... Bári-bári áli esimde. Ol kezde jastar gazetindemin. Erteletip jumysyma kelip jaıǵasa bergenimdi ańdyp turǵandaı telefonym shyryldaǵan. Beıtanys bııazy daýys birden baýraǵandaı. «Haliń qalaı, Janatjan? Ornyńda otyrmysyń. О́zińmen aqyldasatyn sharýa bar edi. Úshinshi qabatqa, maǵan jolyǵyp ketshi qazir...». О́zimsinip jylyushyraı tildesken «Sosıalıstik Qazaqstannyń» basshylarynyń biri Sarbas Aqtaev eken. Mán-jaıdy surastyrmastan, ile-shala elpildegen kúıi tómen tústim. Sarbas aǵanyń esigin batyldana ashsam da, ilgeri kibirtikteı jyljyǵam.
– Káne, tórlet, baýyrym, – dedi Sákeń meni kórgen boıda emen-jarqyn. Qysylyńqyraǵan keıpimdi sezgen tárizdi. – О́zińdi kútip otyr edim, kelgeniń qandaı jaqsy boldy. Qazir operatıvti jańalyqtar bólimin basqarady ekensiń ǵoı. Munyń aldynda sport-týrızm bóliminde istediń emes pe? Seıdahmet aǵalaryńnyń gazet shyǵarýdaǵy redaktorlyq stıli, ózindik eksperımentteri óz basyma óte unaıdy. Jýrnalıst kadrlaryn basylymnyń barlyq bóliminde synap kórýi keremet. Jas qalamgerdiń besaspap bolyp, bir-birine uqsamaıtyn ár bólimniń baǵyt-baǵdaryn erkin meńgerip, tóselip, tájirbıe jınaqtaýyna mol múmkindik ashary sózsiz. Quptarlyq-aq, úırenetin izdenis. Shirkin, bizdiń «SQ»-ǵa da engizýge bolar edi. Biraq kollektıv ábden qartaıyp, qataıyp ketken. Bir oryndarynan qozǵalǵysy kelmeıdi. Tipti, kóbisi kvadrat, shrıft, kegelden múldem maqrum. Sekretarıattyń tynysyn sezbeıdi. Sóıtip otyryp «maket joq», «gazettiń ajary nashar», «tezdetip ózgeris jasaý kerek» dep synaǵanda tilderi aýyzdaryna syımaıdy-aý. Árıne, qaı kezde de syn oryndy bolýy tıis. Tyń ıdeıa, tosyn taqyryp, sony úrdis qajet. Ujymda toqyraý anyq ańǵarylady. Oqyrmandar oıyn qozǵaıtyn problemalyq maqaladan bastap, eleń etkizer úlkendi-kishili materıaldar, eń aqyry ózeginde qyzyqty derek-dáıegi bar oımaqtaı ǵana habar-oshar tynymsyz túrtinekteýden týatyny málim. Osyndaı-osyndaı táýir dúnıelerdi áshekeılep, shtrıh-fotolarmen kómkerip, maketin jutyndyryp, eriksiz kóz toqtatyp oqıtyndaı ornalastyrý jaǵynan bizdiń gazetimiz qatty aqsap jatyr. Ony jasyrmaı, moıyndaǵan durys. Sondyqtan saǵan «quda» túsip otyrmyz. Úlken bastyq habardar. Aıtpaqshy, Sapar aǵań da QazMÝ-diń jýrfagyn bitirgen soń «Lenınshil jasta» qyzmet istegen. Sekretarıattyń uńǵyl-shuńǵylyn jetik biledi. «SQ»-nyń siresken seńin buzý úshin, gazet dıdaryna jańa lep ákelý úshin, árkim-árkimmen pikirlesip ózińe toqtaǵan. Qazir ornynda joq, Ortalyq Komıtette jınalysta júr. Erteń saǵat onǵa taman kele qal, redkollegııada bekitip jibermek. Ázirshe bastyǵyńa da, basqalarǵa da úndemegeısiń...
