Belarýsııanyń birinshi raketkasy, álemdik reıtıngte 83-satyda ornalasqan Egor Gerasımov Astana Open chempıonatynyń ár-bir matchynda tamasha oıyn órnegimen kózge túsken sportshy. Onyń Irdı Veseldi tize búktirgen kezdesýdegi sheberligine tań qalmaǵan jan joq. Biraq onyń shırek fınaldaǵy qarsylasy, AQSh-tan kelgen álemniń 64-raketkasy Frensıs Tıafo ońaı beriletin sportshy emes. Qatelikke boı aldyrmaıtyn, ár matchta qarsylasyn tyǵyryqqa tireýge tyrysatyn sheber tennısshi.
Birinshi geımnen eki jaq shabýylǵa toly oıyn kórsetti. Gerasımov dopty oıynǵa qosýda áleýetin arttyryp, oıyn jyldamdyǵyn arttyrýǵa tyrysty. Al Tıafo qysqa qaıyrma soqqylarymen qarsylasyn qapy qaldyrdy. Eki tennısshi de dopty oıynǵa qosýda qatelesken joq. Sondyqtan partııa taı breıkpen jalǵasyp, qysqa eseppen amerıkalyq jeńiske jetti.
Birinshi sette jeńilis tapqan Gerasımov ekinshi partııanyń basynda qoǵalysyn údetip, breık ıelendi. Tıafý óz kezeginde esep aıyrmasyn qysqartqysy keldi. Alaıda geımde utylys taýyp, belarýs sportshysyna kezekti partııada jeńisti berip qoıdy. Egor Gerasımovtyń júıkesi syr berdi me, osy geımniń birinshi setbolynda qatarynan eki qatelik jasap, setti tek úshinshi áreketinde aldy.
Sheshýshi sátte eki oıynshy da babynda boldy. Frensıs Tıafonyń soqqylary Egor Gerasımovty ábden sastyrdy. Belarýs ókili ýaqyt óte doptyń baǵytyn dál taýyp otyrdy, tipti dopty oıynǵa qosqan sátten tordyń janynda oınady. Tıafonyń dopty oıynǵa qosý ádisteri de sátti shyqqanyn aıtý kerek. Dop jyldamdyǵy saǵatyna 217 km deıin jetti. Biraq kezekti dopty oıynǵa qosýda ol qatelesip, geım qarsylasynyń esebine jazyldy. Alaıda qateliginen sabaq alǵan AQSh ókili breıkke qol jetkizip, alǵa umtyldy. Al Gerasımov tablodaǵy kórsetkish 5:6 bolǵan sátte múlt ketip, qolda turǵan jeńisti ýysynan shyǵaryp aldy. Qysqa eseppen bul matchta Frensıs Tıafonyń baǵy jandy. Esep: 7:6 (7:5), 5:7, 7:5.
Mıhaıl Kýkýshkınniń shırek fınaldaǵy búgingi qarsylasy bir kún buryn úsh sette avstralııalyq Djordan Tompsonnan basym bolǵan Emıl Rýýsývýorı.
Alǵash ret ótip jatqan ATP 250 týrnıriniń jalpy júlde qory 275 myń dollar. Koronavırýs pandemııasyna baılanysty jarys jankúıersiz ótip jatyr, Matchtardyń barlyq translıasııasy QAZSPORT arnasy arqyly taratylady.
