Keshe Ortalyq kommýnıkasııalar qyzmetiniń resmı ókili Altaı Ábıbýllaev dástúrli brıfıngte osy aptanyń ataýly sharalarymen tanystyrdy.
Keshe Ortalyq kommýnıkasııalar qyzmetiniń resmı ókili Altaı Ábıbýllaev dástúrli brıfıngte osy aptanyń ataýly sharalarymen tanystyrdy.
Osy aptanyń basty oqıǵasy – 1 jeltoqsanda atap ótiletin Qazaqstan Respýblıkasy Tuńǵysh Prezıdentiniń kúni. Bul ataýly kún 2012 jyldyń 1 jeltoqsanynan bastap jalpyulttyq deńgeıde atap ótile bastady. Qazaqstannyń basty jetistikteri elimizdiń Tuńǵysh Prezıdenti Nursultan Nazarbaevpen tikeleı baılanysty. Qazaqstandaǵy Tuńǵysh Prezıdent kúni – tarıhı tańdaý jasalǵan kún, halyqtyń birlik jáne kelisim kúni. Jalpyulttyq Tuńǵysh Prezıdent kúni aıasynda elimizde birqatar mańyzdy sharalar uıymdastyrylady, degen A.Ábıbýllaev, sondaı-aq, josparlanyp otyrǵan áleýmettik-saıası oqıǵalarmen de tanystyryp ótti.
Resmı ókil 28 qarasha men 7 jeltoqsan aralyǵynda Senat jáne Májilis depýtattarynyń qabyldanǵan zańdardy túsindirý maqsatynda óńirlerge saparǵa shyǵatynyn jáne onyń barysynda depýtattardyń saılaýshylarmen kezdesýler ótkizetinin qaperge saldy. Jáne ol 28-29 qarashada Qasym-Jomart Toqaev bastaǵan Senat delegasııasynyń Ujymdyq qaýipsizdik týraly shart uıymy Parlamenttik Assambleıasynyń, Táýelsiz Memleketter Dostastyǵy Parlamenttik Assambleıasy men Eýrazııalyq ekonomıkalyq qoǵamdastyq Parlamentaralyq Assambleıasynyń is-sharalaryna qatysý maqsatynda Sankt-Peterbýrgte bolatynyn aıtty.
Sondaı-aq, brıfıngte aldaǵy Úkimet otyrysynda talqylanatyn másele de málim boldy. Resmı ókildiń sózine qaraǵanda, Kólik jáne kommýnıkasııa mınıstri Asqar Jumaǵalıev kólik júıesi ınfraqurylymyn damytýdyń 2020 jylǵa deıingi memlekettik baǵdarlamasynyń jobasyn tanystyratyn kórinedi. Al osy aptanyń sońyna qaraı, ıaǵnı 29 qarashada Premer-Mınıstr Serik Ahmetov Tashkenttegi ShYU Úkimet basshylary keńesiniń otyrysyna qatysyp, onyń aıasynda birqatar elderdiń Úkimet basshylarymen ekijaqty kezdesýler ótkizetini belgili boldy.
Apta ishinde elimizdiń ishki jáne syrtqy saıasaty men jalpy ómirinde bolatyn qadaý-qadaý oqıǵalardy aıtyp ótken resmı ókil Bilim jáne ǵylym mınıstrligi «Halyqaralyq baǵdarlamalar ortalyǵynyń» prezıdenti Ǵanı Nyǵmetovti jýrnalıster aldyna shaqyrdy. Ol óz sózinde atalǵan baǵdarlama júzege asyrylyp júrgen mezgilde, 20 jyldyń ishinde 10 025 azamatqa stıpendııa taǵaıyndalyp, sonyń ishinde 6015 túlek búginde el ıgiligi úshin qazaqstandyq ekonomıkanyń túrli salalarynda eńbek etip jatqanyn aıtty. Baǵdarlama arqasynda tolyqqandy bilim alǵan talapty da talantty jastardyń ómirdiń bir kirpishi bolyp qalanǵanyn tilge tıek etken Ǵ.Nyǵmetov: «2500 túlek búginde álemniń 33 eliniń 200 joǵary oqý ornynda bilim alýda. Bir myńǵa jýyq adamnyń basyn biriktirip otyrǵan «Bolashaq» túlekteri men stıpendıattarynyń qaýymdastyǵy jumys isteıdi. «Bolashaq» baǵdarlamasy o basta memlekettik mindetterdi atqarýǵa baǵyttalǵan bolatyn. 90-shy jyldardyń basynda, el Prezıdenti osyndaı baǵdarlama qabyldaý týraly kóregen jáne strategııalyq sheshim qabyldanǵan kezde, memlekettik basqarý, halyqaralyq qatynastar, dıplomatııa sııaqty mamandyqtar boıynsha, ıaǵnı táýelsizdigin endi alǵan Qazaqstannyń qalyptasýyna qajetti mamandyqtar boıynsha 700-ge tarta adam oqýǵa jiberilgen bolatyn. Keıinnen Memleket basshysy elimizdiń orta merzimdik damýyn anyqtaǵan 2030 jylǵa deıingi Strategııany qabyldady jáne sol strategııany iske asyrý barysynda «Bolashaq» baǵdarlamasy jańartylyp, elimizdiń barlyq turǵyndary qol jetkize alatyn naǵyz halyqtyq jobaǵa aınaldy», dedi.
Brıfıng barysynda Memleket basshysy Nursultan Nazarbaevtyń qatysýymen «Bolashaq» baǵdarlamasy túlekteri men stıpendıattarynyń mereıtoılyq forýmy ótetini de málim boldy.
Anar TО́LEÝHANQYZY,
«Egemen Qazaqstan».
