kokshetau.asia.kz
О́tken jyly Sandyqtaý aýdanynda aýyz toltyryp aıtýǵa ábden laıyqty birneshe joba júzege asyp, el mereıin kóterip tastady. Osy bir janashyrlyq ister bolashaqqa degen senimdi nyǵaıtyp, el ishindegi yntymaq pen aýyzbirlikti odan ári bekite túsetini bar. Tipti jelkildep ósip kele jatqan jas urpaqty otanshyldyqqa baýlýdyń ońdy mysaly dep aıtsaq ta artyq emes.
Bastrymovka eldi mekenindegi selolyq klýb kóp ýaqyttan beri jóndeý kórmeı, ábden tozyp, qaýsap qalǵan bolatyn. Klýb úıi jalǵyz mádenıet ortalyǵy ǵana emes, eldiń ishki saıasatyn nasıhattap, jalpaq jurtty uly murattarǵa baǵyttaıtyn oryn emes pe? Mine, osy selolyq klýb jergilikti kásipkerlerdiń qoǵamdasa jasalǵan qaıyrymdylyǵynyń arqasynda 21 mln teńgege jóndelip, qurylysshynyń qalaǵynan jańa shyqqan nysandaı jaınap tur. Syrtqy keıpi ǵana emes, ishki mazmuny baıyp, san túrli mádenı-kópshilik jumysy da alǵa basýda. Osy eldi mekende Uly Otan soǵysy ardagerlerine jańadan eskertkish boı kóterdi. Aýyl adamdary atalarynyń arýaǵyn syılaǵan qamqor jandardyń isine razy bolysty. Otan qorǵaý jolynda sheıit bolǵan bozdaqtardyń esimderi tańbalanyp jazylyp, keıingi urpaqtyń esine el qorǵaýdyń aıryqsha qasıetti uǵym ekenin salyp turǵandaı. О́tkenge qurmet – keıingige paryz.
Spasskoe selosynda medısına qyzmetkerlerine arnalyp 20 mln teńgege eki páterli úı salyndy. Aýyldyq jerde medısına qyzmetkerleriniń jaǵdaıyn oılaý – eń aldymen, halyqtyń densaýlyǵyn oılaý degen sóz. Shalǵaıdaǵy shaǵyn eldi mekenderge medısına qyzmetkerleriniń tartynshaqtap baratyny baspananyń joǵynan ekeni belgili. Aýdan kásipkerleri osy bir jaıdy qaperlerinen shyǵarmaı, halyqtyń densaýlyǵy úshin tamasha is atqaryp otyr. Jaman tumaý jan alqymnan alǵan búgingi kezde bul da – asa qajet dúnıe. Taǵy bir ekpin túsirip aıtatyn jaıt, Spasskoe aýylynda qoǵamdyq monshaǵa kúrdeli jóndeý jumystaryn júrgizý úshin 25 mln teńge kóleminde qarajat jumsalypty. Mundaı qamqorlyqtan aýyldaǵy bilim oshaǵy da tys qalmaǵan. Mektep qazandyǵy úshin 5 mln 300 myń teńge qarjy bólinip, jańa qazandyq salynǵan. Endi mektep oqýshylary qaqaǵan qys aılarynda burynǵydaı jaýramaı, alańsyz bilim alady.
Bar jaqsylyqty balalarǵa jasaýǵa uıǵarǵan azamattar Krasnaıa polıana selosynda balalarǵa arnalǵan sport alańyn salyp berdi. Shyndyǵyn aıtqanda, mundaı sport alańdary kóptegen iri eldi mekende de kezdese bermeıdi. Qazir aýyl shetine taban iliktirseńiz, metaldan jasalǵan ádemi de saltanatty qaqpa men jol jıegin órnektegen uzyndyǵy 200 metrge deıin sozylatyn qorshaýdy kórer edińiz. Bul iske 4 mln teńge jumsalǵan. Al Arbýzenka aýylyndaǵy mektep jasyna deıingi balalarǵa arnalǵan mekeme týraly aıtsaq she? Ishi kirse-shyqqysyz, qurqyltaıdyń uıasyndaı jyp-jyly shaǵyn ortalyqty salýǵa jergilikti kásipkerlerdiń qaltasynan 12 mln teńge qarajat bólingen. Bolashaq urpaq jaıyn oılaǵan qaltaly azamattar Krasnaıa polıana orta mektebine otyn-kómir saqtaıtyn quny 500 myń teńgelik qoıma da salyp beripti.
