Taǵdyrmen taıtalasqan talapty jan

Shoq juldyzdaı Shalqar aýyly – kir jýyp, kindik kesken týǵan topyraǵy. Eldik pen erliktiń, asyl adamgershiliktiń aq besigi ispetti. Baıaǵyda, bala kezinde Erik Myrzalıev aýyldyń abyz aqsa­qal­darynan kóp jaıdy, tirshiliktiń talaı-talaı syryn uqqan. О́mirdiń kúres ekenin de, basqa túsken beınetke mo­ıyp, borkemik bolýdyń qajeti joǵyn da. Qap­tal shapandy kıip alyp, qara tóbeniń ba­synda keńes quratyn aqsaqaldar este joq eski kezeńniń jylǵa tartatyn ádemi áńgimelerdi birinen soń birin sabaqtar edi. Esti esteliktiń adam janyn baýraıtyn tolqyn-tolqyn lebi zerdeli qulaqtan kirip, tula boıyn shymyrlatatyn ystyq sezim bolyp kókiregine quıylyp jatatyn. Beý, ómir, pende shirkinge qymbat ekenin de atalarynyń aýzynan shyqqan ataly sózden uqqan.

Áskerı boryshyn Mońǵolııada ótedi. Kishkentaıynan ustaz bolǵysy kelgen. Epsekti qolynan kóp nárse keletin. Qolyna tıgen zat qulpyryp ketedi. Kókiregin qolamtanyń shoǵyndaı jylytyp, alystan aıalaıtyn armany da kóp. Jelkildep ósip kele jatqan jas urpaqty ulaǵatty ustaz bolyp bilimge, bilikke, jasampazdyqqa baýlysa, paryzynyń tolaıym ótelgeni de. Osy úkili úmit qolynan jetelep burynǵy Selınograd qalasyndaǵy pedagogıkalyq ınstıtýtqa ákelgen. Tula boıyndaǵy talpynys osy jerde shyńdalyp, bilimmen bekidi. Keıin 12 jyl shákirtterine sabaq berdi.

Oqys oqıǵa 2004 jyly oryn alǵan. Sol sátten bastap ánsheıinde jadyraı jarqyrap turatyn kók aspan qara shymyldyqpen qymtala jabylǵandaı. Tipti, úmit sáýlesi de talmaýsyrap baryp sónetindeı. Eki ret qatarynan omyrtqasyna ota jasatty. Bolmady. Qatty jyldamdyqpen kelgen kólik soqqan kezde opyrylyp ketken. Kiná­li adamdy sottatqan joq. Bul da – úl­ken adamgershilik. Keıde bir sirkesi sý kótermeı júrgen áldekimder baı­qaý­syzda aıaǵyn basyp ketseń, qara or­man­dy sýǵa aldyryp, jer-jebirińe jetip jatpaı ma? Al mastyqtyń saldarynan tepse temir úzetin jas jigittiń omyrt­qasyn opyryp máńgilik múgedek etip tastaý ońaı emes qoı. Sol saldary sal­maq­ty sebepke kináli jandy keshirý­diń ózi keıipkerimizdiń boıyndaǵy kisi­liktiń, azamattyqtyń qanshalyqty deń­geı­de ekenin aıqyn ańǵartyp turǵan tárizdi.

Talaı aýyr kúnder men túnderdi basynan ótkerdi. Átteń, shirkin, qaz basyp júrse talaı sharýany tyndyrary anyq edi. Keıin qolarbaǵa da úırendi. О́tken jyly úıine jóndeý jumystaryn júrgizgen. Qoly jetetin jerdiń bárin kóp-kórim kórkeıtip jibere alady. Qol jetpegen jerine kelinshegi men balalary kómektesti. Áıteýir jabylyp júrip úıin kirse shyqqysyz etip ajarlandyryp aldy. Úı irgesine aıaqkıim tigetin sheberhanasyn saldy. Buryn izdep kelip buıymtaıyn aıtqan jurttyń zatyn úıinde tigip beretin. Endi mine óz qolymen turǵyzǵan shaǵyn da bolsa kádege ábden jaraıtyn sheberhanasy bar.

Múmkindigi shekteýli Erik Teńkeıuly óz aldyna jeke kásipker retinde tir­kel­gen. Aldynan jumys úrkip tura­tyn sheberdiń aýyldastaryna septigi tıip-aq tur. Burynǵylar «sheberdiń qoly ortaq» dep tegin aıtty deısiz be, jaman tumaý jaılaǵaly julyǵy tozǵan aıaqkıim kóbeıdi. Halyqtyń turmysyn osy aradan da aıyrýǵa bolady. Keıbireýler kelip ótinishin aıtqanymen, azyn-aýlaq tólemaqysyn tóleýge qaýqary jetpeı turǵanyn qabaǵynan aıyrady. Ondaıda eshteńe suramaıdy. Jamap-jasqap, áli de bir qystan shyǵarlyq etip jóndep beredi. Al zeınetkerler men múmkindigi shekteýli adamdarǵa tipti tegin.

– Adamdar bir-birine kómek qolyn sozýy kerek. Sál ǵana janashyrlyǵyń jandaryn jadyratyp jiberedi emes pe? Bizge tenderge qatysý máselesin sheshý qıyn. О́tkende 100 myń teńgeniń jumysyn utyp alyp, oryndap berdim. Áıelim arqyly nesıe rásimdep, tigin mashınasyn satyp aldym. «Balalar alańdamaı jumysyn istesin», dep qazir nemere baǵyp otyrmyz, – deıdi E.Teńkeıuly.

Qajetti zattardy Nur-Sultan qala­synan aldyrady eken. Onyń qoly­nyń sheberligi, aıaqkıimderdi sapaly jóndeıtini kópke málim. Oǵan da ózi­niń boıyndaǵy tabıǵı qabileti, jaýap­ker­shi­ligi arqasynda jetken. Kileń jóndeý ǵana emes, ózi de jyly da ádemi, kóz jaýyn alatyn aıaqkıimder tigedi. Baǵasy da arzan.

Taǵdyrymen taıtalasyp, moıymaı alǵa umtylyp kele jatqan qajyrly jannyń keıbireýge bolymsyz tirshilik bolyp kórinetin osy sharýasy shyn máninde kópke úlgi. On eki múshesi saý adamdardyń arasynda eki qolǵa bir kúrek taba almaı júrgen nemese sharýanyń murtyn syndyrmaı, shalqaqtaǵysy keletinder de az emes qoı. Al bizdiń keıipkerimiz saǵyn syndyrǵysy kelgen taǵdyrdyń synaǵyna tótep berip, adal da abyroıly eńbegi arqyly otbasyn asy­rap otyr. Qalaı aıtsań da, qalaı maq­tasań da syıyp tur.

Aqmola oblysy,

Qorǵaljyn aýdany