Kásipkerlik áleminiń beımálim qyr-syry kóp. Bálkim bul jerde táýekel etip tas jutýdyń reti kele bermeýi de múmkin. Oıǵa alǵan jumysyn órge bastyrý úshin eń aldymen kásipkerliktiń alǵashqy álippesin muqııat oqyp, kóńilge toqyp alǵan jón. Aýdanda «Bıznes Bastaý» jobasy boıynsha is tetigin úıretetin kásipkerlik kýrstarǵa 208 adam jiberildi. Olardyń 168-i sertıfıkat alyp, granttyq qarjylandyrýǵa ótinish bildirgen.
– Memleket tarapynan óz isimdi bastaımyn, kásibimdi dóńgeletip, nesibemdi molaıtamyn degenderge tamasha jaǵdaı jasalýda. Bıyl bizdiń aýdanǵa 35 grant bólindi, onyń 34-i berildi. Jumys isteımin degen adamdar kóp bolǵandyqtan, qosymsha qarajat qajet bolyp, taǵy da 15 adamǵa memlekettik grant beriledi dep kútip otyrmyz, – deıdi aýdandyq jumyspen qamtý ortalyǵynyń mamany Baqytjan Esmýrzına.
Aýdandaǵy alǵa umtylǵan adamnyń biri – 8 balanyń anasy Marta Qaısar. Ol grant arqyly eki birdeı jańa tigin mashınasyn satyp alypty. Burynnan is tigýge ıkemi bar kásipker bir jyldan beri shaǵyn tigin sheberhanasynda ártúrli tapsyrystar qabyldap, is tige bastaǵan. Negizinen, kıim-keshek, úı turmysyna qajetti jabdyqtar tigýmen aınalysady. Aýdanda bul salada buryn-sońdy halyqtyń qajetin oryndaıtyn oryn kóp bolmaǵandyqtan, kelip buıymtaıyn aıtýshylar qatary az emes. Tikken zatynyń sapasy jaqsy bolǵandyqtan, birte-birte el qulaqtanyp, dúmep kele bastaǵan. Marta Qaısardyń aıtýyna qaraǵanda, tiginshilik óner tańsyq dúnıe emes. Tek is aýqymyn keńeıtýge qarajattyń tapshylyǵy qolbaılaý bolyp kelgen eken. Endi mine memlekettik baǵdarlama qoltyǵynan demep, isine bereke berýde.
– Otbasymyz úlken bolǵan soń tigin mashınalaryn alýdyń reti kelmeı júr edi. Memleket tarapynan dál osyndaı qamqorlyq kórsetilýi óte oń boldy, – deıdi ol.
Bıyl aýdandaǵy kásipkerler 18 mln teńgeden asa grant alǵan. Olardyń árqaısysy ártúrli salada óz kásipterin dóńgeletip, bıznes áleminde nyq qadam basýda. Biri mal baqsa, ekinshisi mal ónimderin uqsatyp, saýda sórelerine shyǵarýda. Osy oraıda, memlekettik baǵdarlamalardyń septigi tıip turǵanyn aıryqsha aıta ketýge ábden bolady.
Aqmola oblysy,
Bulandy aýdany
