Jobanyń júzege asýyna Qazaqstan Respýblıkasynyń Tuńǵysh Prezıdenti – Elbasy Keńsesiniń basshysy, saıası ǵylymdar doktory, professor Mahmud Qasymbekov bastamashy bolǵan. Kitapta Qazaqstan men álemdik qoǵamdastyqta moıyndalǵan Elbasynyń ómiri men qyzmeti, tyń bastamalary men sińirgen eńbegi beınelenedi. Elbasynyń irgeli, baǵdarlamalyq jáne strategııalyq eńbekteri, jarııalanymdary, shyǵarmashylyq jumystary, sondaı-aq Qazaqstan men shetelderde sóılegen sózderi týraly birqatar materıaldar men aqparattardy da osy jınaqtan tabýǵa bolady. Sonymen qatar kitapta Qazaqstan Respýblıkasynyń Tuńǵysh Prezıdenti N.Á.Nazarbaevqa arnap túsirilgen kórkem jáne derekti fılmder, týyndy avtorlary men ádebı basylymdar týraly aqparattar kórinis tapqan.
Bıobıblıografııanyń tusaýkeseri Elbasy kitaphanasy men Ulttyq ǵylym akademııasy birlesip uıymdastyrǵan «Qazaqstan ǵylymy: damý kezeńderi men basymdyqtary» taqyrybyndaǵy dóńgelek ústel aıasynda órbidi.
– Bıyl Qazaqstan Respýblıkasy Ulttyq ǵylym akademııasynyń músheligine Elbasy N.Á.Nazarbaevtyń qabyldanǵanyna jyl 25 tolmaq. Osy oraıda Qazaqstan Respýblıkasynyń Tuńǵysh Prezıdenti – Elbasy Keńsesiniń basshysy, saıası ǵylymdar doktory, professor M.Qasymbekovtiń jetekshiligimen Elbasy kitaphanasy «Nursultan Ábishuly Nazarbaev» akademııalyq bıobıblıografııasyn ázirledi. Taǵdyry men boryshyn egemen Qazaqstannyń qalyptasý tarıhymen ushtastyrǵan tulǵanyń eńbek joly basylym negizine alynyp otyr. О́ziniń baı tájirıbesine sáıkes, búginde Elbasy Qazaqstanda bilimdi, ǵylymdy damytýǵa meılinshe kóńil bólip keledi. Jyl saıyn bul salaǵa bıýdjetten úlken kólemde qarajat bólinip, elimizde jańa zamanaýı mektepter, daryndy balalarǵa arnalǵan oqý oryndary jáne álemdik deńgeıdegi ýnıversıtetter ashylýda. Olar talantty oqytýshylardy, stýdentterdi, zertteýshilerdi tartatyn ortalyqtarǵa aınaldy. Táýelsizdikke qol jetkizgen kúnderden bastap Elbasy memlekettiń bilim berý jáne ǵylym salasyn eshqashan nazardan shyǵarǵan emes. Elbasy aıtqandaı, ǵylymsyz óndiris alǵa baspaıdy. Sondyqtan árbir Joldaýynda ındýstrııanyń ár salasyn ınnovasııalyq, ǵylymı súıemeldeýmen kúsheıtýdi talap etetin. Qazaqstannyń Tuńǵysh Prezıdenti qaıda bolsa da, respýblıka kóleminde nemese sheteldik saparda bolsyn, joǵary oqý oryndarynyń stýdentterimen udaıy kezdesýler ótkizedi, dárister oqyp, óziniń bilimi men tájirıbesin jastarmen bólisedi, – dep atap ótti Elbasy kitaphanasynyń dırektory, saıası ǵylymdar doktory, professor Ámirhan Rahymjanov.
Dóńgelek ústel qatysýshylaryna óz quttyqtaý hatyn joldaǵan M.V.Lomonosov atyndaǵy Máskeý memlekettik ýnıversıtetiniń rektory Vıktor Sadovnıchıı: «Bıobıblıografııanyń jarııalanýy qoǵamdyq, ǵylymı jáne saıası ómirdegi mańyzdy oqıǵa. Ol Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń táýelsiz Qazaqstannyń qalyptasýynyń bar kezeńindegi orasan zor eńbegin tanytady. Kitapta N.Á.Nazarbaevtyń Qazaqstannyń damýyna, atap aıtqanda, saıasat, ekonomıka, qoǵamdyq ómir, ultaralyq qatynastar, t.b. máselelerdegi tutas qadamynyń kórinis tabýy mańyzdy» deı kele, kemeńger tulǵanyń el damýyndaǵy eleýli eńbegi urpaq úshin ólmes ónege ekenin jetkizdi.
