Joǵarǵy sottyń sýdıasy Irına Kalashnıkova el sýdıalarynyń VIII sezine qatysýshylardyń nazaryna sýdıalarǵa arnalǵan eki jınaqty usyndy. Bul jınaqtar bıyl Joǵarǵy sot pen amerıkalyq zańgerler qaýymdastyǵynyń quqyq ústemdigi bastamasy aıasynda daıyndalypty. Jıynda sóz alǵan I.Kalashnıkova zııatkerlik menshik salasyndaǵy qazirgi zamanǵy quqyqtyq qatynastardy kóptegen zańnamalyq jáne normatıvtik quqyqtyq aktilermen, sonyń ishinde halyqaralyq quqyq normalarymen jáne iskerlik aınalym daǵdylarymen reglamenttelgen kúrdeli jáne kóp qyrly sala dep atady. Osy daýlardy qaraý, olar boıynsha sheshim qabyldaý belgili bir qıyndyq týdyrady.
О́tken jyly atalǵan yntymaqtastyq sheńberinde qazaqstandyq sýdıalar zııatkerlik menshik salasyndaǵy, sonyń ishinde ınvestorlardyń quqyqtaryna qatysty daýlardy sheshý jónindegi halyqaralyq tájirıbeni zerdeleý maqsatynda AQSh-taǵy sottarda boldy. Sonyń nátıjesinde biz tilge tıek etip otyrǵan osy eki jınaq ázirlenipti. Birinshisi – Qazaqstan zııatkerlik menshikti qorǵaý boıynsha sot isterin qaraý jónindegi ádistemelik usynymdar jınaǵy. Ony I.Kalashnıkova jáne Dentons fırmasynyń zańgeri Natalıa Shapovalova ázirledi. Onda talap qoıý túrleri, talap-aryzǵa qosa beriletin qujattar tizbesi, daýlardyń vedomstvolyǵy men sottylyǵynyń erekshelikteri keltiriledi. Sonymen qatar jınaqta taraptar men zańnyń quqyqtyq qatynastaryn, anyqtalatyn jáne dáleldenetin faktilerdi, tikeleı dáleldemelerdi anyqtaý máselesi baıandalady. Avtorlyq quqyq jáne taýar belgilerin qorǵaý salasyndaǵy daýlar boıynsha sot isin júrgizýdiń erekshelikteri kórsetilgen. Jınaqta qujattar men sot aktileriniń úlgileri bar. Ekinshisi – zııatkerlik menshikti qorǵaý týraly daýlar boıynsha sot sheshimderin qurastyrýdyń kómekshi quraly. Basylymdy «Dentons» fırmasynyń aǵa zańgeri Álııa Seıitova daıyndap otyr. Nusqaýlyqta sheshimder shyǵarý, taraptardyń quqyqtyq qatynastaryn jáne naqty daýdy sheshýde qoldanylatyn quqyq normalaryn anyqtaý boıynsha usynystar keltiriledi.
Eki jınaq ta Joǵarǵy sotta maquldandy. Oblystyq sottarǵa jiberildi. Sondaı-aq bul jınaqtar elektrondy formatta da qoljetimdi. I.Kalashnıkovanyń aıtýynsha, bul jınaqtar sýdıalardyń qyzmetinde paıdaly bolatyn kórinedi jáne daýlardy sapaly sheshýge, materıaldyq quqyqtyq normalardy tıisti túrde qoldanýǵa, turaqty sot tájirıbesin qalyptastyrýǵa yqpal etedi.
