Telearna ujymyn televızııa salasynda qyzmet etken ardagerler, aqparat quraldarynyń ókilderi, óńir basshysy, «Aqtóbe Medıa» JShS dırektory R.Otynshın, Jambyl jáne Mańǵystaý oblystyq telearnalarynyń basshylary – B.Júsip, M.Álibekuly quttyqtap keldi. Oblys ákimi Ońdasyn Orazalın alpys jyldyq asýdy eńsergen telearna ujymyn quttyqtap, alǵys hattar men sertıfıkattar tapsyrdy:
«Osydan 60 jyl buryn «Aqtóbe» telearnasynyń negizi qalanyp, alǵashqy aımaqtyq habarlar efırge shyǵa bastady. Osy jyldar ishinde qalyń jurtshylyqtyń qurmetine bólengen «Aqtóbe» telearnasy oblysymyzdyń rýhanı-mádenı, áleýmettik, saıası-qoǵamdyq qundylyqtarynyń damýyna, ulttyq sana-sezimniń qalyptasýyna qosqan úlesi ólsheýsiz. Zaman talabyna saı oń men solyńdy, aq pen qarany ajyratatyn ultjandy habarlardyń kórsetilýi urpaq sanasyna oı salary anyq. 60 jyl ishinde ár qazaqtyń tórinen oryn alǵan kógildir ekrannan san túrli qundy dúnıeler jaryq kórip, qalyń kórermenge jol tartyp keledi. Osy jyldar ishinde «Aqtóbe» telearnasy zııaly qaýymnyń rýhanı, mádenı oshaǵyna aınaldy. Qara shańyraqta ár jyldary eńbek etken aǵa býyn ókilderi kóptegen jas mamandardy tárbıelep, bolashaqqa baǵyt-baǵdar berip, jol siltedi. О́tkir oı, batyl pikir, tyń bastamalar kóterip, aımaqtyń túrli jańalyqtary men áleýmettiń muń-muqtajyn aıqyn kórsetetin televızııa mektebiniń qalyptasýyna atsalysty», – dedi oblys basshysy.
Búgingi kúni habarlary oblystyń 112 eldi mekenine taraıtyn «Aqtóbe» telearnasynyń qazirgi zamanǵa laıyq sońǵy úlgidegi tehnıkalarmen jabdyqtalǵan 5 stýdııasy bar.
Sondaı-aq sońǵy jyldary telearnanyń shyǵarmashylyq ujymnyń rýhanı-mádenı, áleýmettik, saıası-qoǵamdyq máselelerdi kótergen ózekti baǵdarlamalary, suhbattary, avtorlyq habarlary men derekti fılmderi óńir turǵyndarynyń júreginen jol taýyp júr.
AQTО́BE
