Kásipqoı boks dodasynda aldymen rıng tórine álem chempıony Bekzat Nurdáýletov shyqty. Onyń qarsylasy – 28 jastaǵy Ibrahım Maokala. Jekpe-jek alty raýndqa josparlanǵan edi. Biraq kásipqoı bokstaǵy alǵashqy qarsylasyn ekinshi raýndta aýyr soqqymen nokaýtqa túsirgen Bekzat Nurdáýletov babynda ekenin baıqatty.
Ekinshi jupta taǵy bir otandasymyz Danıl Semenov qarsylasy Musa Adjıbýdy tórtinshi raýndta tehnıkalyq nokaýtqa jiberdi. Aýyr salmaqtaǵy boksshylardyń bul jekpe-jegi de alty raýndqa sozylýy tıis edi. Úshinshi jekpe-jekte qazaqstandyq Evgenıı Pavlovtyń baǵy jandy. Ol tájirıbeli Gýdlak Mremany ekinshi raýndta sulatyp saldy.
Al Abylaıhan Júsipovtiń kásipqoı bokstaǵy alǵashqy jekpe-jegi jeńispen bastaldy. Oǵan Tanzanııadan kelgen qarsylasy Meshak Mvankemva biraz qarsylyq tanytýǵa tyrysty. Sóıtip birinshi orta salmaqtaǵy qos boksshynyń aıqasy alty raýndqa sozyldy. Degenmen, tóreshiler jeńisti qazaqstandyq boksshyǵa berýge sheshim qabyldady.
Atyraýda birinshi ret ótken kásipqoı boks keshiniń basty aıqasy qazaqstandyq boksshy Bek Nurmaǵanbet pen taǵy bir tanzanııalyq Abdalah Pazımen arasynda ótti. Tóreshiler alty raýndqa jalǵasqan jartylaı aýyr salmaqtaǵy jekpe-jekte qazaq ulanynyń sheberligin joǵary baǵalady.
Osylaısha, rıng tórinde qazaqtyń namysyn qorǵaǵan bes boksshynyń aıbyny asqaqtady. Onyń ishinde Bekzat Nurdáýletov, Danıl Semenov, Abylaıhan Júsipov kásipqoı boksta alǵash ret baq synady.
Atyraý oblysy
