Bozjyrada týrıster úshin qonaqúı salý máselesi týǵan jerdiń, tabıǵattyń tylsym sulýlyǵyn saqtaýǵa beıjaı qaraı almaıtyn tek mańǵystaýlyqtardyń emes, barsha otandastardyń, tipti sheteldikterdiń de syn-pikirine ilikti, ıaǵnı qoldaý taýyp kete almady. Eldik másele «Egemen Qazaqstan» gazetiniń betinde kóterilip, áleýmettik jelilerde «jyr» boldy.
Osyǵan oraı Mańǵystaý oblysy ákimdigi Bozjyradaǵy jobaǵa qatysty resmı túsinik berdi.
«Mańǵystaý oblysy Qaraqııa aýdanynda ornalasqan Bozjyra shatqalyna qatysty oblys ákimdigi resmı málimdeme usynǵan bolatyn.
Birinshiden, Bozjyranyń basynda eshqandaı qurylys jumystary júrip jatqan joq.
Ekinshiden, joba áli qaralýda. Týrıstik nysan salýǵa nıetti kompanııa tarapynan naqty ári sońǵy joba áli kelgen joq. Buǵan deıin úsh nusqasy usynylǵan bolatyn. Biraq bul sońǵy varıanty degen sóz emes. Iаǵnı tolyqtyrý, jetildirý prosesinde.
Úshinshiden, turǵyndar aldyn ala el-jurtqa eskertilmeı, qoǵam talqysyna nege usynylmaǵan degen ýáj aıtýda. Joǵaryda atap óttim. Áli kúnge deıin ákimdikke nemese tıisti jaýapty memlekettik organdarǵa jobanyń sońǵy nusqasy berilgen joq. Qolǵa qujat tıgen kezde, ekolog, týrızm salasynyń sarapshylary, jýrnalıster jáne qoǵam belsendileriniń oıyn eskere otyryp, ashyq formatta qoǵamdyq tyńdaý uıymdastyrylady.
Tórtinshiden, býtık-otel boı kóteretin bolsa, eń azy Bozjyra shatqalynan keminde 1,1-5 shaqyrym qashyqtyqta salynýy tıis. Bozjyra eshqandaı qorshalmaıdy, dál qazirgi keıipi sol kúıinde saqtalady.
Besinshiden, oteldiń aýmaǵy 80 ga degen qate aqparat. Bul jerde shamamen shaǵyn ǵana 5-6 ga shamasynda bolýy múmkin.
Altynshydan, birneshe qabattan turatyn bıik emes, bir qabatty býtık-otel bolmaq. Iаǵnı oıyn-saýyq ortalyǵy emes, alys joldan sharshap kelgen týrısterge qolaıly, demalýǵa yńǵaıly, as iship aıaq sýytatyn ortalyq retinde qarastyrylyp otyr.
Qoǵam tarapynan taǵy bir ýáj bar. Qorshaǵan ortaǵa, aınalysyndaǵy jan-janýarǵa zııan bolady degen. Kerisinshe, ol jerde sońǵy tehnologııalardy eskere otyryp, gaz, sý, toq kózderi tartylmaıdy. Barlyǵy kún jáne jel energııasy kózderinen alynatyn bolady. Jaýapty mekeme jol sala otyryp, retsiz kólik júrisin rettep, qoqys máselesin qolǵa alady.
Taǵy bir eskere ketsek, atalǵan joba áli talqylaný ústinde, naqty joba jasaqtalǵan boıda qoǵam nazaryna usynylatyn bolady» delingen Mańǵystaý oblysy ákimdigi joldaǵan jaýapta.
Jobanyń Bozjyradan tysqary bolýy – halyq qalaýy. О́ńirde týrıster úshin qolaıly jaǵdaı jasaýǵa suranyp turǵan ózge nysandar bar, joba jasaýshylardyń Bozjyra syndy tabıǵı sulýlyqty búldirmese bolǵany...
Mańǵystaý oblysy
