Elimizdegi eleýli isterdiń biri – memlekettik qyzmetter kórsetýdi ońtaılandyrý, ony basqa baǵytqa sala otyryp, damytý. Búginde halyqaralyq tájirıbege súıene otyryp memlekettiń birqatar fýnksııalary jeke salalarǵa berilýde. Osyǵan oraı, quqyq qorǵaý salasynda da birqatar ózgerister oryn alyp jatqany belgili. Bul rette «ANTIKOR LIVE» jobasy aıasynda «Shyǵys – Adaldyq alańy» jobalyq keńsesiniń uıymdastyrýymen Shyǵys Qazaqstan oblysy Ádilet departamenti basshysynyń orynbasary Ermek Qorabaev qatysqan «Áleýmettik mańyzy bar máseleler: alımentter men eńbekaqyny óndirý» taqyrybynda tikeleı efır ótti.
«Alıment – «Neke jáne otbasy» Kodeksine sáıkes, bir adamnyń ony alýǵa quqyǵy bar basqa adamǵa usynylatyn mindetti aqshalaı nemese materıaldyq asyraý qarajaty. Bul – zań júzinde bekitilgen tólem. Ata-analar men balalardyń arasynda týyndaıtyn eń ótkir suraqtardyń biri – osy alıment tóleý. «Alıment» dep biz kóp jaǵdaıda tek ajyrasqan ákeniń óz balasyna tóleýge mindetti aqysyn aıtamyz. Alaıda – bul tólem tek ákege ǵana emes, sonymen qatar anaǵa da júkteletin mindet. Balany asyraý – ata-anasynyń zańmen bekitilgen mindeti. Al alıment óndirýge kelgende ata-anasynyń nekede bolýy, azamattyq nekede nemese ajyrasqan bolýy múlde mańyzdy emes», deıdi departament basshysynyń orynbasary.
Onyń aıtýynsha, qamqorlyqtaǵy nemese patronattyq tárbıedegi balalarmen qatar asyrap alynǵan balalar da alımentke quqyly. Ajyrasý barysynda erli-zaıyptylar balany asyraý máselesin ózderi kelisýi kerek. Alımentter sol kelisim boıynsha tólenedi. Eger ondaı kelisim bolmasa, onda Qylmystyq kodekstiń 139-babyna sáıkes kámeletke tolmaǵan balalarǵa alımentti ata-anasy sotpen tóletedi.
«Alımentter aı saıyn ata-anasynyń eńbekaqysynan nemese ózge tabysynan zańmen belgilengen mólsherde tólenýi tıis. Atap aıtqanda, 1 balaǵa – tabysynyń tórtten bir bóligi, 2 balaǵa – tabysynyń úshten bir bóligi, 3 jáne odan da kóp balalarǵa – tabysynyń teń jartysy tólenedi. Jumys istemeıtin boryshkerdiń tóleýge mindetti alıment mólsheri Qazaqstandaǵy orta jalaqy mólsherimen esepteledi», dedi E.Qorabaev. Sonymen qatar tikeleı efır barysynda departament basshysynyń orynbasary eńbekaqyny óndirý máselelerine toqtalyp, zańda kórsetilgen talaptardy atap ótti.
