Memleket basshysynyń Joldaýynda ýchaskelik ınspektorǵa basty ról berý jáne jergilikti polısııa qyzmetine jalpy reforma jasaýdyń ýaqyty jetkeni aıtylǵan bolatyn. Prezıdent ýchaskelik ınspektor mártebesin zańdy túrde arttyrýdy, oǵan nátıjeli jumys isteý úshin barlyq múmkindikterdi berýdi tapsyrdy.
Otyrysqa komıtet músheleri, sondaı-aq Bas prokýratýranyń, qarjy jáne ishki ister mınıstrlikteriniń ókilderi, onyń ishinde oblystyq polısııa departamentteriniń jergilikti polısııa qyzmetiniń basshylary qatysty.
Senatorlar Memleket basshysynyń Joldaýynda jáne IIM-niń keńeıtilgen alqa otyrysynda aıtylǵan bastamalaryna erekshe nazar aýdardy. Andreı Lýkın quqyq qorǵaý organdarynyń qyzmetkerlerin adamdarmen ashyq dıalog júrgizýge úıretý mańyzdy ekenin atap ótti. Bul baǵyt kadrlardy daıarlaý jáne irikteý júıesinde basym baǵyt bolýǵa tıis. Onyń aıtýynsha, búgingi tańda ýchaskelik polısııa ınspektorlarynyń tikeleı fýnksııalaryn oryndaýǵa kedergi keltiretin mańyzdy problemalar bar.
"Turaqty saqtalatyn bos oryndar, normatıvten tys jumystardy oryndaý esebinen ýchaskelik ınspektorlardyń júktemesi ulǵaıyp keledi. Sonymen qatar keıbir aımaqtardaǵy jergilikti polısııa qyzmeti bólimsheleriniń qyzmeti kóbinese abattandyrý erejelerin saqtaýǵa, ruqsat etilmegen saýdaǵa jol bermeýge, sanıtarlyq jaǵdaıdy qamtamasyz etýge jáne bıýdjetti tolyqtyrýǵa baǵyttalǵan. Budan basqa, jergilikti polısııa qyzmetiniń jumysyn uıymdastyrýda, basqa memlekettik organdarmen ózara is-qımylda jáne eńbek jaǵdaılarynyń bolmaýynda da problemalar bar. Ýchaskelik polısııa ınspektorlarynyń fýnksıonaldyq mindetterin sapaly oryndaýyna uıymdastyrýshylyq problemalardyń kóp bolýy múmkindik bermeıdi", - dedi Andreı Lýkın.
Senatorlar aıtylǵan barlyq pikirler ýchaskelik ınspektordyń mártebesin kóterý týraly zań jobasyn ázirleý kezinde eskerilip, oǵan tıimdi jumys isteý úshin qajetti ókilettikter beriletinin atap ótti.
Sondaı-aq depýtattar ýchaskelik polısııa ınspektorlarynyń jalaqysyn ulǵaıtý jáne olardyń turǵyn úı problemalaryn sheshý máselesin qaraýdy, sondaı-aq ýchaskelik polısııa pýnktterin materıaldyq-tehnıkalyq jabdyqtaýdy nyǵaıtý úshin qosymsha qarjy bólýdi usyndy.
