Qazaq ánshisi bala kezde armany qandaı bolǵanyn, bozbala shaǵynda nege qyzyqqanyn, alǵashqy tabysyn qashan tapqanyn aıtyp berdi, dep habarlaıdy QazAqparat tilshisi.
"Balalyq shaqty baqytty ótkizdim. Kishkene kezden taekvondomen aınalysyp, sýǵa júzdim, vokalymdy kúsheıtip, fortepıanoda oınadym. Qarapaıym kóp balanyń biri boldym. Mýzyka mektebine baryp, sporttyq úıirmelerden qalmaıtynmyn", deıdi Dımash Qudaıbergen.
Onyń aıtýynsha, basqa balalar 2-3 jasynan bastap kóliktiń sýretin salsa, Dımash stýdııanyń, kompıýterdiń, dybys kúsheıtkishter men mıkrofondardyń, sahnanyń sýretin salady eken.
"Men sol kezde ózimniń armandarym men josparlarymdy "ǵaryshqa joldadym". Qazir sol armandarymnyń bári de oryndalyp jatyr. Úsh jasta bolsam da úlken sahnany armandaıtyn edim. Basqasha ómirdi armandaǵan emespin. Árdaıym ánshi, ártis bolatynymdy sezetinmin. Áli de osy jolda kelemin", dep atap ótti ánshi.
Suhbat barysynda Dımash óziniń balalyq shaqtarynyń esteligimen bólisti.
"Maǵan velosıped satyp bergen kez áli kúnge deıin esimde. Respýblıkalyq deńgeıdegi "Aınalaıyn" konkýrsyna qatysyp, bes jasymda laýreat atandym. Maǵan alǵys hatpen birge myń teńge berildi. Qazir ol degenińiz úsh dollarǵa teń soma. Sol alǵys hatymmen myń teńgeni ájeme tezirek tabystaýǵa asyqqanym esimde. Ájem ózine birdeńe alsyn dep oıladym. Úıge qaıtyp bara jatqan kezde anamnan "Teńge sizde me? Qazir ájeme beremiz" deı bergenim esimde", deıdi ánshi alǵashqy tabysyna bes jasynda qol jetkizgenin esine aldy.
