Jazdaǵy jaǵdaı óńirdiń medısınasyndaǵy kemshilikterdi ashyp qana qoımaı, sondaı-aq dárigerlerdiń de adam ómirin qutqarýdaǵy orasan zor eńbegin kórsetti. Kóktem-jaz aılarynda aqtóbelik 3250 turǵyn COVID-19- ke shaldyǵyp, olardyń araynan qaıtys bolǵandar da bar.
6 qarashadaǵy málimet boıynsha, Aqtóbe oblysynda 2 turǵyn koronavırýsqa shaldyqsa, pnevmonı dıagnozymen 4 naýqas tirkelgen. Osy 6 naýqas shekara baqylap-ótkizý beketterinen ótkende dene qyzýy joǵary bolyp, birden aýrýhanaǵa jiberilgen.
Bulardyń bári de Reseı Federasııasynan kelgen oblys turǵyndary.
Dári-dármek tapshylyǵy, indetke daıyndyqtyń nasharlyǵy, kovıd kezinde «Ana óliminiń 13 esege artýyna» baılanysty jergilikti atqarýshylyq bılik Memleket basshysynyń qatań synyna ushyraǵany belgili. Ana óliminiń kóbeıýi sebebin Ońdasyn Orazalın bylaı dep túsindirdi: "Byltyr 1, bıyl 14 ana ólimi tirkeldi. О́kinishke qaraı 9 áıel júktilik kezinde kovıdke shaldyǵyp, ómirden ótti. Artynan tekseris júrgizilip, olardy der kezinde baqylaýǵa almaǵan aýrýhana basshylary jaýapqa tartyldy".
Qazir qalalyq jáne aýdandyq aýrýhanalar eki aılyq dári-dármek qorymen toltyryldy. Naýqastarǵa 3600 tósek oryn, reanımasııada 400 tósek-oryn ázirlenip, olar ókpeni jasandy jeldetý apparattarymen jabdyqtalǵan. Investorlar 550 mıllıon teńge qarjy bólip, oǵan Reseı Federasııasynan kovıdke qarsy dári-dármekter alynyp, dárihanalarǵa taratyldy.
Oblys aýmaǵynan Reseı Federasııasynan árli-berli kúnine myńdaǵan kólik ótip jatqandyqtan, shekaranyń arǵy jaǵynan kovıd taratýshylar qaýpi joǵarylap barady. Búgingi kúni "Álimbet" jáne «Jaısań» ótkizý beketterinen syrttan kelgen kez kelgen qazaqstandyqtyń qolynda jaramdylyq merzimi 3-kúnge teń PSR-test bolýy kerek. Kúrdeli másele – oblys aýmaǵynan ótetin tranzıttik kólikterge toqtaý joq. Bul jerde tranzıttik aýyr kólikter júrgizýshilerinde joǵary dene qyzýy baıqalsa, olar týraly málimetter dereý blok-beketterge habarlanady.
