Atalmysh qujat Elbasynyń ıdeıalary men bastamalaryn ilgeriletýdi, birlesken mádenı-bilim berý, ǵylymı-izdenis jobalardy iske asyrýdy kózdeıdi. Memorandým aıaǵyndaǵy negizgi seriktestik zertteý baǵdarlamalaryn, ǵylymı-praktıkalyq is-sharalardy (konferensııa, forým, semınar, t.b.) uıymdastyrýǵa, aqparat almasýǵa negizdeledi.
Kelisimge qoldy Elbasy kitaphanasynyń dırektory Ámirhan Rahymjanov pen Qazaqstan Respýblıkasy bilim jáne ǵylym mınıstri Ashat Aıtmaǵambetov qoıdy.
"Yntymaqtastyq memorandýmy Tuńǵysh Prezıdenttiń jahandyq ıdeıalary men ishki jáne syrtqy saıasat bastamalaryna aqparattyq-ımıdjdik qoldaý kórsetýge, Qazaqstannyń damýyna, jalpy álemdik qaýipsizdik júıesin qalyptastyrýǵa qosqan Elbasynyń úlesin jan-jaqty zertteýge baǵyttalǵan jumysymyzdy kúsh jumyldyrady atqarýǵa yqpal etedi dep oılaımyn", – dedi Á.Rahymjanov.
Qazaqstan Respýblıkasy bilim jáne ǵylym mınıstri Ashat Aıtmaǵambetov Elbasy kitaphanasymen birlesken jumystyń Qazaqstandaǵy bilim salasyna mańyzdylyǵyn atap ótti:
"Elbasy kitaphanasy mýzeıiniń jańa ǵımaratynda elimizdiń tarıhy tunyp tur. "Rýhanı jańǵyrý" atty Elbasy baǵdarlamasy negizinde balalar sońǵy tehnologııalarmen jabdyqtalǵan mekemede qundy aqparatpen bilimin tereńdete túsedi. Bul baǵytta úlken jumys atqaryldy. Jaýapty is jalǵasyn taba bermek. Mýzeıge mektep, kolledj, joǵarǵy oqý oryndarynyń bilim alýshylary keletin bolady. Dóńgelek ústel, sımpozıým, konferensııa sııaqty sharalar ótkiziledi. Josparlanǵan jumys aýqymy úmitti aqtaıtynyna senemin", – dedi Ashat Aımaǵambetov.
Is-shara barysynda "Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń álemniń jetekshi ýnıversıtetterinde oqyǵan dáristeri" kitabynyń basylymdyq jáne elektrondyq nusqalarynyń tusaýy kesildi. Jobanyń bas redaktory – Qazaqstan Respýblıkasy Tuńǵysh Prezıdenti – Elbasy keńsesiniń basshysy, saıası ǵylymdardyń doktory, professor Mahmud Bazarqululy Qasymbekov.
Qatysýshylardyń nazaryna kitaptyń mazmunyn, maqsat-mindetin tanystyratyn beınerolık usynyldy. Onyń aıasynda álemniń jetekshi ýnıversıtetterinde Elbasynyń sóz sóılegen sátteri kórsetildi.
Bilim jáne ǵylym mınıstrine atalmysh kitap pen basylymnyń elektrondy nusqasy jazylǵan dısk elimizdegi joǵarǵy oqý oryndaryna taratýǵa berilip, estelikke Elbasy kitaphanasy ujymynyń avtorlyq basylymdary tartý etildi.