Adam jady kompıýterden kem emes-aý. Mıyńnyń bir túkpirinde qattalyp qalǵan umyt jaıdy qas-qaǵym mezette janaryńa elestete qoıady. Sarbas aǵamen jaımashýaq júzbe-júz áńgimelesip otyrǵanda ishteı alańdaı bergem. «Bul kisini bilemin! Eń alǵash qaıdan kórip em, osy?..» Kúnuzaq mazalaǵan saýaldyń jaýabyn joǵary qabattaǵy kabınetime kelip jaıǵasqanda baryp tapqandaımyn. Jaz dıdarly jaısań aǵanyń beınesin birinshi ret mektep qabyrǵasynda júrgenimde tamashalaǵan ekenmin. «Jazýshy» baspasynan jaryq kórgen «Tuńǵysh» óleńder jınaǵynyń syrtqy muqaba betinen. Bul kitap «Qazaqstan pıoneri» gazetiniń redaksııasy Baspasóz kúni merekesine oraı «Úzdik jas tilshi» retinde arnaıy syılyqqa jibergen jıyrma-otyz kitaptan turatyn shaǵyn kitaphana quramynda bolǵan edi. Stýdenttik jyldary «Jetisý» gazetinde istegen ýaqytynda móltek ocherkim men eki-úsh resenzııamnyń jarııalanýyna yqpal etkenin nege umytaıyn?!
Quıysqanym kóterilip, kóńilim alabóten aspandaǵan. Qýanǵanym ras. Bas gazettiń tizginin ustap otyrǵan Sapar aǵa Baıjanov odan beter qopańdatyp, boıymdy da, oıymdy da ósirip, qııalyma qanat baılap jiberdi:
– Barlyǵyn jigitterden estidim. Tezdetip, erteńnen bastap jańa qyzmetińe bilek sybanyp kiris. Qazir baryp ótinishińdi jazǵaısyń, Seıdahmet qısaıa qoımas. Shet jaǵyn Úlken úıdegi ıdeologııa bóliminiń jaýapty qyzmetkerlerine eskertkem. Eń basty mindetiń – gazettiń kelbetin, bet-beınesin túbegeıli ózgertý. Demek, «SQ»-nyń mazmunyna saı, syrtqy bitim-poshymyn, ózine tán jańasha maketin jasaý kerek. Jastar gazetinde jıǵan-tergen tájirbıeń men fantazııańdy erkin kórsetýge múmkindigiń mol. Tek ózińnen sony serpilis, tamasha jańalyqtar kútemiz. Eńbek stajyńa nuqsan kelmeıtindeı buıryǵyńdy durystap beremiz. Tez, shapshańyraq «Lenjasyńnan» ruqsat alý máselesin retteshi...
Múldem kútpegen jaǵdaı. Ádettegideı bólmesine elpildep-jelpildep jetip barǵan túrimdi quddy tamyrshydaı barlaǵan Seıdahmet aǵa kirtıip qarsy alǵan-dy. Álde kóńil hoshy bolmaı otyrǵan tusyna dóp keldim be? Kim bilsin? О́te sırek ashýlanatyn redaktorymnyń júzi qarakúreńitip, áńgimemdi selqos tyńdap, ile-shala ózime zirkildeı jóneldi. «Nemene, aǵa gazetsiz kúniń bitip pe edi?! Álde, jasyńa jetpeı shal bolmaqsyń ba, á? Shalqyp, shalqaıyp júrgen jyly uıańnan qýǵan bireý bar ma, aıtshy óziń? Bolar-bolmas on-on bes somǵa qyzyǵyp... Onyń ústine «Lenjastan» zańǵaradaı úsh bólmeli úı alǵanyńa da kóp bolmady ǵoı. «SQ»-ǵa bizden ketken eń talantty degen ana-ý-ý Rashıt Raqymbekov, Bolat Bodaýbaev, Baıtursyn Ilııasov sekildi sýǵa sińip, iz-túzsiz joǵalyp ketpeksiń be? Joq, barmaısyń... Jibermeımin! Alańdamaı jumysyńdy jasap, jazýyńdy jaza ber... Álgi shaqyryp júrgen myqtylaryńa «Berdiqulov bosatpady degeısiń...»
