– Maqsat – ishki ister organdarynyń esebine alynǵan kámeletke tolmaǵan balalar men oqý oryndarynyń stýdentteri arasynda profılaktıkalyq jumys júrgizý. Sondaı-aq zańǵa qaıshy áreketter jasaýǵa beıim jasóspirimderdi, kámeletke tolmaǵandar tobyn, balalardy quqyqbuzýshylyqtarǵa tartatyn eresek adamdardy anyqtaý. Polısııa qyzmetkerleri urlyq jasaǵany úshin bir jyl merzimge bas bostandyǵynan aıyrý týraly sot úkiminen jaltaryp, izdeýde júrgen 17 jastaǵy jasóspirimdi ustady. Úsh kúnde ata-analar tarapynan 147 ákimshilik quqyqbuzýshylyq jasalǵany belgili boldy. Olardyń 14-i ata-analyq mindetin oryndamasa, bireýi kámeletke tolmaǵandarǵa alkogoldik ishimdik satqan. Bir jasóspirim qoǵamdyq orynda masań kúıde júrgen. Túngi saǵat 23.00-den keıin kóshe kezgen 131 jasóspirim anyqtaldy, – dep málim etti oblystyq polısııa departamentiniń baspasóz hatshysy Gúlnazıra Muhtarova.
Sondaı-aq polıseıler esepte turǵan 92 jaısyz otbasy men 44 jasóspirimniń mekenjaıyn tekserdi. Endi bulardyń qataryna taǵy da bir jasóspirim men jaısyz alty otbasy qosylyp otyr.
Al oblys ákiminiń orynbasary Baqytgúl Hamenovanyń tóraǵalyǵymen ótken kámeletke tolmaǵandardyń isteri jáne olardyń quqyqtaryn qorǵaý jónindegi oblystyq komıssııanyń otyrysynda jaǵa ustatar derekter málim boldy. Máselen, Jylyoı aýdanynda polısııanyń esebinde kámeletke tolmaǵan toǵyz bala tur. Tipti bir otbasynyń eki balasy narkologııalyq esepke alynypty. Mundaı jaıt alańdatpaı qoımaıdy.
– Olardyń tórteýi – orta mekteptiń oqýshysy, al beseýi arnaıy jáne joǵary oqý oryndarynyń stýdenti. Orta mektepte oqıtyn tórt oqýshynyń úsheýi «kámeletke tolmaǵandar aǵzasynyń psıhıkalyq jáne fızıkalyq fýnksııalaryna teris áser etetin psıhotroptyq jáne ózge de kúshti áser etetin zattardy teris paıdalanatyn» sanatyna jatqyzyldy, – deıdi Jylyoı aýdany ákiminiń orynbasary Ánýar Shákirov.
Oblys ákiminiń orynbasary Baqytgúl Hamenovanyń aıtýynsha, osy jaıtqa oraı Jylyoı aýdanynyń basshylary tıisti sharalardy qabyldaýy qajet. О́ıtkeni kámeletke tolmaǵan balalardyń narkologııalyq esepke alynýy – alańdatarlyq jaıt. Al caspianlife.kz taratqan aqparatqa súıensek, aýdanda kámeletke tolmaǵan qyzdardyń arasyndaǵy júktilik azaıar emes. Máselen, byltyrǵy toǵyz aıda 27 derek tirkelipti. Bıyl osyndaı kórsetkish 31-ge jetip otyr.
– Biz ár balanyń bolashaǵy úshin jaýapty ekenimizdi umytpaǵanymyz jón. Barlyq jasóspirimniń, ásirese esepte turǵan balalardyń jaqsy tárbıe alýyna, qoǵamnan óz ornyn tabýyna yqpal etýimiz kerek. Osy salanyń jaýapty mamandary ár balaǵa tolyqqandy tulǵa retinde qaraýy tıis, – deıdi Baqytgúl Hamenova.
Oblystyq densaýlyq saqtaý basqarmasynyń basshysy Ashan Baıdýálıevtiń málimetine qaraǵanda, arnaıy ortalyqta psıhıatrııalyq esepte turǵandar úshin 145 tósektik oryn qarastyrylǵan eken. Al narkologııalyq patologııasy bar kámeletke tolmaǵandarǵa arnalǵan bes oryn jasaqtalypty. Qazir ýytqumarlyqqa táýeldi úsh jasóspirim tirkelgen. Endi jat qylyqqa áýes balalar narkologııalyq tekserýden ótedi.
Burynǵynyń kónekózderi «...balanyń kóńili – dalada» deýshi edi. Búgingi balanyń kóńili jat qylyq pen esirtkige aýyp bara jatqandaı. Ýaqytynyń kóbin smartfonǵa úńilýmen ótkizip, balasynyń kóshede ne istep júrgeninen beıhabar ata-ananyń kóńili she?..
Atyraý oblysy
