«Astana arlandary» kezekti jeńisine jetti

Qarashanyń 23-i kúni Sankt-Peterbýrgte Búkilálemdik boks serııasynyń (WSB) jańa maýsymdaǵy 2 raýndyn jergilikti Russian Boxing Team komandasymen ótkizgen Astana Arlans 3:2 esebimen jeńiske jetti.

Qarashanyń 23-i kúni Sankt-Peterbýrgte Búkilálemdik boks serııasynyń (WSB) jańa maýsymdaǵy 2 raýndyn jergilikti Russian Boxing Team komandasymen ótkizgen Astana Arlans 3:2 esebimen jeńiske jetti.

Kezdesý 52 kıloǵa deıingi salmaqtaǵy reseılik Mısha Aloıan men qazaqstandyq Oljas Sáttibaevtyń urystarymen ashyldy. Shaıqastyń birinshi raýndy týrnır debıýtanty bolyp otyrǵan qazaq boksshysynyń basymdylyǵymen ótti. Osyǵan oraı tóreshiler de jeńisti 2:1 esebimen sonyń enshisine jazdy. Al álemniń eki dúrkin chempıony degen ataǵy bar reseılik bylǵary qolǵap sheberi qur bedelmen eshteńe ala almasyn bilgesin, 2 raýndtan bastap yshqyna alǵa umtyldy. Osy umar-jumar aıqastyń ózeginen qazylar alqasy sońynda soqqylary jıirek dál tıdi degen pikirmen jeńisti Aloıanǵa berip jiberdi.

Kelesi 60 kıloǵa deıingi sal­maqtaǵy komanda kapıtany Samat Báshenov ádepki urysta ketken eseni qaıtarǵandaı boldy. Ol Reseı chempıonatynyń ótken jylǵy kúmis júldegeri, Ýnıversıadanyń bıylǵy jylǵy jeńimpazy Adlan Abdýrashıdovti qapysyz utty. Shaıqas barysynda Samat ózine edireńdep umtylǵan básekelesiniń ekpinin myǵym soqqylarmen basyp tas­tap otyrdy. Bul onyń raýnd sońynda 2:1 esebimen alǵa shyǵýyna jol ashty. Al ekinshi raýndta boksshylardyń klınchke túsip qala berýi jıiledi. Ol reseılikke basymdyq alyp berdi. Budan sońǵy eki kezeńde barynsha jınaqy kóringen Samat 3:0 degen kórsetkishpen aıqyn jeńiske jetti. Sońǵy, besinshi raýndtyń nátıjesi eshteńe sheshe almaıtyn bolsa da, qazaqstandyq onda da qarsylasyna des bermeýge tyrys­ty. Sóıtip, 2:1 esebimen ony da ózine qaraı aýdaryp áketti.

Kezdesýdegi betburysty sátti budan keıingi 69 kıloǵa deıingi salmaqtaǵy sportshylar jasady. Shyny kerek, qazaqstandyq Meıirim Nursultanov pen reseılik Aleksandr Ivanov arasyndaǵy shaıqastyń basynda biz tájirıbesi kópteý alań ıesiniń ıyǵy ozyq shyǵar dep qaýiptenip edik. Biraq is júzinde bári basqasha bolyp shyqty. Bul kúni qazaqstandyqtar sapyndaǵy ekinshi debıýtant bolyp otyrǵan Meıirim shaıqastyń basynan ózin senimdi ustady. Qoly men boıynyń uzyndyǵyn jaqsy paıdalana bilgen ol qar­sylasyn qaqpaılaı júrip, ar­tyq upaılar ala berdi. Sonyń nátıjesinde úshinshi raýndtan keıin-aq onyń jeńetinine eshkimniń kúmáni qalmady. Osymen birge «arlandar» matchta birinshi ret alǵa shyqty – 2:1.

Al 81 kılo salmaqtaǵy Dana­bek Sýjanov óziniń myńdaǵan jankúıerleriniń senimin aqtaı almady. Serııanyń qazaqstandyqtar sapyndaǵy úshinshi debıýtanty Dmıtrıı Bıvolmen ótkizgen kezdesýiniń birinshi raýndynda-aq qolǵabyn sheshýge májbúr boldy. Aıta ketý kerek, jekpe-jekti eki jaq ta óte qarqyndy bas­tady. Raýndtyń sońyna qaraı reseı­lik boksshy bizdiń jigitke bir­neshe aýyr soqqyny dál berip úlgerdi. Sonyń ekeýi onyń arqanǵa ilinip qalýyna aparyp soqtyrdy. Osydan keıin boksshynyń den­saýlyǵyn táýekelge salmas úshin rıngtegi referı urysty toqtatty. Tehnıkalyq nokaýt. Munyń sońy komandalardyń ara salmaǵy qaıtadan teńesýine jetkizdi – 2:2.

Sóıtip, barlyq túıin eń sońǵy urysqa qalyp qoıdy. Al «sońǵy túıeniń júgi aýyr» ekenin jaqsy sezingen astanalyqtar sapyndaǵy legıoner oǵan tastúıin bolyp daıyn shyqty. Ol ózinen ataǵy da, shataǵy da kóp Sergeı Kýzmınge qarsy qoıǵany jınaqy qımyl boldy. Sońynda onyń jeńgenine tóreshiler de shák keltire almady. Jeńis! Bul sonymen birge, «Astana Arlansty» komandalyq jeńiske qol jetkizdirdi.

Osymen, «Astana arlandary» qatarynan ekinshi márte jeńis toıyn toılady. Bul kúni Polshada Poland Hussars-pen kezdesken Kýbanyń Cuba Domadores degen ujymy 5:0 esebimen utty. Dál osyndaı esepke Meksıkanyń Mexico Citi Guerreros klýby­men óz alańynda kúsh synasqan Ázer­baıjannyń Baku Fires komandasy da jetti. Al AQSh-tyń USA Knockouts komandasy Argen­tınanyń Argentina Condors jasa­ǵyn 3:2 etip tize búktirdi.

Endi 16 qarasha kúni oınalǵan 1 raýnd kezde­­­­sý­leriniń nátıjelerin eskerte keteıik. Olar bylaısha aıaq­­­taldy: «Astana Arlans» (Qa­zaq­­stan) – «Baký Faıers» (Ázer­baı­jan) 4:1, «Argentına Kondors» (Argentına) – «Italııa Tander» (Ita­lııa) 1:4, «Rashn Boksıng Taım» (Re­seı) – «Poland Hýssars» (Polsha) 5:0, «Meksıko Sıtı Gýerreros» (Mek­sıka) – «Kýba Domadores» (Kýba) 0:5, «Ýkraın Otamans» (Ýkraına) – «IýSA Knokoýts» (AQSh) 4:1, «Taım Ger­manııa» (Germanııa) – «Aljerıa De­sert Hoýks» (Aljır) 5:0.

Rýslan IGILIK.