Sóıtip, Sapekeńniń aldyna qaıta aınalyp barýǵa uıalyp, mán-jaıdy túsindirýge batylym jetpeı, buqpantaılap júrgenimde baspahananyń gazet betteý sehynda ushyrasyp qaldyq. Búgejektep, yńǵaısyzdanǵan kúıimdi ańǵarǵan mańǵaz aǵa qıyn sátten ózi op-ońaı alyp shyqqany kúni keshegideı áli esimde. «Janatjan, haliń qalaı? Kezekshilikte júrsiń be? Oqasy joq. Kez kelgen redaktordyń táýir, isker qyzmetkerinen aıyrylǵysy kelmeıtini túsinikti. Qısyny bolsa áli de shaqyramyz...» Úlken júrektiń jylýyn sol qysyltaıań mezette jan dúnıemmen sezingen edim. Ýádesinen taımaǵan Sapar aǵa jyl aralatyp ótkendegi laýazymyn usynǵanda ushqalaqtyq jasaǵym kelmedi. Rahmetimdi aıtyp, tabandap bas tarttym. Shamasy taǵy bir jyldan keıin, úshinshi márte qolqa salǵanda qamqor da, baǵban peıildi qalamgerdiń yqylasynan tabylýǵa asyqtym. Bul joly qarshadaı shaǵymnan kórmeı, júzdespeı «barmaqtaı ǵana meniń ıýnkorym» dep alaqanynda aıalaǵan bastyǵym Seıdahmet Berdiqulov júregi jarylardaı qýana batasyn bergen. «Bizdiń «Lenınshil jastyń» bólim meńgerýshisine qazaq baspasóziniń qarashańyraǵy «Sosıalıstik Qazaqstan» bólim tizginin ustatyp tórine shyǵaryp jatsa, nege meıirlenbeske! Bul – úlken qurmet» degen lebizin árdaıym úkilep jetkizgim kelip turady.
Birtindep úlken shyǵarmashylyq ujymnyń tirlik-tynysyna beıimdelip, tártibine moıynsuna bastadyq. Alaýlaǵan, jarqyldaǵan jastar ortasynan bólek ekeni kózge uryp-aq tur. Jer ortasyna taqaǵan kil shirenderdiń arasynda meni jaqtyrmaı, qıys qaraýshylar da ushyrasqan. Saýsaqtarynyń ushyn ǵana tıgizip sálemdesip, ishterin ashpaıdy. Meıli... Eń qýanyshtysy, bastyqtardyń, usta dúkenindeı qyz-qyz qaınap jatatyn sekretarıattyń nıeti túzý. Lezde aralasyp, shapshań til tabysyp kettik. Olaı etpesek, shashyraǵan jip-shýy kóp, usaq-túıek kózge shalynbaıtyn sharýasy jyrtylyp aıyrylatyn «SQ»-nyń sekretarıatyna baılanǵan qyzmetkerlerdiń esebi qısapsyz. Aty-jónderin kógendep tizbelemeı-aq, tikeleı sekretarıat tóńireginde júrgenderdi sıfrlarmen sóıletelik. Jaýapty hatshy Myńbaı Ilestiń komandasynda eki orynbasary, úsh maket júrgizýshi, bir sýretshi-retýsher, eki fototilshi, bir teletaıp lentasyn oqyp retteýshi, terimge jiberiletin qol qoıylǵan materıaldardy qadaǵalaıtyn stılıst-lıngvıst, eki tehnıkalyq redaktor, redaksııa men tıpografııa arasynda shapqylap júretin kýrer, toǵyz-on korrektor... Osynshama mashınıstka jáne bar. Qansha adam – sonsha minez... Bir-birine qatysty osynaý tehnıkalyq qyzmetkerlerdiń jumystaryn ózara úılestirmek gazettiń kórkemdeý-bezendirý bólimine júktelgen mindet orasan zor.
