Quqyqtyq tártipke qurmet kerek. Sebebi, zańdy bilmeý eshkimdi de zańnyń zaýalynan qutqara almaıdy. Jaqynda Qyzylorda oblysy Jańaqorǵan aýdany prokýratýrasynyń qyzmetkerleri jergilikti turǵyndar arasynda uıymdastyrǵan «Halqym, zańdy bil» atty quqyqtyq sharacy osyny túsindirýge arnaldy.
Quqyqtyq tártipke qurmet kerek. Sebebi, zańdy bilmeý eshkimdi de zańnyń zaýalynan qutqara almaıdy. Jaqynda Qyzylorda oblysy Jańaqorǵan aýdany prokýratýrasynyń qyzmetkerleri jergilikti turǵyndar arasynda uıymdastyrǵan «Halqym, zańdy bil» atty quqyqtyq sharacy osyny túsindirýge arnaldy.
Aıta ketý kerek, atalmysh aksııa azamattardy jeke qabyldaý túrinde emes, jurtshylyqpen kezdesý sıpatynda júrgizildi. Prokýratýra qyzmetkerleri belgilengen eki apta merzim ishinde «Nur Otan» partııasy, quqyq qorǵaý organdary, jergilikti atqarýshy, ýákiletti organdar jáne buqaralyq aqparat quraldary ókilderiniń qatysýymen aýdannyń barlyq eldi mekenderin aralap shyǵyp, jergilikti turǵyndar arasynda atalmysh aksııany ótkizip qaıtty.
Aksııa «Sýnaqata» aýylynan bastaldy. Jıyndy aýyldyq okrýg ákimi Ázııa Qystaýbaeva ashyp, onyń maqsatyn qysqasha túsindirip ótti. Sodan keıin aýdan prokýrory Murat Dosmaǵanbetov sóz alyp, adam quqyqtary men mindetteri jaıly jan-jaqty áńgime qozǵady.
– Árbir adam óziniń quqyqtaryn qorǵaı biletin bolýy kerek. Bul úshin oǵan zańdy bilýdiń mańyzy erekshe, – dedi ol. – Bizde kóp jaǵdaıda azamattardyń zańdy bilmeýshilikteri, sol arqyly quqyqtaryn qorǵaýda qabiletsizdik tanytatyndary olardyń ózine tıesili nárseniń ózine qol jetkize almaýlaryna aparyp soqtyrady. Al qazirgi kezde bizdiń qoǵamda jurt eńbek quqyǵyna baılanysty kóptegen qıyndyqtarǵa tap bolyp jatady.
Aýdan prokýrory óz sózinde sondaı-aq júkti jáne 3 balasy bar áıelderdi jumystan qysqartýǵa bolmaıtynyn aıtty. Alıment alý máselesinde de kóp kúrdelilik joq. Ol erli-zaıyptylar ajyrasqannan keıin, olardan týǵan balalardyń kimniń qolynda qalǵanyna baılanysty belgilenedi. Alımentti balany nemese balalardy baǵýynda alyp qalǵan jaq alady. Mundaǵy bir erekshelik, alıment tóleýge mindetti adam jumyssyz júrgen bolsa, onyń áke-sheshesi, ıaǵnı balalardyń ata-ájesi tóleýlerine de bolady.
Kelesi kezekte áńgime aýany menshik quqyǵyna oıysty. Aýyl ákiminiń sheshimi shyqqanymen, menshik tirkeýge alynǵan bolyp sanalmaıdy. Menshik quqyǵy ádilet organdarynda tirkelgennen keıin ǵana óziniń zańdy kúshine enedi. Al jeke jáne zańdy tulǵalardyń bul jónindegi ótinishterin qaraý 15 kúnniń ishinde júzege asyrylady. Alaıda, qosymsha tekserý qajet bolǵan jaǵdaıda bul merzim 1 aıǵa deıin sozylady.
Kezdesý sońynda aýdan prokýrory aýyl turǵyndary tarapynan berilgen kóptegen suraqtarǵa jaýap berdi.
Erjan BAITILES,
«Egemen Qazaqstan».
Qyzylorda oblysy.
