Memleket pen halyq aldyndaǵy eńbegi úshin oǵan 1934 jyly 24 qarashada «Atatúrik» tegi berildi. Zańǵar tulǵamyz Túrkııa terrıtorııasyn talan-tarajǵa túsip, bodan bolýdan qutqardy. Sonyń arqasynda egemendikpen erkin tynystap kelemiz, – deı kele elshi, osy aıtýly sharany uıymdastyrýshylarǵa alǵysyn bildirdi.
Odan keıin sóz kezegi Qazaqstan halqy Assambleıasy Tóraǵasynyń orynbasary – Qazaqstan Prezıdenti Ákimshiligi QHA Hatshylyǵynyń meńgerýshisi Janseıit Túımebaevqa berildi. Eki tilde qatar sóılep, Túrkııanyń azattyq jolyndaǵy kúresin baıandaǵan Janseıit Qanseıituly túbi bir qos eldiń baýyrlastyǵy nyǵaıa berýin tiledi.
Jıynǵa sondaı-aq Syrtqy ister mınıstrliginiń departament dırektory Erjan Muqash, Túrki keńesi Aqsaqaldary keńesiniń múshesi Ádil Ahmetov qatysyp, sóz sóıledi.
Jıyn barysynda Iýnýs Emre atyndaǵy túrik mádenı ortalyǵynyń bilim alýshylary Muhammedııar Ankabaev pen Baqdáýlet Tashmanov túrik tilinde arnaý óleń oqyp, arnaıy alǵys hatpen marapattaldy.
Aıta ketý kerek, osydan ǵasyrǵa jýyq ýaqyt buryn Anadolyda ult kóshbasshysy Atatúrik bastaǵan shetel ınterventteriniń jaýlaýynan azat etýge baǵyttalǵan ult-azattyq kúres jeńispen aıaqtalǵan edi. Sodan el konstıtýsııasyna ózgerister enip, Túrkııa Respýblıkasy ómirge keldi. Dástúr boıynsha merekelik sharalar sol eldiń bas qalasy Ankaradaǵy Atatúrik kesenesinen bastaý alady. Osy rette Qazaqstan da baýyrlas eldiń ulyq merekesin qasterlep, jyl saıyn qýanyshyna ortaqtasyp keledi.
