Qamar Moldabekova dekrette júrgende eshki sútin satýmen aınalysýdy sheshipti. «Bastaý Bıznes» jobasy boıynsha oqýdan ótken jas azamatsha 7 bas eshki satyp alady.
«Biz balamyzǵa eshki sútin bermek boldyq. Biraq bizdiń qalamyzda ony alý qıynǵa soqty: 1 bótelkesin 15 myńǵa satyp alasyń nemese basqa jaqqa barýǵa týra keldi. Bul, birinshiden, yńǵaısyz, ekinshiden, ónimniń joǵary sapasyna kepildik bermeıdi. Sondyqtan biz ózimiz úshin bir eshki aldyq. Sosyn nege osy nársemen aınalysyp kórmeske dep oılandym. Mine, mamyr aıynda maǵan grant berdi, shilde aıynda sata bastadyq. Ázirge adamdar biz týraly bir-birinen estip-bilip jatyr, biraq isimizdi odan ári keńeıtýdi jáne ónim jetkizýdi qolǵa alýdy josparlap otyrmyz», dedi kelinshek.
«Bastaý Bıznes» jobasynyń taǵy bir qatysýshysy tek grantpen shektelmeýge sheshim qabyldady. Amanjol Sabdanbekov úlken josparlar qura otyryp, aldymen grant esebinen TBS ashyp, naryqta ornyǵyp aldy. Sodan keıin bıznesti keńeıtý qajettiligin negizdep, «Eńbek» memlekettik baǵdarlamasy sheńberinde óz jobasyn iske asyrýǵa jeńildetilgen kredıt aldy.
Almaty oblysynyń Jumyspen qamtýdy úılestirý jáne áleýmettik baǵdarlamalar basqarmasynyń aqparaty boıynsha, bıyl óńirde «Eńbek» memlekettik baǵdarlamasyna 48,7 myń adam qatysty. 33,2 myń adam jumysqa ornalastyryldy, onyń ishinde 16,7 myń adam turaqty jumysqa turdy. 1 659 adam grant, al 815 adam óz isin damytýǵa mıkrokredıt aldy. Kásipkerlik negizderine oqytý maqsatynda «Bastaý Bıznes» jobasyna 3 639 adam qatysty.
Memlekettik baǵdarlamanyń úshinshi baǵyty aıasynda 1 343 adam sýbsıdııalanatyn jumys oryndaryna, 1 793 túlek jastar praktıkasyna jiberildi, 18 717 adam qoǵamdyq jumystarǵa tartyldy. Sonymen qatar 2 458 adam qysqa merzimdi kásiptik oqýǵa jáne 1 535 adam tehnıkalyq jáne kásiptik oqýǵa jiberildi.
Budan buryn habarlaǵandaı, bıyl Qazaqstan boıynsha «Eńbek» baǵdarlamasyna 526 myńnan astam adam qatysyp, túrli qoldaý túrlerin aldy. 338,2 myń adam jumysqa ornalastyryldy, onyń ishinde turaqty jumysqa 189,4 myń adam, memleket sýbsıdııalaıtyn jumys oryndaryna 187,3 myń adam jumysqa ornalastyryldy. 9,6 myń jeńildetilgen kredıt jáne 38 myń qaıtarymsyz grant berildi. «Bastaý Bıznes» jobasy boıynsha kásipkerlik negizderine qysqa merzimdi oqytýdan 33,2 myń adam ótti.
