Memlekettik ishki kóshi-qon baǵdarlamasynyń sheńberinde Eńbek jáne halyqty áleýmettik qorǵaý mınıstrligi jumys kúshi artyq aýdandardan halyqty Soltústik Qazaqstan, Shyǵys Qazaqstan, Pavlodar, Qostanaı oblystaryna kóshirýge sheshim qabyldaǵany belgili. Soltústikke qonys aýdarýǵa negizinen 18-35 jas aralyǵyndaǵy jumyssyz azamattar kelisedi. О́ıtkeni eńbek etý belsendiligi joǵary osy jastaǵy azamattardyń kópshiligi belgili bir salada bilimin jetildirgisi keledi, endi biri joǵary bilimine saı maman bolýdy kózdeıdi, taǵy biri jeke kásibin ashýdy kózdeıdi. Ásirese qunarly qara topyraqqa jylyjaılar turǵyzyp, jemis-kókónis ósirgisi keletinder kóp.
Halyq óte tyǵyz ornalasqan Almaty, Nur-Sultan, Shymkent sekildi qalalar men Ońtústik óńirlerde qalaǵan jumysyna ornalasý nemese jeke kásibin dóńgeletip áketý ekiniń birine buıyra bermeıdi. Kerisinshe, jumys kúshi tapshy soltústik aımaqtarǵa bilikti mamandar aýadaı qajet. Sonymen qatar soltústik óńirlerdegi aýyldyq jerlerde bala sany az balabaqshalar men mektepter de jeterlik. Esil aýdanynda da «100 mektep, 100 aýrýhana» baǵdarlamasynyń sheńberinde turǵyzylǵan keıbir aýyldardaǵy tamasha mektepterde bala sany múlde az bolyp, qańyrap qalýdyń az-aq aldynda tur. Sondyqtan da ishki mıgrasııanyń munda paıdasy zor.
Ońtústik pen batystan qonys aýdarýshylarǵa munda eski úıler usynylmaı, quny bir mln teńgelik jańa úıler salynýda. Osy jyldyń aıaǵyna deıin Esil aýdanyna da 60 turǵyn úı salý josparlanǵan edi. Búgingi tańda sonyń jartysy qonystandyryldy. Sonymen birge aýdan ortalyǵy Iаvlenka selosynda 27 páterli jaıly úıdiń de qurylysy aıaqtaldy. Jýyrda oblys ákimi Qumar Aqsaqalov osy jáne basqa da jańa úılerdiń turǵyndarymen kezdesti. Sonyń ishinde Túrkistan oblysynan kóship kelgen Ádilhan Tóltaevtyń otbasy da bar. Olar osy 27 páterli úı ornalasqan kóshede salynǵan jeti jańa úıdiń birine qonystanypty. Úı ıesi osynda jumysqa kirip, balalaryn qazaq mektebi men balabaqshasyna ornalastyrǵan eken. «Bizge berilgen úı keń ári jaryq. Ázirge jyly jáne jaıly bolyp tur. Biz munda qatty sýyq bolady degendi estigenbiz, ondaıdy áli kórgen joqpyz. Biraq basqa adamdar ómir súre alsa, biz de úırenip ketermiz», dep oılaımyn deıdi ol.
Sonymen birge Á.Tóltaev bul jerdiń jaz ben kúzdegi tabıǵaty ózine qatty unaǵanyn aıtty. «Aqqaıyńdy ormandar qarap turǵanda kózińdi qýantady eken», deıdi ol. Ádilhan óziniń aldaǵy josparlary qataryna jylyjaı ashyp, jemis-jıdek ósirýdi jáne dúken ashýdy mejelep otyrǵanyn da aıtty. Osyndaı optımıstik pıǵyldaǵy azamattar soltústiktiń bolashaqtaǵy tegeýrindi turǵyndary bolatynyna sengiń keledi.
Jalpy, oblysqa Túrkistannan ǵana emes, Almaty men Shymkent qalalarynan da kóship kelýshiler bar. Byltyr Soltústik Qazaqstanǵa barlyǵy 2333 adam kóship kelgen bolsa, bıylǵy meje 2500 adam. Bıyl olarǵa arnap jeti júzdeı úı salynady, qazir onyń negizgi bóligi turǵyzylǵan. Oblys ákimi ósimniń saqtalatynyna senetinin aıtty.
Joǵaryda aıtylǵan 27 páterli úı áleýmettik álsiz toptarǵa jatatyn otbasylarǵa berilgen. Keń ári jaryq úılerge túskenderdiń biri tórt balaly – Ekaterına Salnıkovanyń otbasy eken. Ol ákimge óziniń alǵysyn jetkizdi.
Soltústik Qazaqstan oblysy