Bul oıdy qýattaı túsken otandyq ǵalymdar da el táýelsizdiginiń 30 jyldyǵy qarsańynda Tuńǵysh Prezıdent – Elbasy júrip ótken jol jańa kózqaras turǵysynan zerttelip, saraptalýy kerek dep esepteıdi.
«Qazaqstan damýyndaǵy iri jobalardyń nege negizdelgenin, qalaı júzege asqanyn, nege qol jetkizgenimiz týraly ǵylymı túıin jasaýǵa tıispiz. Muny bári bilýi kerek. 1995 jyly ekonomıka ǵylymdarynyń doktory, professor N.Á.Nazarbaev UǴA akademıgi bolyp saılanǵanda, barlyq ǵalymdar biraýyzdan qoldadyq. Biz bárimiz Elbasynyń josparly ekonomıkadan naryqtyq ekonomıkaǵa kóshýdi ǵylymı turǵyda jasaqtap shyqqanyn bilemiz. Jáne ony tutas bir memleket tájirıbesinde júzege asyrdy. Mine, osy úshin akademık bolyp saılandy», deıdi UǴA prezıdenti, hımııa ǵylymdarynyń doktory, akademık M.Jurynov.
Qazaq taǵamtaný akademııasynyń dırektory, medısına ǵylymdarynyń doktory, akademık Tóregeldi Sharmanov Qazaqstannyń qandaı qıyn kezeńdi bastan ótkergenin tilge tıek ete kele, «Táýelsizdiktiń alǵashqy jyldarynda Elbasy kópultty memlekettiń birligi men dinaralyq kelisimin eldiń basty qundylyǵy dep jarııalaýynyń arqasynda, biz kóp qıyndyqty eńserdik. Elbasy kóregen saıasatker, reformator, óz jeriniń naǵyz patrıoty retinde qazaq ultynyń bolashaǵy úshin jumysyn jalǵastyrýda», dep atap ótti.
Jaryq kórgen jańa týyndy – memlekettiń ǵylymı qoǵamdastyǵy úshin aıtýly oqıǵa ekenin aıtqan. Ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov: «Nursultan Nazarbaev álemdik iri saıasatker ǵana emes, beldi ǵalym retinde de tanymal. Qazaqstannyń aıaqqa turyp damýy Elbasynyń qyzmetimen tikeleı baılanysty ekeni kúmánsiz. Ǵylymnyń damýyndaǵy onyń tarıhı kórnekti rólin aıtpaýǵa bolmaıdy. Ámirhan Muratbekuly atap ótkendeı, táýelsizdik alyp, Qazaqstanda jeke damý modelin qalyptastyrý álemde «Qazaqstan joly» nemese «Nazarbaev modeli» degen ataý aldy. Álemniń damyǵan elderi ekonomıkasynyń tájirıbesin esepke alyp, táýelsiz memleket qurý modeli shyndyǵynda óte baǵaly eńbek. Eldiń turaqty damýynyń mundaı strategııasy tereń ǵylymı faktilerge negizdelgen jáne jahandyq ǵylym men tájirıbeni toqtaýsyz zertteýdiń jemisi», dep pikir bildirdi.
Is-sharada Erlan Sydyqov, Tilektes Espolov syndy belgili ǵalymdar sóz sóılep, Rahym Orazalıev, Aqan Bıjanov, Alma Ábilqasymovalardyń baıandamalary tyńdaldy.
Mazmundy shara aıasynda Elbasy kitaphanasy men Qazaqstan Respýblıkasy Ulttyq ǵylym akademııasy arasyndaǵy yntymaqtastyq týraly memorandýmǵa qol qoıý rásimi ótti. Memorandýmǵa qol qoıýdyń maqsaty – Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń ıdeıalary men bastamalaryn nasıhattaý, sondaı-aq birlesken ǵylymı jobalardy júzege asyrý.
ALMATY
