"Analar bizdiń trenıngtik ortalyqqa oqýǵa kelip, sabaq ýaqytynda balalaryn tárbıeshilerge qaldyrady. Túrli dıagnozy bar balalar keledi: aýtızm, serebraldy sal aýrýy, Daýn sındromy jáne t.b. Bul rette ınklıýzııa oryn alady. Sebebi olar deni saý balalarmen birge jumys isteıdi", dep atap ótti "Mama pro" QQ quryltaıshysy Ásııa Tıkeeva.
Áıelder qorynda sheshendik ónerden bastap, býhgalterlik esepke deıin kásibı qyzmet túrleri oqytylady.
"Biz kásibı koých, trenerlermen jumys jasaımyz. Oqý barysynda biz maqsat qoıýdy, sheshendik ónerdi, nıshany jáne aýdıtorııany tańdaýdy, SMM, kopıraıtıng, taım-menedjment, satý, esepteý, býhgalterlik esep, emosııalyq zııatkerlik, kompıýterlik saýattylyq pen dızaındy úıretemiz", dedi Ásııa Tıkeeva.
Sonymen qatar, psıhologtar áıeldermen jumys isteıdi. Úsh jyl ishinde uıymda 300 adam oqydy.
"Pýt masterstva" QQ júginý arqyly psıhoterapııadan ótip, tabys tabatyn jańa kásipti ıgerýge múmkindik bar.
"Biz toqyma ónerin tegin úıretemiz, onyń kómegimen bizdiń túlekter tabys ákeletin kásipke mashyqtanady. Biz halyqtyń áleýmettik osal toptarynan shyqqan múmkindigi shekteýli adamdarmen, erekshe qajettilikteri bar balalar analarymen tegin jumys isteımiz", dedi Qoǵamdyq qordyń basshysy Rahıma Muqysheva.
Olar úshin toqý tek tabys kózi ǵana emes, sonymen qatar stresti jeńý tásiliniń biri. Ásirese, bul sabaq kóbine pandemııa kezinde oıdy bólýge jaqsy kómektesti deıdi uıym ókilderi. ÚEU 2019 jyldyń jeltoqsan aıynda ashyldy jáne osy ýaqyt ishinde 100 adamdy toqyma ónerine úıretti.
Buǵan deıin habarlanǵandaı, elordada tegin quqyqtyq, psıhologııalyq jáne medıtatıvtik kómek alýǵa múmkindik beretin 20-ǵa jýyq ÚEU jumys isteıdi. Jalpy alǵanda Nur-Sultanda 2996 úkimettik emes uıym tirkelgen. Ideıany jobaǵa aınaldyrý, ony iske asyrý úshin belsendilerge Azamattyq bastamalar ortalyǵynda aqparattyq qyzmetter, sondaı-aq quqyqtyq jáne qarjylyq máseleler boıynsha keńester beriledi.
