Men 2006 jyly N.Qojanov atty azamatqa ózime tıesili «PAZ» markaly avtokólikti senimhat arqyly satqan edim. N.Qojanov der kezinde atalǵan avtokólikti óz atyna aýdarmaǵan jáne maǵan bul jaıtty eskertpegen. Bul azamatqa meniń atymnan senimhat berilgendigi resmı túrde Ishki ister mınıstrliginiń málimetter bazasynda tirkeýli tur.
Osynyń saldarynan meniń atymda salyq organynda kólik qaryzy jınalyp qalǵan eken. Onyń ózin maǵan salyq organy senimhat merzimi ótken 2009 jyldan bertinge deıin habarlap ta kórgen emes. Keıinirek kezdeısoq bildim. Atalǵan azamatty izdestirip kórsem, Nur-Sultan qalasynda tirkeýde kórinedi. Telefonmen habarlasqanymda, kóliktiń salyq qaryzyn tóleıtin oıy joǵyn aıtyp, birden bas tartty. Onymen sottasý qıynǵa soǵatyn boldy, sebebi ol tirkeýde Nur-Sultanda turǵandyqtan, astanaǵa baryp sottasýǵa nemese zańger jaldaýǵa múmkindigim joq.
Salyq mekemesine qaryzymnyń somasyn azaıtý jóninde joldaǵan hattarym da nátıjesiz boldy.
Eki ret Qazaqstan Prezıdentiniń vırtýaldy qabyldaýyna osy máseleni aıtyp, kómek surap hat joldaǵanymda, birinshi hatyma Qarjy mınıstrliginen kelgen jaýapta: «Qaryzyńyz óndirildi» degen túsiniksiz, jańsaq, jalǵan málimet boldy. Jalǵan deıtinim, salyq organy ol kezde qaryzdyń bir teńgesin de áli menen óndirip almaǵan bolatyn.
15 mamyrda jazǵan ekinshi hatyma Qarjy mınıstrinen 2 maýsymda berilgen resmı jaýapta bylaı delingen:
«Qazaqstan Respýblıkasy Prezıdentiniń tapsyrmasyn oryndaý maqsatynda, jeke tulǵalarǵa qatysty jarııalanǵan salyqtyq raqymshylyqty jalǵastyrý josparlanýda, ol osy jyldyń sońyna deıin jalǵasatynyn habarlaımyz.
Sizben kólik quraldary salyǵy boıynsha negizgi qaryz somasy tólengen jaǵdaıda (negizgi qaryz 207 136 teńge), eseptelgen ósimpul somasyn (ósimpul 122 703 teńge) esepten shyǵarý múmkindigin paıdalaný quqyǵy qarastyrylady».
О́kinishke qaraı, Ekibastuz qalasy boıynsha salyq basqarmasy Prezıdenttiń salyq raqymshylyǵy týraly tapsyrmasyn da, Qarjy mınıstriniń Prezıdenttiń vırtýaldy qabyldaýy arqyly aıtqan sózin de aıaqasty etip, 2020 jylǵy 19 tamyzda meniń qaryzyma qatysty Salyq buıryǵyn (óndirý somasy – 242 myń 486 teńge) shyǵaryp, jalaqymnan májbúrli túrde óndirýge kiristi.
Meniń 2020 jylǵy jeltoqsannyń 31-ine deıin negizgi qaryzdy jabý arqyly aıyppul somasyn joıýǵa múmkindigim bar edi. Salyq organy osy múmkindikti paıdalanýyma resmı buıryqpen tosqaýyl qoıyp otyr. Men salyq organynyń bul áreketin pandemııa kezinde jasalǵan qysym ǵana emes, Prezıdent saıasatyn aıaqasty etý dep qabyldadym. Qıyn kezeńde mekteptegi úsh balamnyń aýzynan jyryp, sot oryndaýshysynyń 25 paıyzdyq qyzmet shyǵynyna aqshamdy jumsamaqpyn.
Baqsam, senimhatpen kólik satyp, men sııaqty opyq jep júrgen adam az emes eken. Kólikti senimhatpen satyp alýshyǵa zańnamalyq turǵyda eshbir shara qarastyrylmaǵan. Iаǵnı bul – zań aıasynda rettelmeı qalǵan másele. Osyny eskerip, men sııaqty adamdardyń qaryzyn 10 jyldap eseptemeı, 5 jyl aıasynda qarastyryp jeńildik jasaýǵa bolmady ma?
Men Qarjy mınıstriniń 2 maýsymdaǵy hatynda atalǵan negizgi soma – 207 136 teńgeniń Ekibastuz qalasy boıynsha salyq basqarmasy shyǵarǵan «Salyq buıryǵynda» 242 486 teńge bolyp shyǵa kelýin de túsinbeı dalmyn. Biri ekinshisine baǵynyshty qos memlekettik organnyń resmı málimetteri nege eki túrli, Prezıdent Ákimshiligine beretin kórsetkishi basqa, menen óndiretin somasy bir bólek?
Ekibastuzdyq mekemeniń Prezıdentimizdiń bizge usynǵan ıgiligin kádege jaratýymyzǵa osynshama qarsylasý sebebin bilsem deımin!
Janargúl QADYROVA,
Ekibastuz qalasynyń turǵyny
Pavlodar oblysy
