Selınograd aýdanynda bıyl «Eńbek» baǵdarlamasy arqyly shaǵyn nesıe alyp, sharýasyn túzeımin deýshilerdiń qatary kóbeıip keledi. Aýylda eki qolǵa bir kúrek taba almaı otyrǵan azamattar memlekettik baǵdarlamalardyń sharapatynyń arqasynda nar táýekel etip, naryq aıdynynda aldymen anyq baǵdar alyp, nátıjeli iske umtylýda. Olardyń arasynda tigin sehtaryn ashyp, ata kásip – mal sharýashylyǵymen aınalysqysy keletinder az emes. Kásipkerler eń aldymen óńirde básekelestigi joq salalarǵa umtylýda. Bul ábden túsinikti. О́ıtkeni óndirgen ónimderi tez ótip ketse, bızneske salǵan qarajattary da jyldam qaıtarym beredi. Máselen, aýdanda emdik qasıeti mol eshki sútin óndiremin deýshiler de bar. Asylynda eshki – ósimtal túlik. Baǵzy zamanda el tynysyn aıtqyzbaı ańǵaratyn suńǵyla qarııalar «esiń ketse, eshki jı» dep nege aıtty deısiz.
Aldyńǵy jyly 122 adam memlekettik grantqa ıe boldy. Olarǵa 36 mln teńge qarajat bólindi. Shaǵyn aýdan úshin táp-táýir kórsetkish. Alǵa umtylǵan osynsha adamnyń úıdegi oıy ońynan ońǵarylyp ketse, kásipkerliktiń reti kelip-aq qalar edi. Shyńǵys Romanjarov esimdi kásipker «Bolashaq» dep atalatyn oqý ortalyǵyn ashyp otyr. Ortalyqty ashý sebebi, ata-analar tarapynan kóptegen ótinish túsken soń mektep oqýshylaryna sabaqtan tys oqýǵa kómek kórsetý. Ári ózine de tıimdi. Búginde bul ortalyqqa qyryqtan astam oqýshy kelip, bilimderin eseleı túsýde.
– Jumysty byltyr bastadyq, – deıdi «Bolashaq» bilim berý ortalyǵynyń dırektory Shyńǵys Romanjarov, – «Atameken» ulttyq kásipkerler palatasynda oqyp, sertıfıkat aldym. Standartqa sáıkes 500 myń teńge kóleminde grant bólindi. Ol qarajatqa qajetti tehnıkalardy satyp aldym.
Qazir ortalyqta 1-shiden 11-inshi synypqa deıingi balalar bilim alady. Bul jerde basymdyq matematıka pánine berilgen. Aldaǵy ýaqytta shahmat jáne robot tehnıka tárizdi úıirmeler ashý da mejelenip otyr.
Bıyl memlekettik grant alamyn dep úmittengen adamdarǵa 27 mln teńgeden astam qarajat bólingen. Elýden astam kásipkerler óz isin dóńgeletýde. Olardyń arasynda ata kásip – mal sharýashylyǵyn damytýǵa ózindik úlesterin qosýǵa umtylyp otyrǵandar da barshylyq. Olar qatal qysqa qamdanyp, mal azyǵyn daıyndaýda Nur-Sultan qalasynyń irgesinde tórt túliktiń basy ósse, azyq-túlik beldeýine de az da bolsa sharapaty tıer edi. Tosyn kásipti bastaýǵa bel býyp otyrǵandar da bar. Máselen, «Bastaý bıznes» baǵdarlamasy arqyly zoodúken ashpaqshy bolyp umtylyp otyrǵan Ásııa Beknazarova tyńǵa soqpaq salmaq. Onyń aıtýyna qaraǵanda, aýylda mundaı dúken buryn-sońdy múlde bolmaǵan eken. Tipti kópshilik mundaı dúkenniń ne satatynyn da bilmeıdi. Jańalyqtan qulaqtanǵan jurt endi ǵana dúken tabaldyryǵyn attaýda.
Kásiptiń jamany joq. Septigi aldymen elge, sodan soń ózine tıse, bıznes salasynda baǵy janǵany emes pe?!
Aqmola oblysy,
Selınograd aýdany