Jalpy sany júz jıyrmaǵa jetip jyǵylatyn úlken ujymdy shashaýsyz ýysynda ustaǵan Sapekeń arnaıy ótkizgen óndiristik jınalysta biraz jaıdyń basyn ashyq bildirgen. Yntymaqtasyp, tatý-tátti eńbek etkende ǵana bereke-birliktiń máýeleıtinin qadap eskertti. Talap pen tártiptiń arqasynda mazmunyna kórki saı, keskin-kelbetine oraı maqalalardyń polıgrafııalyq saýatty ári aıshyqty makettelgen jaqsy gazet shyǵara alamyz. Sonda baryp ózgeler syrtymyzdan sybyrlap aıtatyn «surǵylt, syqıǵan «SQ» degen jamaýdan qutylamyz-aý shamasy. Gazet shyǵarý – jalǵyz bastyqqa, ıa bolmasa bir ǵana jazǵysh jýrnalıske tirelip turǵan joq, Kollektıvtik ortaq ıgi izdenis pen tyń ıdeıanyń jemisi. Ol úshin shyǵarmashylyq ujymdy qolynan jazý keletin jańashyl da qabiletti, daryndy jas kadrlarmen udaıy jańǵyrta bermekpiz. Keleshekti boljaǵysh, oı kózi óte qyraǵy, baısal da mámileger redaktor Sapar Baıjanovtyń aqylgóı lebizi kóp kókeıinen shyqqan. Aıryqsha serpin, bólekshe qulshynys ákelgendeı.
Osy májilisten soń beıtanys bastyǵym jónindegi kómeski, bulyńǵyr pikirim men oılarymnyń túıinderi ábden tarqatylǵan. Dana babalarymyz «jylqy kisiniskenshe, adam sóıleskenshe» demekshi, Sapekeń minezge baı, aldy keń, kemel piship, kesek sóıleıtin sırekter soıynan eken. Kókeıindegisin zekimeı, úrkitpeı, qaıtalap myjymaı, meılinshe sabyrmen jetkizýge umtylady. Gazet «kýhnıasyn» bes saýsaǵyndaı jetik biletini oıshyl da epshil sózinen ap-anyq ańǵarylǵan. Kóp redaktorǵa uqsamaıtyn oqshaý qasıetteriniń biri – erteńgi ázirlenip jatqan nómirdiń nobaıyn, ár bettiń keskin-kelbetin, eń aqyry maketke ornalastyrylǵan fotolar men shtrıhtardyń kólemin kóz aldyna dálme-dál elestetedi. Tún ortasynda betterdi tas-talqan buzyp, qaıtadan jasamas úshin kúni buryn maket bekitý ústinde qatań baqylaıdy.
