Joba bastamashysy Sanguis kompanııasynyń dırektory Qarlyǵash Sydyqova zerthananyń áleýmettik baǵytta jumys isteıtinin aıtady. Memlekettik tapsyrystar qabyldaýǵa da daıyn kórinedi.
– Baǵalar halyqtyń barlyq toby úshin qoljetimdi bolady. Memleket bizge ǵımarat berdi, onda biz jóndeý jumystaryn júrgizdik, Siemens jáne Beckman Coulter sııaqty álemdik óndirýshilerdiń zamanaýı jabdyqtaryn ornattyq. Bizdiń tehnıkamyz klınıkalyq zertteýlerdiń barlyq túrin júrgizýge múmkindik beredi, sondaı-aq bizde tolyq avtomattandyrylǵan PTR zerthanasy bar, – deıdi ol.
Memleket-jekemenshik áriptestigi aıasynda iske qosylǵan zerthanada PTR-testileýden basqa, Siemens analızatory ornatylǵan. Onyń bir ereksheligi ımmýnoglobýlınderdi G jáne M oqshaýlaý arqyly KVI taldaýyn júrgizýge múmkindik beredi. Iаǵnı, koronavırýs ınfeksııasyna jedel test jasalady.
Budan bólek, qýattylyǵy jylyna 800 myń zertteý jasaýǵa jetetin jańa zerthana daǵdyly ımmýnofermenttik jáne barlyq klınıkalyq-dıagnostıkalyq zertteýler júrgize alady.
Taǵy bir jaǵymdy jańalyq, Qaraǵandy oblysyna úsh jyljymaly medısınalyq keshen ákelinip, olar Abaı, Osakarov jáne Jańaarqa aýdandarynyń ortalyq aýrýhanalaryna berildi. Indettiń ekinshi tolqynymen kúreske daıarlyq aıasynda iske asqan bul sharýa alystaǵy aýyldardy medısınalyq kómekpen qamtýdyń aıasyn keńite túseri sózsiz.
Qostanaıdaǵy «SaryarqaAvtoProm» zaýytynda jasalǵan bul kólikterdiń shanaǵy termo, shý jáne diril oqshaýlaǵyshpen, sý ótkizbeıtin edendik jabynmen jabdyqtalǵan. Ishinde qoldy zararsyzdandyrýǵa arnalǵan elektr sorǵy jáne dıspenser bar.
Jyljymaly medısınalyq keshen ornatylǵan arnaıy avtomobıl sıfrly jabdyǵy bar jalpy qabyldaý kabıneti, tájirıbe dárigeriniń aımaǵy, taldaýlardy qabyldaý bólimi, akýsher-gınekolog, fýnksıonaldyq jáne sáýlelik dıagnostıka kabınetteri, dárihana pýnkti sııaqty jeti kabınetten turady. Sondaı-aq kóshpeli keshende rentgen jáne flıýorografııa jasaýǵa bolatyn qorǵasyn bólmesi bar. Múmkindigi shekteýli jandardyń jaǵdaıy da eskerilgen, munda olarǵa arnalyp pandýs-lıft ornatylǵan.
Qaraǵandy oblystyq densaýlyq saqtaý basqarmasy basshysynyń orynbasary Gamal Toqsambaev bul keshenderdiń dárigerlerge, ásirese shalǵaı eldi mekenderdegi mamandarǵa úlken demeý bolatynyn aıtady. Iаǵnı, karantın engizilip, syrtqa shyǵý shektelgen jaǵdaıda atalǵan mobıldi keshender jergilikti jerlerde óz betinshe derbes jumys isteı beredi.
Aıta ketý kerek, bul mobıldi dıagnostıkalyq medısınalyq keshen kóshpeli jaǵdaıda zertteýlerdiń san alýan túrin júrgizýge múmkindik beredi. Mysaly, medısınalyq brıgadalar alystaǵy aýyldarǵa baryp, skrınıng, tekserý jáne kásibı tekserý júrgizýdi iske asyryp, sol jerde qajetti medısınalyq kómek kórsete alady. Al oblys ortalyǵynan jyraqta ornalasqan eldi mekenderdegi aǵaıyn úshin medısınalyq kómektiń mundaı túri aýadaı qajet.
Qaraǵandy oblysy
