Ádebıet • 06 Qarasha, 2020

Ár óleń – bir álem

Aıbergenovtiń esimi Alash aınalasyna ǵana emes, adamzatqa ortaq. Buny biz Tólegenniń tańǵajaıyp jyrlary qaraqalpaq tilinde kitap bolyp jaryq kórdi degen aqjoltaı habardy oqyǵanda oıladyq.

Mıras ASAN

Jaǵymdy jańalyqty aqyn Baýyrjan Babajanuly jetkizdi. «Árman býlaǵy» degen jınaq týraly «Jeti jurt» gazeti súıinshilepti. Áńgimeniń álqıssasyn «Otanǵa, týǵan elge súıispenshiligin, zamandastarymyzdyń rýhanı sezim baılyǵyn, izgi tileý, aq nıetin jarqyrata ashqan jáne qazaq poezııasyna ózindik jańa yrǵaq, tegeýrindi ekpin ákelgen erekshe aqyn Tólegen Aıbergenovtiń bir top óleńderi «Árman býlaǵy» degen atpen qaraqalpaq tilinde kitap bolyp basyldy» dep bastaǵan gazet jańa jınaqtyń Núkis qalasyndaǵy «Bılım» baspasynan jaryqqa shyqqanyn jazypty.

Bul jınaq Tólegen aqynnyń «Arman sapary», «О́mirge saıahat», «Qumdaǵy munaralar», «Men saǵan ǵashyq edim», «Amanat», «Bir toıym bar» sııaqty kitaptarynyń qataryna qaraqalpaq tilinde qattalyp qosylyp otyr.

Atalǵan basylymǵa súıinshi jańalyqty О́zbekstan jýrnalısteri shyǵarmashylyq odaǵy Qaraqalpaqstan bóliminiń basshysy Keńesbaı Reımov habarlapty. Jalpy, qaraqalpaq topyraǵy Aıbergenovke aıryqsha ystyq ekenin bilemiz. Jyrlary qandaı jasyn bolsa, sol naızaǵaılardaı jarq etip ómirden ótken ór aqynnyń óleńderi qaı tilge aýdarsa da qunyn joǵaltpaıdy.

О́le bersin kúnshilder

kúıiginde,

О́z ǵasyrym ózimniń ıinimde.

Aq jańbyrlar tozdyrǵan

taý sııaqty,

Men ólemin ózimniń bıigimde,

– dep jyrlaǵan aqyn eshqashan ólgen emes. Onyń rýhy osyndaı ómirsheń týyndylary barda máńgi tiri. Shaıyrdyń ár kitaby jarqyrap jaryqqa shyqqan saıyn onyń jańa tynysy ashylady. Ár óleńi bir álem biregeı aqynnyń bul kitaby qaraqalpaq jurtynyń qymbat qazynasyna aınalary sózsiz!

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz