Eń kóp júkteletin qosymsha
Instagram – Apple qosymshalar dúkenindegi kóp júkteletin ekinshi qosymsha. Google izdeý júıesindegi eń tanymal ondyqqa kiredi. 2018 jyl Instagram qoldanýshylarynyń sany 10,1% ósti. О́tken jyly ósimi kúrt baıaýlap, 6,7%-dy ǵana qurady. Al bıyl, karantındik sharalarǵa baılanysty kórsetkish 2019 jylmen salystyrǵanda aıtarlyqtaı ósken. Máselen, jyl basynan beri Instagram-dy qoldanýshylar sany mıllıardtan asty.
Jelidegi eń tanymal ári kópshiliktiń súıikti qoldanbasy – Stories. Kún saıyn 500 mln adam 15 sekýndtyq qysqa vıdeolar túsiredi eken.
Instagramdy eń kóp paıdalanylatyn el AQSh bolsa, (110 mln paıdalanýshy), Brazılııa 70 mln qoldanýshymen ekinshi orynda tur. Al Úndistanda – 69 mln, Indonezııada – 59 mln jáne Reseıde 40 mln adam turaqty qoldanýshy eken.
Instagramda halyqty qamtýdyń eń joǵary paıyzy Brýneıde – 60%, Islandııada – 57%, Túrkııada – 56%, Shvesııada – 55% jáne Kýveıtte – 55%. Qazaqstandyqtar da ınstagramdy turaqty paıdalanǵanymen, ázirge elimiz bul reıtıngtegi ondyqqa da kirmeı tur.
Bir qyzyǵy, syrt kózge áıelder qaýymy ǵana ınsta-storı túsirip, kúndelikti lenta jańartyp otyratyndaı kóringenmen, álemdik paıdalanýshylar arasynda erlerdiń úlesi 48% jáne áıelderdiń úlesi 52%-dy kórsetip tur. Demek, paıyzdyq úleste eki jaqty, qoldanýy shamamen birdeı. Al jalpy paıdalanýshylardyń 71%-y – 24 jastan kishi. Al «ınstagramshylardyń» 63%-y kúnine keminde bir ret áleýmettik jelige kirse, 42%-y birneshe ret bas suǵady. Baǵdarlamany tek 16% qoldanýshy ǵana aptasyna bir retten qarap otyrady eken. Qoldanýshylar kúnine orta eseppen ınstagramǵa 28 mınýt jumsaıdy. Bul ótken jylmen salystyrǵanda bir mınýtqa ǵana kóp.
Jarnama alańy
Instagramdaǵy áleýetti tutynýshylar arasynda jarnamanyń qamtylý aıasy – 849,3 mln adam. Bul 13 jastan joǵary qoldanýshylardyń 14%-yn quraıdy. Kórsetkish 2019 jyldyń úshinshi toqsanymen salystyrǵanda, 5,9% ósken. Aı saıyn áleýmettik jelide 2 mln akkaýnt jarnamalanady.
Brendter ınstagram blogerlerine jarnama úshin orta eseppen 100-den 2 085 dollarǵa deıin tóleıdi. Olar beınematerıaldar úshin 114 dollardan 3 138 dollarǵa deıin, al Stories úshin 43 dollardan 721 dollarǵa deıin tóleýge daıyn. Amerıkandyq marketologtar óz bıýdjetiniń 69%-yn ınstagramǵa yqpal etýshilerge jumsaıdy.
2020 jyly áleýmettik jeli jarnamadan 12,32 mlrd dollar tabady. 2019 jyly bul kórsetkish 9,08 mlrd dollardy qurady.
Áleýmettik jelilerdegi jarnama oıyndarǵa ornalastyrýdan 8,3 ese, jumys ústelderindegi jarnamalardan 5,4 ese tıimdi. Bir jyl ishinde #ad (jarnama) heshtegimen posttar sany 48% ósti. Stories-te jarnamalaıtyn marketologtardyń 96%-y muny aldaǵy 6 aıda jalǵastyrýdy josparlap otyr.
Instagram kontentin kimder jasap otyr?
Áleýmettik jelide akkaýnty bar kez kelgen adam úshin ony qandaı kontentpen toltyrý mańyzdy. Instagram alǵashqy jyldardan beri qoldanýshylardan kontenttiń asa sapaly bolýyn talap etpegennen keıin de qoldanýshylarynyń sany azaımaıdy. Máselen, ınstagram tarıhynda eń kóp laık jınalǵan post – jumyrtqanyń sýreti. 54 mln laık jınaǵan jarııalanym aınalasy birneshe kúnniń ishinde akkaýnt ıesin mıllıoner atandyrǵan. Al álem boıynsha kún saıyn ınstagramǵa 95 mln jazba júkteledi. Taǵy bir aıta keterligi, ınstagram paıdalanýshylarynyń qarapaıym jazbalary tanymal brendterdiń jarııalanymdaryna qaraǵanda kóbirek oqylady eken.
Instagram – qazirgi ýaqytta eń mańyzdy ári eń tanymal jarnama alańy. Kózin tapqan adamǵa tıimdi bıznes orta ekeni de aıtylyp keledi. Dese de on jylda oń ózgeristerge bet burǵan bul áleýmettik jeli úshin zertteýshi mamandar alda úlken qaýip baryn da jasyrmaıdy. Instologtardyń paıymynsha, endi jarnama arqyly tabys tabý qıyndaıdy. Bul jańa qoldanýshylardyń jarnama aǵymyna ilese almaýymen baılanystyrylyp otyr. Jalpy, basqa balamalardyń kóbeıýine baılanysty, aldaǵy ýaqytta Instagram qoldanýshylardyń ósimi baıaýlaıdy degen de boljam bar. Biraq platforma eń tıimdi onlaın-jarnamalyq arnalardyń biri bolyp qala bermek.
