Máselen, byltyr Gagarın kýbogy jolyndaǵy básekede alǵashqy kezeńde Magnıtogorskiniń «Metallýrg» klýbyn 4:1 esebimen jeńip, jarys jolynan shyǵaryp jibergen-di. Ekinshi aınalymda Sibirdiń «Sıbır» komandasymen baq synaýy kerek bolatyn. Alaıda koronavırýs pandemııasyna baılanysty búkil jarystar toqtatylyp, QHL tarıhynda birinshi ret jeńimpaz komanda anyqtalǵan joq.
О́kinishke qaraı, bıyl «Barystan» byltyrǵydaı qarqyndy baıqaı almaı otyrmyz. Jerlesterimizdiń bıylǵy týrnır kestesinde joǵary orynnan kórinýi bylaı tursyn, tipti úzdik 8 klýbtyń qataryna iline almaı qalama degen kúdik basym bolyp tur. Biraq sol kúdikti «Barystyń» keıingi eki jeńisi az bolsa da seıiltkendeı. Áıtpese jeńilisten kóz ashpaı kele jatqan komanda óz oıynyn endi tapqandaı. Elordada ótken alǵashqy básekede «Barys» Qytaıdyń «Kýnlýn» komandasynan 2:1 esebimen basym tússe, keıinnen Rıganyń «Dınamosynyń» qaqpasyna jaýapsyz úsh shaıba soqty.
Bıylǵy maýsymnyń sátsizdigine mamandar ártúrli boljam jasap jatyr. Máselen, biri byltyr komandany órge súıregen birqatar hokkeıshiniń komandadan ketkeni jáne olardyń ornyn basatyn laıyqty oıynshylardy almaǵannyń zardabyn tartyp jatyr deıdi. Tipti eks-bas bapker Andreı Skabelkanyń da komandadan ketýi «Barystyń» oıynyna keri áserin tıgizgeni de jankúıerler arasynda aıtylýda. Sondaı-aq keı mamandar pandemııaǵa baılanysty komandanyń daıyndyǵy az bolǵanyn da alǵa tartyp jatyr.
Maýsym bastalǵaly beri «Barys» Shyǵys konferensııasynda búginge deıin 18 kezdesý ótkizip úlgerdi. Qazirgi kezde 20 upaımen 10-orynda kele jatyr. Iýrıı Mıhaılıs shákirtteri onyń ishinde 9 matchty óz aıdynynda ótkizgen, 9 oıynda qonaqqa barǵan. Qazaqstan komandasy osy aralyqta qarsylas qaqpasyna 41 shaıba soǵyp, óz qaqpasyna 46 shaıba ótkizip alǵan. Árıne, salystyrmaly túrde alyp qaraıtyn bolsaq, bul jaqsy nátıje emes. Shaıba soǵý kórsetkishi boıynsha ortasha eseppen ár oıynǵa 2 shaıbadan keledi. Elordadaǵy 9 oıynda qarsylastar qaqpasyn 22 ret nysanaǵa alsa ( bir oıynda – 2,44), ózderi 23 gol (2,55) jibergen. Syrttaǵy matchtarynda shabýylshylardyń da, qorǵaýshylardyń da nátıjeleri kóńil kónshitpeıdi. 9 oıynda 19 shaıba soǵyp (1,1), ózderi 23 shaıba (2,55) ótkizip alǵan.
27 jastaǵy qorǵaýshy Darren Dıs – «Barystyń» kórinbeıtin kóshbasshysy. Qazaqstan azamattyǵyn alǵan kanadalyq hokkeıshi óziniń shebindegi oıynshylardan nátıjeligimen alda tur. Tipti kóptegen shabýylshy Dıs sekildi kórsetkishimen maqtana almaıdy. Ol 17 oıynda qarsylastar qaqpasyna 8 shaıba soǵyp, 2 ret áriptesteriniń kózge túsýine jaǵdaı jasaǵan. Paıdalylyq koefısıenti jaǵynan Dıs tek «Barystaǵy» ǵana emes, lıgadaǵy úzdikterdiń biri.
