Almaty ákimi B. Saǵyntaev Instagram-daǵy óziniń paraqshasynda "Nurly jer" baǵdarlamasy boıynsha salynyp jatqan kóppáterli turǵyn úı keshenderi qurylystarynyń barysy týraly aıtyp berdi.
"Turǵyn úı qurylysynyń qarqyny jaqsy. Jyl qorytyndysy boıynsha barlyq baǵyt boıynsha 2 396 myń sharshy metr turǵyn úıdi tapsyrý josparda bar. Bul 2019 jylǵa qaraǵanda 300 myń sharshy metrge artyq", - dep jazdy megapolıs ákimi.
Onyń aıtýynsha, "Jańa Almatyda" aýqymdy qurylys bastaldy. Naýryzbaı aýdanynda "Nurly jer" baǵdarlamasy boıynsha 217 840 sharshy metrdi quraıtyn 127 kóppáterli "Alma City" turǵyn úı kesheni salynýda. Aǵymdaǵy jyly - 100 úı, kelesi jyly qalǵandary paıdalanýǵa beriledi.
Jyl sońyna deıin aýdany 27 371 sh.m. bolatyn "Nurly dala" TK-da 8 úı tapsyrylady. Alataý aýdanynda aýdany 43 620 sh.m. 22 úıden turatyn "Mádenıet" TK salynýda. 16 úı jyl sońyna deıin paıdalanýǵa berilse, qalǵany kelesi jylǵa josparlanǵan. Keshendi túrde boı kóterip kele jatqan yqshamaýdandarda áleýmettik maqsattaǵy nysandarǵa mán berilýde.
Jalpy, 2020 jyly 2 396 myń sharshy metr turǵyn úı salý josparlanǵan, onyń ishinde kommersııalyq - 1 591 myń sharshy metr nemese 17 420 páter, memlekettik bıýdjet esebinen - 290 myń sharshy metr nemese 5 206 páter, jeke turǵyn úı qurylysy - 510 myń sharshy metr nemese 2062 úı, jataqhanalar - 4,6 myń sharshy metr.
Budan ózge, Almaty ákimi mektep qurylystarynyń qarqynyn tekserdi. О́ıtkeni, qala turǵyndary kóteretin ózekti máseleniń biri – mektepterdegi oryn tapshylyǵy. Áýezov aýdanynyń Jetisý-2 yqshamaýdanyndaǵy №117 mekteptiń janynan 900 oryndy qosalqy nysan salynýda. Al, Naýryzbaı aýdanyndaǵy №186 mektep janynan 513 oqýshy oryndy nysan salynýda ári 120 oryndy balabaqsha boı kóterýde.
"Jalpy kelesi oqý jylynyń basynda mektepterge japsarlas salynatyn 8 818 oryndy 17 qosymsha qurylys nysanyn tapsyrýdy josparlap otyrmyz. 2021 jyldyń sońyna deıin Alataý, Naýryzbaı, Túrksib aýdandarynda 12 600 orynǵa arnalǵan 8 mektep ashylady", - dep jazdy B. Saǵyntaev.
Sonymen qatar, qala ákimi Qalqaman yqshamaýdandaǵy qurylys alańynda boldy, munda №7 qalalyq aýrýhananyń 48 tósek-oryndyq qabyldaý bóliminiń jańa korpýsy salynýda. Almaly aýdanyndaǵy Sán jáne dızaın kolledjiniń janynan salynǵan 80 oryndyq qosalqy nysannyń qurylysy aıaqtaldy.
"Salynyp jatqan barlyq nysandardaǵy jumystyń sapasyn baqylaýǵa alýdy jáne olardy merziminde paıdalanýǵa berýdi tapsyrdym. Aýlalardyń, kire beris joldardyń abattandyrylýy jáne zamanaýı qurylǵylardyń jetkizilýi basty nazarda bolýy tıis", - dep atap ótti Almaty ákimi B. Saǵyntaev.
