О́tken senbi kúni Iran bıligi el aımaǵyn birneshe bólikke bólip, olarǵa arnaıy tús berdi. Naýqas sany kóp eldi mekender «qyzyl aımaqqa» jatqyzylyp, birqatar shekteý qoıyldy. Ol jaqta meıramhana, dámhana, barlardyń jumysy toqtatylǵanymen, memlekettik qyzmetshilerdiń jartysy ǵana qashyqtan jumys isteýge kóshti. Degenmen jeke kompanııalar da qyzmetterin kórsetip jatyr. Sonymen birge keshki 9-dan tańǵy 4-ke deıin ǵana kósheden shyǵýǵa tyıym salynǵan. Bir aıta keterligi, eldegi 32 provınsııanyń 25-i «qyzyl aımaq» qatarynda. Qyzyl aımaqta burynnan tirkelmegen kólikter budan bulaı qajet provınsııalarǵa óte almaıdy.
Sarapshylar Iranda úshinshi tolqynnyń bastalǵanyn aıtady. Olardyń oıynsha, elde qatań karantın ornatylýy kerek. Keıingi kúnderde vırýstan kún saıyn 400-den astam adam qaıtys boldy. Demalysta 13 421 kisiniń vırýs juqtyrǵany málim boldy. Mamandar jaǵdaıdyń túzelýi úshin úkimet tanystyrǵan shekteýlerdiń jetkiliksiz ekenin aıtady. Densaýlyq saqtaý mınıstrligi de muny joqqa shyǵarmaıdy. Jaýapty qurylym ókili Sıma Sadat Ları naýqastar sanynyń artýy jaǵdaıdyń aýyr ekenin, bul toqtamasa Iran úshin qys aılary kúrdeli ári jaýapty mezgil bolatynyn habarlady. Úkimet vırýstyń tez taralýyna otbasylyq jıyndar sebep deıdi. Alaıda jyl basyndaǵydaı qatań karantın jarııalap, keseldi quryqtaýǵa asyǵar emes.
