Tanymal sýreshi-monýmentalıst Mıhaıl Antonıýktiń keskindemelik muralarynyń arasyndaǵy «Zamanalar jalǵastyǵy» degen bul kartınanyń qasynan eshkim beı-jaı ótip ketpeýi kerek der edik. Tutas ulttyń tragedııasyn keıýana kózderimen aıtýdyń ózi azamattyq berik ustanymdy ańǵartady. Sýretshige súısinbeske shara joq. Keskindeme tarıhyn bilgende alash taǵdyrynyń aqtańdaq jyldaryn ashyq kórsetken óner ıesine taǵy razy boldyq.
HH ǵasyrdyń 30-shy jyldary jappaı qyrylǵan qazaq tragedııasy qandaı shyǵarmashylyq ıesin bolsyn qasiret shektirmeı qoımaıdy. Bul qylqalam sheberi de atalǵan apatty óziniń shyǵarmashylyq zerthanasynda aınalyp ótpepti. О́tpeýine jáne eń úlken sebep – sýrettegi keıipker keıýanany avtor jeke tanyǵan. Keskindemede kórinip turǵandaı, bul ananyń kózindegi kisi shoshyrlyq úreıdiń ar jaǵynda asharshylyq jyldary óziniń balalary men jaqyndaryn joǵaltqan qalyń qaıǵy jatyr. Qylqalam sheberin bul taqsyret qatty qınaıdy. Alaıda qart ana júregindegi ystyq meıirim keıin kórshi aýyldaǵy jetim qalǵan balalardy qamqorlyǵyna alyp, ashtan ólýden saq-
tap qalypty. Qart ana ájimderindegi qasiret tabymen sýretshi osy oqıǵany aıtqysy kelgen. Qaıǵy men kóz jasynan bozaryp ketken kózderde kúlli qazaq halqynyń muńy men zarynyń tereń arnasy bar. Sýretshi aldyńǵy planǵa aýyr eńbekten eti qashqan, taramys úlken qoldy ádeıi shyǵarǵan.
Antonıýk bul arqyly osy qoldar besikti de terbetti, beınetti de kóterdi, osy qoldar jetim-jesirlerdiń mańdaılarynan da sıpady, qaraly hattardy da ashty, osy qoldar bir úzim nandy da ekige bóldi, osy qoldar bizdi búginge de jetkizdi dep turǵandaı.
