Hromtaý – ónerkásibi men aýyl sharýashylyǵy teń damyǵan ekonomıkalyq áleýetti aýdan. Munda sońǵy jyldary jańa óndiris oryndary ashylyp, aýyldarda áleýmettik ıgilikterge qol jetkizile bastady. Ásirese, avtojoldardy jóndeý oblys ortalyǵy ǵana emes, aýdandarda da qarqyn ala tústi. Magıstraldardy tehnıkalyq qaıta jaraqtandyrý, avtomobıl joldarynyń ótkizý múmkindigin arttyrý, ýaqyt talabyna saı kólik ınfraqurylymyn damytý júıeli júrgizilip keledi.
Hromtaý – ónerkásibi men aýyl sharýashylyǵy teń damyǵan ekonomıkalyq áleýetti aýdan. Munda sońǵy jyldary jańa óndiris oryndary ashylyp, aýyldarda áleýmettik ıgilikterge qol jetkizile bastady. Ásirese, avtojoldardy jóndeý oblys ortalyǵy ǵana emes, aýdandarda da qarqyn ala tústi. Magıstraldardy tehnıkalyq qaıta jaraqtandyrý, avtomobıl joldarynyń ótkizý múmkindigin arttyrý, ýaqyt talabyna saı kólik ınfraqurylymyn damytý júıeli júrgizilip keledi.
Osyndaı iri nysandardyń biri – Hromtaý aýdanyndaǵy Or ózeniniń ústinen salynǵan jańa kópir qurylysy. Bul kópir Kóktaý men Kóktóbe aýyldarynyń arasyn jalǵap tur. Buryn bul eki ortaǵa kóktem men kúzgi laısańda qatynas bolmaı qalatyn. Sondaı-aq, aýdan turǵyndarynyń ǵana emes, osyndaǵy Aqtóbe mys kompanııasy sııaqty iri kásiporynnyń jumysyna da qolaısyzdyq týǵyzyp, jaýyn- shashyndy kúnderi qatynas úzilip qalatyn. Bul másele jaqynda oń sheshimin tapty. Respýblıkalyq bıýdjetten bólingen 419 mıllıon teńgege turǵyzylǵan kópirdiń ashylý saltanatyna qatysqan oblys ákimi Arhımed Muhambetov kólik ınfraqurylymyn jaqsartý oblystyń damýyna yqpal etetinin jetkizdi.
– Elimiz jyl ótken saıyn órkendep, damyp keledi. Bizdiń oblystyń da áleýmettik-ekonomıkalyq jaǵdaıy jaqsara túsýde. Munyń barlyǵy Elbasy Nursultan Nazarbaevtyń sarabdal saıasatynyń nátıjesi deý oryndy. Osy kópirmen birge 29 shaqyrym Samara – Shymkent – Aqqudyq avtojolyna qatty jamylǵy tóseý jumystary aıaqtaldy. Bul jumysty Aqtóbe mys kompanııasy júzege asyrdy. Aldaǵy jyly qalǵan 20 shaqyrymyn asfalttaýdy da osy kompanııanyń kúshimen atqarý kózdelýde, –dedi oblys basshysy kópirdiń saltanatty ashylýynda sóılegen sózinde.
Aýyl turǵyny Turar Batyrov ta osyndaı ıgilikti isti Elbasy Nursultan Nazarbaevtyń kóregendik saıasatymen sabaqtastyrdy. Jańa kópirdiń paıdalanýǵa berilýi aýyldyqtardyń biraz tirligin jeńildetkenin jetkizdi, kórshiles aýyldarmen qatynastyń jaqyndaı túskenin tilge tıek etti. Oblys ákimi Arhımed Muhambetov pen aýyl turǵyny Turar Batyrov jańa kópirdiń lentasyn qıdy. Aýyl aqsaqaly Sertaı Dosanalın batasyn berdi.
«Qazdorqurylys» JShS bas merdigeriniń joba jetekshisi Bolat Qosalıevtiń aıtýynsha, kópir qurylysy jospardaǵy on bir aıdyń ornyna alty aıda salynypty. Jańa nysannyń osynshama tez merzimde bitýine jaz aılarynda qurylysshylardyń eki aýysymda qarqyndy jumys isteýi sebepshi bolypty. Kópirdiń uzyndyǵy 173 metr, eni 7 metr. Munda paıdalanylǵan materıaldardyń barlyǵy qazaqstandyq mazmunǵa ıe.
