Osy rette memlekettik qyzmet kórsetý salasyna da birqatar ózgeris endi. Turǵyndar Halyqqa qyzmet kórsetý ortalyǵyna baryp, uzyn-sonar kezekke turmaıtyn boldy. Qyzmettiń kóbi – onlaın. Halyq tek qaǵaz júzinde kórsetiletin qyzmetterdi alýǵa barady. Halyqpen tikeleı jumys isteıtin azamattardyń qyzmeti de úlken ózgeriske ushyrady.
– Men HQO-da kóp jyldan beri jumys isteımin. Biz kún saıyn klıentterdiń júzdegen suraǵyna jaýap beremiz, keńes beremiz. Qalypty jaǵdaıda jumys isteı júrip, aıaqasty qashyqtan qyzmet kórsetýge kóshkende jaýabymyzdan góri suraǵymyz kóp boldy, – deıdi О́skemen qalasyndaǵy №3 HQO mamany Gúlnur Nurchına.
Naýryz aıynyń sońynda elimiz boıynsha HQO-lar jabyldy. Qyzmet alýshylar barlyq qyzmetti egov.kz elektrondy portaly arqyly alýǵa májbúr boldy. Bul jerde memlekettik korporasııa basshylyǵy qyzmet alýshylarǵa barynsha kómek berý kerek ekenin túsinip, 1414 call-ortalyqtyń jumysyn kúsheıtti.
Memleket úshin qyzmetten halyqtyń densaýlyǵy áldeqaıda mańyzdy edi. Sondyqtan da Shyǵys Qazaqstan oblysynda 250-den astam halyqqa qyzmet kórsetip otyrǵan maman úılerine qaıtaryldy. Olar azamattarǵa 1414 telefon nómiri boıynsha qashyqtan keńes berýge kóshti. Tótenshe jaǵdaı kezinde úıden jumys istegen keńesshilerdiń biri О́skemen qalasy №3 HQO mamany Lázzat Ahmetallınova edi.
– Alǵashynda óte qıyn boldy, kúnine 200-250 qońyraýǵa deıin qabyldadyq. Biz úshin bul synaq sııaqty, – dep eske alady Lázzat.
Olardyń jumysy telefon arqyly keńes berýmen shektelgen joq. Kóp uzamaı portalda ESQ-ny qashyqtan alý iske asyryldy, eGov.kz portalynda beınekamera arqyly azamattardy sáıkestendirý máselesi týyndady. Ol úshin respýblıka boıynsha 800-ge jýyq qyzmetkerge, al Shyǵys Qazaqstan oblysy boıynsha 120 qyzmetkerge jańa mindet júktelip, olar vırtýaldy assıstent jáne beınekonsýltant bolyp jumys isteı bastady.
HQO beınekonsýltanty Janat Ospanovtyń aıtýynsha, elektrondy formatqa kóshý halyq úshin ońaı bolǵan joq. Keıin bári onlaın formatqa úırenisip ketkenimen, barlyǵy smartfonnan bas ala almaı qaldy.
Búginde Shyǵys Qazaqstan oblysynda karantın sharalary qaıta kúsheıtilip keledi. Iri qalalardyń HQO-larynda qaǵaz qyzmetteri tek aldyn ala brondaý boıynsha ǵana kórsetiledi.
Shyǵys Qazaqstan oblysy boıynsha «Azamattarǵa arnalǵan úkimet» fılıalynyń dırektory Azamat Esembýlovtyń aıtýynsha, brondaýdy engizgen kezde kóptegen klıent túsinbeı, onlaın alýǵa bolatyn qarapaıym anyqtamalar úshin HQO-ǵa barýdy qoımaǵan. Al búgin azamattardyń úıde otyryp qyzmet alýy áldeqaıda yńǵaıly jáne qaýipsiz. Oǵan kópshiliktiń kózderi jetti de.
Qaperlerińizge sala ketsek, búgingi kúni memlekettik qyzmetterdiń 80%-yn eGov.kz elektrondyq úkimet portaly, eGovKzBot2.0 telegram-boty jáne eGovMobile mobıldi qosymshasy arqyly alýǵa bolady.
Shyǵys Qazaqstan oblysy
