Onlaın formatta ótken chempıonattyń jabylý saltanatynda Shymkent qalasy ákiminiń birinshi orynbasary Shyńǵys Muqan jeńimpazdardy quttyqtady.
"Memlekettiń turaqty damýynyń negizi – básekege qabyletti jastar. Memlekettik baǵdarlamalar jastardy jumyspen qamtyp qana qoımaı, biliktiligin arttyrýǵa, jańa mamandyqtardy ıgerýge, osy zamanǵy tehnıka quraldaryn sheber meńgerýine barynsha jaǵdaı jasap otyr. Elimizde WorldSkills qozǵalysyn damytýǵa erekshe mán berilýde. Aımaqtyq kezeńde top jarǵandar alda respýblıkalyq, halyqaralyq syndarda da abyroı bıiginen kórinetinine senim zor", – dedi Shyńǵys Jumabekuly.
"WorldSkills Shymkent-2020" ulttyq chempıonattyń aımaqtyq kezeńine 30 quzyrettilik boıynsha 92 úmitker qatysyp, baq synady. Atap aıtqanda, Jeńil ónerkásip jáne servıs kolledji, M.О́tebaev atyndaǵy joǵary jańa tehnologııalar kolledji, Polıtehnıkalyq kolledj, Jol-kólik kolledji, Á.Qasteev atyndaǵy óner jáne dızaın kolledji shákirtteri úzdik nátıje kórsetip, 1 Dárejeli dıplom ıegeri atandy.
Jeńimpazdarǵa 70 myń, júldeli II oryn ıegerlerine 50 myń, III oryn ıegerlerine 25 myń teńge kóleminde sertıfıkattar men dıplomdar tabys etildi.