Munyń bárin ádeıi táptishtep otyrmyn. О́ıtkeni ol ýaqytta bar-joǵy tórt bettik gazetti búkil redaksııa men tıpografııanyń nómirge jegilgen adamdary jumyla júrip, áýpirimdep grafıkke zorǵa ilindiredi-aý. Gazet-jýrnal shyǵarý, polıgrafııa isine qazirgideı ǵajaıyp tehnologııa jetistikteri múldem enbegen. Kompıýter men ınternet atymen joq. Búkil gazet shyǵarýǵa baılanysty operasııalardy qas-qaǵymda oryndaıtyn ári túrli-tústi boıaýmen jaryq kórip jatatyn búgingi kompıýter dáýirinde de 12, 16, 24, kerek deseńiz resmı qujattar men jarnamalar beriletin 32, 54 bettik nómirlerdi elestetý múmkin emes. Barlyq sharýa qarabaıyr qarapaıym qurylǵylar men stanoktarda oryndalady. Kremlge qarap túshkiretin baspagerlerdiń kózderi men qulaqtary Máskeýge túrýli. Erteńgi ala kóbeden túnniń bir ýaǵyna deıin qajettisi bar, kereksizi bar TASS-tyń resmı materıaldaryn QazTAG tolassyz jarysa aýdaryp berip, gazetimizdi aýzy-murnynan tyǵyndap jatady. Alaqandaı osy tórt betke redaksııa jýrnalısteriniń nazar aýdararlyq, oqylymdy táýir dúnıelerin ornalastyra almaı qatty qınalamyz. Birinshi-ekinshi betterge resmı materıaldar, qaýly-qararlar, kósemderdiń qulash-qulash syldyr sózderi men kezdesýleri, úshinshi bet «Planeta tynysy» aıdary aıasynda álemniń ár shalǵaıynan alynǵan TASS taratqan úlkendi-usaqty habar-osharmen toltyrylady. Úmit sáýlesin syǵyraıtqan sońǵy bettiń teń jarymyn telebaǵdarlama men sport jarystarynyń kúndeligi qamtıdy. Sonda deımin-aý, osyndaı jaǵdaıda qandaı jaqsy oqylatyn gazet, oqyrmandar oıynan tabylatyn maqalalar usyna almaqsyń?! Tájirbıesi mol, isker redaktorymyz qıyn-qystaý qystalań shaqtardan «ógizdi de óltirmeı, arbany da syndyrmaı» aman-esen alyp shyǵýdyń urymtal joldaryn tynymsyz izdeýmen boldy.
Basqarý júıesi men tártip-talaby qatqyl bıliktiń úsh tarmaǵynyń organy sanalatyn «Sosıalıstik Qazaqstannyń» siresken seńin sógýge tyrysty. Aptalyq, toqsandyq josparǵa aldyn ala kórsetilgen ár alýan tolǵaqty máselelerdi qozǵaıtyn materıaldar, ótkir syn maqalalar men feletondar, adamgershilik, áleýmettik-turmystyq tárizdi ımanı dúnıelerge aıryqsha kóńil bóldi. Sonymen qatar aıdarlar men oqshaý otaýlar ashyp, qalamynyń jeli bar jýrnalısterge dańǵyl jol ashqan. Serpilis izderi gazet betinen jıi-jıi kórinip, shyǵarmashylyq ujym da bólekshe túlegenin eske túsirgen abzal. Qalyń oqyrmannyń bıik talǵam tarazysynan shyqqan jotaly aıdarlar men taqyrypshalardy oraıly tusta atasaq. Olar – «SQ»-nyń máslıhat múıisi», «Oı men óner adamy», «Jeksenbilik áńgime», «Bes óleń», «Bilesiń de kúlesiń», «Zamandas jaıly syr», «Kókeıkesti másele», «Júzi basqa – júregi bir, Tili basqa – tilegi bir», «Oıtolǵaq», t.b. Osy taqylettes úkilep aıtylatyn súbeli maqalalardy, syrly ocherkter men sýrettemelerdi, tushymdy áńgimeler men sezim qylyn sherter óleńderdi, qandaýyr feletondar men ázil-ospaqtardy shtrıhtatyp, álemishtep, qyzdyń jıǵan júgindeı kórkemdep-kestelep ornalastyrýǵa erekshe mán berildi. Jutynyp turǵan árqıly týyndylardyń sýretterin gazettiń tól sýretshisi, maıtalman portretshi Januzaq Ábdiqulovtan bastap, túrli gazet-jýrnaldarda isteıtin kánigi qylqalam sheberlerin tarttyq. Belsendi avtorlarǵa ústeme qalamaqy tóledik. Yntalandyrý arqasynda gazet-jýrnaldarda tek birli-jarym fotolardy tyrnalap retýsh jasap kelgen sýretshiler qataıyńqyrap qalǵan saýsaqtaryna «til» bitirip, qııaldaryn ushtaǵany málim. Qasań gazettiń bet-beınesin ózgertip, ajaryn qubyltqan Rústem Jumakenov, Erhasan Kómekov, Nıkolaı Lebedev, Aleksandr Shestakov, Borıs Ilın, Volodııa Cherdansev sekildi naǵyz óz mamandyqtaryn ardaqtaǵan sýretshilerdiń qoltańbalaryn «Egemenniń» sarǵaıǵan betterinen kóremiz. Sondaı-aq fotojýrnalısterdiń de mártebesin ósirip «Besjyldyq jáne biz» atty tuńǵysh respýblıkalyq fotokonkrýs ótkizdik.
