Sybaılas jemqorlyqqa qarsy qyzmettiń basshysy qorǵanys jáne memlekettik kirister isteri jónindegi óńirlik organdarǵa baryp, esepke alý-shaqyrý jumysymen, sondaı-aq salyq, keden jáne bıýdjetke tólenetin basqa da mindetti tólemder túsimderiniń tolyqtyǵy men ýaqtylylyǵyn qamtamasyz etý jónindegi qyzmetpen tanysty.
A. Shpekbaev armııa – parasattylyqtyń, tártip pen tazalyqtyń úlgisi bolýy tıis ekenin atap ótti.
"Áskerı bólimderde aldyn alý sharalaryn kúsheıtý qajet. Bul turǵyda turmystyq jemqorlyqtyń aldyn alý maqsatynda memlekettik qyzmetterdi avtomattandyrý jáne sıfrlandyrý máselelerine erekshe nazar aýdarý qajet", - dedi ol.
Budan ári Agenttik tóraǵasy Covid-19 emdeýge arnalǵan 200 tósektik modýldik juqpaly aýrýlar gospıtaliniń tusaýkeserine qatysty.
Sonymen qatar, Antıkor basshysy 2018 jyly onyń bastamasymen ashylǵan Pavlodar qalasy ákimdiginiń "Open Pavlodar" servıs ortalyǵynda zamanaýı standarttar boıynsha memlekettik qyzmet kórsetý jumysymen tanysty.
Esterińizge sala keteıik, 2017 jyly Pavlodar oblysyna sapary barysynda Alık Shpekbaev ákimdikter negizinde ashyq servıstik ortalyqtar qurýdy usynǵan bolatyn.
Bıyl jyl basynan beri "Open Pavlodar" front-keńsesine 90 myńnan astam adam júgindi, onyń ishinde 54 741-i memlekettik qyzmet alyp, 35 432 adam keńes, qarjy ınstıtýttary men memlekettik emes mekemelerdiń qyzmetterin aldy.
"Azamattardyń qajettilikterine baǵdarlaný – sybaılas jemqorlyqqa qarsy saıasattyń mańyzdy elementteriniń biri. Bul turǵyda memlekettik apparatty parasattylyq, ashyqtyq jáne eseptilik qaǵıadalary arqyly transformasııalaý mańyzdy ról atqarady", - dep atap ótti Agenttik tóraǵasy.
Sondaı-aq A. Shpekbaev S. Toraıǵyrov atyndaǵy Pavlodar memlekettik ýnıversıtetinde "IT HUB" jobasy aıasyndaǵy ınnovasııalyq IT ónimder men startaptar ázirlemelerimen tanysty.
Ortalyqtyń negizgi mindetteri – túrli kózderden aqparat jınaý, jınaqtalǵan aqparatty statıstıkalyq jáne taldamalyq óńdeý, sondaı-aq ýnıversıtet bıznes-úderisteriniń nátıjelerine monıtorıng júrgizý.
Sonymen qatar, Agenttik basshysy "Pavlodar qalasynyń №2 oqý-óndiristik kombınaty" MM jáne №39 mekteptiń qyzmetimen tanysty.
Atalǵan mekteptegi kezdesý barysynda bastamashyl top Sybaılas jemqorlyqqa qarsy qyzmet júıesiniń atqarǵan ıgi qyzmeti úshin, onyń ishinde shaǵyn aýdannyń kókeıkesti máselesin sheshýge, atap aıtqanda, jeke tulǵaǵa turǵyn úı salýǵa zańsyz berilgen stadıon telimin memlekettik menshikke qaıtarýǵa kómek kórsetkeni úshin óńir turǵyndary atynan Agenttik tóraǵasyna zor alǵysyn bildirdi.
Al "Investorlar úıinde" óńir qonaqtaryna "Jumyspen qamtýdyń jol kartasy" jáne sıfrlandyrý aıasyndaǵy jobalar tanystyryldy.
Tanystyrylym barysynda oblys ákiminiń orynbasary S. Shaıahmetov ótken 9 aıda óńirdiń negizgi kapıtalǵa salǵan ınvestısııa kólemi 328 mlrd teńgeni quraǵanyn aıtty. 489,5 mlrd. teńgege 32 ındýstrııalyq joba iske asyrylýda. Osy jobalardy iske asyrý qorytyndysy boıynsha shamamen 2900 jańa turaqty jumys orny qurylady.
"Bıznesti qorǵaý – bul jumys oryndary, salyqtar jáne halyqtyń ál-aýqaty. Eń bastysy, kedergi keltirmeý", - dedi A.Shpekbaev.
Aıta ketý kerek, "Protecting Business and Investments" (PBI) bıznes pen ınvestısııalardy qorǵaý boıynsha Antıkor jobasy aıasynda Pavlodar oblysynda bıznes-jobalardy sybaılas jemqorlyqqa qarsy súıemeldeý boıynsha 38 kelisim jasaldy. Mundaı kelisimder sanynyń ósýi ótken jylmen salystyrǵanda 133%-dy qurady. Zańdy tulǵalardyń 39 ótinishi tirkeldi, olardyń 95% oń sheshimge ıe boldy.
Alık Shpekbaev bıznesti qorǵaýdyń mańyzdylyǵyn atap ótip, oblys ákimi Ábilqaıyr Sqaqovqa kásipkerlerdiń máselelerin jedel sheshkeni úshin alǵys aıtty.
