Otbasy – kez kelgen jannyń ózin qorǵaýda sezinetin baqyt mekeni. Sondyqtan shańyraq qurǵanda jastardyń bilim, tájirıbe, keńester men qoldaýdyń jetkilikti bolýy berik otbasy qurýǵa alyp keledi. QR Ulttyq ekonomıka mınıstrliginiń statıstıka málimetteri boıynsha Qazaqstanda sońǵy 10 jylda 1,5 mln jup úılense, dál osy kezeńde jarty mıllıonnan astam adam ajyrasqan eken. Ajyrasý sany jyl saıyn artpasa, azaımaq emes. Al, Arıstotel aıtqandaı qoǵam ol otbasy qaýymdastyqtarynan quralatynyn eskersek, eldegi otbasylardyń negizi berik qalanýy – memlekettik deńgeıdegi aýqymdy másele.
Osy oraıda, otbasyny saýatty quryp, áıelder men balalardyń qaýipsizdigin qamtamasyz etýge arqaý bolǵan búgingi is-shara qoǵamanyń ózekti máselesin ortaǵa saldy. Jıynda alǵash bolyp sóz sóılegen Baıan Aıtbekovna qaladaǵy taǵdyr talqysyna túsken otbasylar men balalar máselesi baqylaýda ekenin aıtty. Sońǵy 6 aı aralyǵynda "ONEGE" respýblıkalyq jobasy aıasynda qalamyzdaǵy qıyn jaǵdaıǵa tap bolǵan 25 otbasyǵa kómek kórsetilip, 125 keńes berý jumystary jasalǵan. "Atalǵan sharalardyń maqsaty – qıyndyqqa dýshar bolǵan otbasylarǵa tyǵyryqtan shyǵar jol kórsetip, balalarǵa qaýipsiz jaǵdaı jasaý", – dedi qalalyq áıelder Keńesiniń tóraıymy.
Qazirgi tańda qalamyzda turmystyq zorlyq-zombylyqqa tap bolatyn áıelder sany da seıiler emes. Aranýly áleýmettik qyzmetter kórsetetin "Samǵaý senim" KMM-niń áleýmettik konsýltanty Gýlchehra Momınovanyń aıtýynsha turmystyq zorlyq-zombylyqqa tap bolǵan arýlarmen naǵyz mamandar, ásirese buryn sońdy osyndaı jaǵdaıdy óz basynan ótkizgen áıelder jumys jasaý kerek. Sebebi, ortalyqqa júginentin jandar jaǵdaıdy birden ashyp aıtpaıdy, onyń ústine olardyń kóp bóligi jas qyz-kelinshekter. Turmystyq zorlyq-zombylyq qurbandarymen áńgimeleskende de arnaıy erjelerdi saqtaý kerek. Júrek túkpirindegi muń-muqtajyn túgel aqtarý úshin zorlyq-zombylyq qurbanyna ony qoldap túsinetin jandardyń bar ekenin sezdirý qajet. Sonda ǵana másele oń sheshimin tappaq.
Sonymen qatar turǵylyqty jerinen aıyrylǵan jandarǵa "Samǵaý senim" ortalyǵynyń arnaıy baspanasy jumys jasaıdy. Ol jerde qıyn jaǵdaıǵa tap bolǵan azamattar 6 aıǵa deıin tegin turaqtaı alady.
Atalmysh másele aıasynda is-sharalar aldaǵy ýaqytta da jalǵaspaq. "Sıngapýrlyq metodıka" negizinde jas analardyń biliktilik deńgeıin kóterý jáne 9-12 jas aralyǵyndaǵy búldirshinderdiń kásipkerlik, menedjment baǵyttary boıynsha bilim berý jobasynyń josparymen Gúlnara Ýsenova bólisti.
Al, Baıan Aıtbekovna 5-6 qarasha kúnderi áleýmettik sala jumysshylarymen otbasylyq qundylyqtarǵa baılanysty semınar-trenıng ótetinin habarlady. Semınarǵa qatysýshylarǵa arnaıy sertıfıkattar tabystalady.
Jıyn sońynda qatysýshylarǵa otbasylyq saýattylyqty arttyratyn oqýlyqtar tabystalyp, suraq-jaýap bólimine kezek berildi.
Aıta keteıik, bárimizge belgili 25 qarasha – halqaralyq zorlyq-zombylyqpen kúres kúni. Osyǵan oraı jyl saıynǵy respýblıkalyq "Zorlyq-zombylyqqa qarsy 16 kún" aksııasy bıyl da jalǵasyn tappaq. Bul is-sharanyń basty maqsaty jastarǵa áıelder men qyzdarǵa qatysty zorlyq- zombylyq, kemsitýshilik jáne genderlik eski nanymdarǵa qarsylyq bildirý. Osy oraıda, ómirlik qıyn kezeń kez-kelgenimizde bolýy múmkin jaǵdaı. Sol sebepti qoǵamnyń bul dertimen ult bolyp kúresýimiz asa jaýapty mindet ekenin eske salamyz.