Darren qorǵaýshy-bombardırler arasynda 10 upaımen ekinshi orynda keledi. Úzdikter kóshin 16 (8-8) upaımen Mıkkotek Lehtonen («Iokerıt») bastap tur. Sondaı-aq Dıs – «Barys» sapynda aıdynda eń kóp ýaqyt ótkizetin hokkeıshi. Ortasha eseppen bir matchta 24 mınýttaı aıdynda bolady.
Komandalyq oıynda shabýylshylarǵa qaraǵanda, qorǵaýshynyń gol soǵatyny maqtanarlyq nátıje emes. Biraq komandany alǵa súıreıdi degen shabýylshy legıonerler jarytpaı jatqanda, qorǵaýshylardyń shaıba soǵýy da zańdylyq shyǵar. Máselen, bıyl ǵana «Barystyń» jeıdesin kıgen shvesııalyq Iаkob Lılıa muzaıdynǵa 17 márte shyǵyp, qarsylastar qaqpasyn nebári 5 márte dál kózdegen. Sondaı-aq byltyr «Ak Bars» quramynda óner kórsetip, bıyl «Barysqa» qaıta oralǵan kanadalyq shabýylshy Mett Frettın 18 oıynda eki shaıba soqqan. Ol eki golyn da keıingi eki oıynda soqqanyn eskersek, kanadalyqtyń oıyny júre bastaǵan syńaıly. Qazirgi tańda komandadaǵy shabýylshylardyń arasynda eń nátıjeli oıyn kórsetip kele jatqan – Nıkıta Mıhaılıs. 18 oıynnyń barlyǵynda muzaıdynǵa shyqqan jerlesimiz qarsylas komandalardyń qaqpasyn 7 márte dál kózdegen. Sonymen qatar eki ret áriptesterine nátıjeli pas asyrǵan. Keıingi oryndarda Roman Starchenko men Kertıs Volk tur. Ekeýi de tórt shaıba soqqan.
Bas bapker Iýrıı Mıhaılıstiń qorǵaýshylarǵa da, shabýylshylarǵa da kóńili tolmaıtyny anyq. Sondyqtan ol jańa jylǵa deıin komanda quramynyń tamyryna qan júgirtý úshin bir shabýylshy jáne bir qorǵaýshy aldyrtty. «Barys» klýbynyń baspasóz qyzmeti 30 qazanda 29 jastaǵy kanadalyq shabýylshy Fılıp Varone men 2 qarashada 25 jastaǵy taǵy bir kanadalyq qorǵaýshy Dıllon Heterıngtonmen kelisimshart jasalǵanyn habarlady. Qazirshe eki oıynshy da pandemııaǵa baılanysty Qazaqstanǵa kele almaı otyr.
«Barys» komandasy aldaǵy bes oıynnyń úsheýin syrt aıdynda, ekeýin «Barys Arenada» ótkizedi. Qazaqstanda ótken oıyndarǵa qaraǵanda, «Barys» úshin syrttaǵy oıyn qıyn bolǵaly tur. Máselen, jeksenbi kúni jerlesterimiz Batys konferensııasynda tórtinshi orynda turǵan Cherepoveskiniń «Severstalimen» kezdesse, eki kúnnen keıin úshinshi oryndaǵy Iаroslavldiń «Lokomotıv» klýbymen baq synaıdy. Al 12 qarashada Nıjnekamskide «Neftehımıktiń» qonaǵy bolady. Eger osy úsh oıynnyń ekeýinde jeńiske jetip, eloradada «Dınamo» Mınsk pen Magnıtogorskiniń «Metallýrg» klýbtarynan upaı alatyn bolsa, jerlesterimiz úzdik segizdiktiń qataryna enetini sózsiz.