Árıne, mereı marqaıtar ıgi ister kóp-aq. О́zimizge júktelgen mańyzdy mindetterdiń údesinen tabylý úshin shúmektetip ter tógýge týra keldi. Jaqsy jańalyǵymyzǵa balasha qýanyp, qýattap-qoldap, qııalymyzǵa ózgeshe qanat baılaǵan Sapar aǵanyń redaktorlyq jumys stıli árdaıym daralanyp tursa kerek. Al qaǵilez jýrnalıst, qarymdy jazýshy, zerdeli ǵalym retinde tyndyrǵan jumystary ushan-teńiz. Qalamgerdiń negizgi mıssııasy – jazý. Osy turǵydan janar júgirtsek te, kóz aldymyzǵa qatar-qatar tizile qalary ulaǵatty ustazdyń tún uıqysyn tórt bólip jazǵan kitaptary. Shúkir, búginde qazaq ádebıeti men mádenıetiniń asyl muralaryna aınalǵan tóltýma shyǵarmalarynyń ózi onnan asyp jyǵylady. Aýdarma jınaqtary da bir tóbe.
Kánekı, úlken júrektiń jylýymen dúnıege kelgen kitaptardyń keıbirin aıtaıyqshy. Bozym shaǵynda jaryq kórgen alǵashqy «Jańa lep» jınaǵy syrly sózben órnek salýǵa yntyq qalamnyń qýatyn baıqatqan-dy. Ile-shala «Qurysh zergeri», «Syr men symbat», «Aq marjan», «Suńqar kóńil samǵaıdy», «Ulyma hat», «Úsh qııan – úsh dańǵyl», «Bes qııan – bes dápter» sekildi kórkemdik deńgeıi bıik kitaptary jazýshynyń sýretkerlik qoltańbasyn anyq aıshyqtaıdy. Al «Zamandas týraly tolǵaý», «Zeıin Shashkınniń prozasy haqynda», «Abaı jáne arhıv», «Qajyǵa barǵan qazaqtar», «Arhıv-aıǵaq», «О́tkennen muraǵat – órkenge ulaǵat» tárizdi ǵylymı-zertteýler sıpatyndaǵy týyndylarynyń oqyrmanǵa berer tanym-taǵylymy mol. Oı sharasy, kóńil kókjıegi keń de kenen qajyrly qalamgerdiń «Alakóbede oıat meni», «Nar táýekel», «Qarqara aıbary», «Áke» atalatyn roman, povesteri de jurt talǵamynan shyqqan shyraıly shyǵarmalar.
Jazýshynyń eń eleýli qýanyshy men baqyty – mańdaı terdiń jemisi sanalatyn kitabynyń oqýshy nazaryna iligýi. Bul jaǵynan tarazylasaq, mynaý bes kúndik jalǵan dúnıede alyp júrekti parasatty tulǵanyń izi óshpesteı saırap jatyr. Oǵan Sapekeńniń zııaly zamandastary, ókshesinen ergen izbasar inileri men esimin júrekterinde aıalaǵan tolqyn-tolqyn shákirtteriniń ár jyldary aıtqan laǵyl lebizderi. Keıbirine qulaq túreıikshi. Kez kelgen adam jaıynda ashyla bermeıtin ataqty jazýshy Qaltaı aǵa Muhamedjanov qordaly pikirin bir aýyz sózben túıipti: «Sapar – óz qatarynan kóp ozyq, aqyl-oıdyń sardary edi ǵoı». Halyq jazýshysy Ázilhan Nurshaıyqov bylaı depti: «Sapar Baıjanov – qazirgi kórnekti ocherkshilerdiń biri...