El ishinde qatynaý da qıyn bolyp kelgen. Osy bir kemshiliktiń ketigin toltyrmaqshy bolǵan isker azamattar Belgorod selolyq okrýginiń turǵyndary aýdan ortalyǵy – Balkashıno selosyna ýaqtyly qatynap turý úshin 10 mln teńgege «Gazel» avtokóligin satyp alyp berip, júrgizip otyr.
Osy oraıda aýdandaǵy jomart jandardyń biri ári biregeıi retinde «Spasskoe agro» seriktestiginiń dırektory Mahmýd Abýev týraly aıryqsha toqtalyp aıta ketýge tıistimiz. Joǵaryda biz razylyq peıilmen tizip aıtqan janashyrlyq kómekti osy seriktestiktiń basshysy jasap otyr. Bar qarajat seriktestik esebinen jumsalǵan.
Mahmýd Magomedovıch tárizdi týǵan jeriniń tútinin túzý ushyrýǵa adamgershilik ajarymen, kisilik kelbetimen, jomart peıilimen janashyrlyq tanytyp otyrǵan abzal azamattyń biri – Aleksandr Zakýsılov. Ol – «Svobodnoe» seriktestiginiń dırektory. El qamyn jegen elgezek jan ótken jyly Novogorodskıı selolyq klýby naýryz merekesin atap óter kezde 580 myń teńge berip, týǵan jerdiń tósinde taǵylymy mol sharanyń joǵary deńgeıde toılanýyna kómek qolyn sozdy. Mundaı kómekti Aleksandr Aleksandrovıch aýdandaǵy Vladımırovskıı, Maksımovka selolyq Mádenıet úılerine de kórsetti. Jalǵyz toı toılaý ǵana emes, odan ózge ýaqytta da aýyldaǵy mádenıet oshaǵynyń oty mazdap janýyna júrek jylýyn tógip, qaıyrymdy qolyn sozýda. Sózimiz dáleldi bolýy úshin birer derek keltire ketelik, seriktestik basshysy Novogorodskıı selolyq Mádenıet úıine aǵymdaǵy jóndeý jumysyn jasap berdi. Maksımovka eldi mekenindegi selolyq Mádenıet úıiniń kúrdeli jóndeý jumysyna 3 mln 274 myń teńge mólsherinde kómek kórsetti. Osy selolyq okrýgtiń hokkeı komandasy úshin sport kıimderi, sporttyq qural-jabdyqtardy satyp alýǵa 10 mln teńgeden asa qarajat bóldi.
Qalaı razy bolmassyz. Osy ólkedegi jomart jerdiń ıgiligin kórgennen keıin bar yrysty bir ózi baýyryna basyp qalmaı, sol jerde tútin tútetip otyrǵan aýyl-aımaqtyń ajaryn túzeýge belsene atsalysýda. Osy bir ónegeli isi óńirdiń ózge pushpaǵynda ıgilikke qoly jetip otyrǵan isker adamdarǵa úlgi dep aıtsaq, artyq bolmas.
Aýdandaǵy atymtaı jomarttyǵymen aty shyqqan jannyń biri – «Baıdaly» seriktestiginiń basshysy Baǵdat Orazalın. Baǵdat Baıdalyuly Veselovskıı orta mektebiniń jas ustazdary úshin 30 mln teńgege alty páter salyp berdi. О́z seriktestiginiń bir mamanyna da quny 20 mln teńge shamasyndaǵy turǵyn úıdi syıǵa tartty. Aýyl janyndaǵy aýdandyq mańyzy bar kópirdi 10 mln teńgege jóndep, turǵyndarǵa qolaıly jaǵdaı týǵyzyp otyr. Aǵaıyndy Marat Orazalın ekeýi janashyrlyqtan jarysqa túskendeı áser qaldyrady. Marat Amangeldiuly – «SPH Baıdaly-2» seriktestiginiń basshysy. Ol selolyq okrýgke asa qajetti jedel járdem avtokóligin 6 mln teńgege satyp alyp, syılady. Osyndaǵy orta mekteptiń jas sportshylaryna 2 mln 200 myń teńgege sport jabdyqtaryn alyp berdi.
Ár aýyl, ár eldi mekende aqyq dán ósirip, aqtyly mal baǵyp, eńsesin tiktegen el azamattary týǵan jerdiń tósin túletýge dál osylaı úles qossa, tutas el, baıtaq dala áldeqashan gúl jaınap, tirshilik qaınap, ómirdiń óńi ońynan ózgerip keter edi.
Aqmola oblysy,
Sandyqtaý aýdany