«Jol – ekonomıkanyń kúre tamyry» dep beker aıtylmasa kerek. Sońǵy úsh jylda jol qurylysyna, ony kútip ustaýǵa jáne jóndeýge 18 mıllıard teńgeden astam qarjy bólingen eken. Tek bıyldyń ózinde bul maqsatqa 8 mıllıard teńgeden astam qarjy qaralǵan. Sonyń 76 paıyzy jergilikti bıýdjettiń úlesinde.Ústimizdegi jyldyń aıaǵyna deıin taǵy da 55 shaqyrym jol jóndelip, úsh jańa kópir iske qosylady dep kútilýde.
О́ńir basshysy Arhımed Muhambetov atbasyn burǵan Maıtóbe aýylynda da aqjarylqap qýanyshtyń lebi esip turdy. Oblys ákimi aýylǵa tartylǵan gaz qubyryn iske qosyp, maıtóbelikterdiń ystyq yqylasyna bólendi. Kógildir otynnyń ıgiligin kórýge qoldary jetken aýyl turǵyndarynyń kóńilderi kóterińki ekeni júzderinen ańǵarylady.
Maıtóbe aýylyna tartylǵan jáne aýyl ishilik gaz qubyry oblys ákimdigimen jasalǵan memorandýmǵa sáıkes Aqtóbe mys kompanııasy bólgen 224,8 mıllıon teńge qarjyǵa salynǵan. Endi osy aýylda turatyn 104 shańyraq ot jaǵyp, kúl shyǵarmaıdy, kógildir otynnyń ıgiligin kóredi.
– Búgingi bul turmystyq ıgilik Elbasy tapsyrmasynyń oryndalýynyń naqty kórinisi. Maıtóbege gaz ákelý kópten sheshimin tappaı kelip edi, mine, búgin sáti tústi. Gaz qubyrynyń uzyndyǵy on shaqyrymnan asady. Gaz qubyry qurylysyna kerekti qarjyny túgeldeı Aqtóbe mys kompanııasy moınyna aldy. Buryn otynnyń qaı túrin paıdalansa da olar mektepter men balabaqshalarǵa gazǵa qaraǵanda jeti ese qymbatqa túsetin. Endi arzan kógildir otyndy paıdalanady. Munyń ózi turmysymyzdyń ýaqyt ótken saıyn jaqsara túskenin ańǵartady. Iаǵnı, isimizde ilgerileý bar, ekonomıkamyz nyǵaıa tústi. Bul baǵytta alda da júıeli jumys júrgiziletin bolady. Aýdandardy gazdandyrýdy eki baǵytta júrgizýdi qolǵa alyp otyrmyz. Birinshi baǵyt boıynsha bıýdjetten qarjy bólinse, ekinshi baǵyt boıynsha «Kórkeıe ber, týǵan jer!» aksııasy aıasynda iri kásiporyndar men shaǵyn jáne orta bıznes nysandary aýyldarǵa gaz jetkizýge atsalysýda, – deı kelip oblys ákimi Arhımed Muhambetov aýyl turǵyndaryn qaýynyshty sátterimen quttyqtady. Ol gaz taratý beketiniń tetigin burap, gaz jiberý qurylǵysyn iske qosty. Aýyl aqsaqaly Qýanysh Áıtemǵulov bata berip, aqjaýlyqty ájeler shashý shashty.
Sóıtip, Hromtaý aýdanyndaǵy eki aýylda bir sátte qos qýanysh boldy. О́ńir basshysy jumys saparyn Hromtaý qalasynda jalǵastyryp, negizinen monoqalalardy damytý baǵdarlamasy aıasynda jasalyp jatqan jumystarmen tanysty. Qala joldaryn jóndeý, sport alańdaryn salý, kóshelerdi jaryqtandyrýǵa nazar aýdardy. Atqarylǵan aýqymdy jumystardy atap óte otyryp, aldaǵy ýaqytta sheshimin kútken sharýalardy da nazardan tys qaldyrmady. №4 orta mektep aýlasyndaǵy jańadan ashylǵan sport alańynda monoqalalar baǵdarlamasy boıynsha granttardy jeńip alǵan kásipkerlermen kezdesti.
Satybaldy SÁÝIRBAI,
«Egemen Qazaqstan».
Aqtóbe oblysy.
