Uly Abaıǵa arnalǵan iri sharalardyń qatarynda Pedogogıkalyq ǵylymdar akademııasy QR Aqparat jáne qoǵamdyq damý mınıstrligi jáne "Azamattyq bastamalardy qoldaý ortalyǵynyń qoldaýymen zamanaýı ádebıet pen jýrnalıstıkany keńinen nasıhattaý, jas jazýshylar men aqyndardyń shyǵarmashylyq áleýetin kóterý maqsatynda Abaıdyń 175 jyldyǵyna arnalǵan "Múshaıra" respýblıkalyq baıqaýynyń óńirlik irikteý týry ótti.
Mańǵystaý oblysy boıynsha aqyndar men jazýshylardyń qatysýymen ótken múshaıraǵa 30 úmitker qatysty. Abaı Qunanbaevtyń sol zamandaǵy ishki jan-kúıin sezingen qatysýshylardyń arasynan úzdikterdi iriktep alý qıynǵa soqty. Ádil qazylar Yessenov University professory, ádebıettanýshy ǵalym, "Abaıtaný" pániniń oqytýshysy, fılologııa ǵylymdarynyń kandıdaty Qabylov Ádilet, Qazaqstan Jazýshylar odaǵynyń múshesi, jazýshy, ólketanýshy Otynshy Kóshbaıuly, aqyn, respýblıkalyq músháıralardyń jeńimpazy Jaılaýov Baqtybaı jazý stılindegi saýattylyq pen erekshelikke asa mán bere otyryp, óleńderdiń oılary tunyq, parasaty bıik, mazmuny tereń, tili qunarly, kórkemdigi shuraıly bolýyn qadaǵalap, Abaı tulǵasyn asqaqtata jyrlaýdy basty nazarda ustady.
"Zamanynda qazaq qoǵamynyń batyl synshysy bola bilgen oıshyl aqyn Abaı atasyna óleń arnaı otyryp, búgingi zaman máselelerin de baılanystyra jyrlaǵan jastar sany jeterlik. Atap aıtqanda, Aqtaý qalasy, Túpqaraǵan aýdany, Jańaózen qalasynyń kolledj stýdentteri men Yessenov University bilim alýshylary. Oryn sany shekteýli bolǵandyqtan ǵana úsh úmitkeririktep alynǵan edi. Shohaev Mustafanyń "Abaı sózi – Abaı shyńy ar degen" Dúısenov Naýryzbektiń "Abaıǵa arnaý, Orynbasar Azamattyń "Qalyń elim, qazaǵym, qaıran jurtym", "Abaı" atty shyǵarmalary daralanyp, irikteý týrynan ótip, respýblıkalyq dodaǵa tústi. "El ishi – óner kenishi" degendeı, respýblıkamyzdyń ár óńirinen qatysyp jatqan jas aqyndardyń jaqsy óleńderin jınap, toptastyryp, kitap etip shyǵarsa, Abaı aqynnyń 175 jyldyǵyna qosylǵan úles bolar edi", deıdi Sh.Esenov atyndaǵy KMTIÝ, Qazaq fılologııasy kafedrasynyń meńgerýshisi Mańǵystaý oblysynyń óńirlik uıymdastyrýshysy Aqmaral Otarova.