Avtor kózge kóringenniń bárin jadaǵaı sýretteı bermeıdi. Kórgendi kóńil eleginen ótkizip, pýblısıstıkalyq tolǵaýlarmen túıindeıdi... Ocherkterdiń tili tartymdy. Kitaptarynda erkin teńeýler, utymdy oılar, naqyl ispettes sózder jıi ushyrasyp otyrady. Ol ár ocherkin áńgime tárizdendirip, sıýjetke qurady. Áńgimege tán detal, shtrıhtarmen árleıdi. Portret, psıhologııa kirgizedi».
Qazaqtyń kórnekti jazýshysy О́tebaı Qanahın «Bárinen buryn qalamgerdiń izdenimpazdyǵy, zerttempazdyǵy, ańǵarympazdyǵy qatty qyzyqtyrady. Jańanyń jaqtaýshysy, jaqsynyń jarshysy bola bilýdegi qalamynyń ushqyrlyǵy erekshe súısindiredi» dep tolǵanady. Talaı jas jýrnalısterdi óz qolynan ushyrǵan baǵban-ustaz Ábilfaıyz Ydyrysov «Sapar Baıjanov – Qazaqstan jýrnalıstıkasynyń sarbazynan sardaryna aınalǵan adam. Búginde Sapekeń Ázilhan Nurshaıyqov sekildi belgili ocherkshildermen qatar, úzeńgiles keledi. Sapar Baıjanov budan keıin eshteńe jazbasa da, qazaq jýrnalıstıkasy tarıhynyń tórinde qalady» dese, keıingi býyn ókilderi arasynan jarqyrap kóringen Janat Ahmadı «Sapar Baıjanovtyń «Alakóbede oıat meni» romany – roman janrynan birdeńe bilermin dep júrgen meniń óz basym úshin kórkem ádebıet kerýenine teń-teń júgimen alqynbaı kelip qosylǵan qabyrǵaly qara atandaı, baıyrqaly, baǵaly orny bar soqtaly, som eńbek» dep kesek oı aıtady.
Sonymen qatar Kámen Orazalın, Sherhan Murtaza, Zeınolla Qabdolov, Sarbas Aqtaev, Myńbaı Rásh, Bolat Bodaýbaev, Baqyt Mustafın, Saýytbek Abdrahmanov, Saırash Ábishqyzy, Serikqalı Baımenshe, t.b. qalamgerler júrekjardy tolǵanystaryn, kókeıdegi oılaryn aǵyl-tegil syr etip shertedi. Al Sapar aǵa shańyraǵynyń shyraqshysy bolyp otyrǵan aıaýly Kúlásh apaıymyz aǵytar tebirenisi óz aldyna ǵajaıyp bir dastan ǵoı... Ǵasyrlyq shejireli tarıhy bar, ózindik sara dástúr-salty qalyptasqan elimizdiń bas basylymyn tup-týra on jyl basqarǵan gazettiń jıyrma segizinshi redaktory Sapar Baıjanovtyń (buǵan deıingilerdiń arasynda Qasym Sháripov «Egemenniń» tizginin eki ret ustaǵan) ǵıbratty ómir joly, shyǵarmashylyq ónernamasy men adamı asyl qasıetteri jaıynda emirene- eljireı áńgime órbitedi.
Iá, kerýen jyldar syńǵyry úlken júrektiń jylýyn ózgelerge jetkizgenshe asyǵady-aý.
Janat Elshibek,
Halyqaralyq «Alash» ádebı syılyǵynyń laýreaty
