Ekonomıka • 24 Qarasha, 2020

ShOB nesıelerine suranys artyp keledi

14 ret kórsetildi

QUB Qarjylyq turaqtylyq jáne zertteýler departamenti dırektorynyń orynbasary Oljas Kýbenbaev búgin onlaın konferensııa barysynda  ShOB ókilderi tarapynan suranys artyp kele jatqanyn aıtyp,  2020 jylǵy III toqsanǵa arnalǵan nesıe berý máseleleri boıynsha bankter arasynda júrgizilgen saýalnamanyń nátıjelerimen tanystyrdy, dep habarlaıdy Egemen.kz  Ulttyq banktiń baspasóz qyzmetine silteme jasap.

Oljas Kýbenbaev bıznes-suranystyń taza paıyzdyq ózgerisi (NPI) 2020 jyldyń úshinshi toqsanynda 34% quraǵanyn, karantındik sharalardyń álsireýi aıasynda ekonomıkanyń zardap shekken sektorlaryna jatatyn keıbir kásipkerler óz qyzmetin birtindep qalpyna keltirip, nesıe boıynsha tólemderdi qaıta bastaǵanyn da aıtyp ótti.  

Bankterdiń málimetteri boıynsha, nesıelendirýge suranystyń ósýi 2020 jyldyń úshinshi toqsanynda negizinen ShOB tarapynan keıinge qaldyrylǵan suranysqa, sondaı-aq memlekettik baǵdarlamalardy iske asyrýǵa baılanysty boldy. Shaǵyn jáne orta bıznestegi nesıege suranystyń SIP kórsetkishteri sáıkesinshe 41% jáne 38% qurady. Sonymen qatar, jekelegen bankterdiń ónim jelisiniń keńeıýi shaǵyn kásipkerlik sýbektilerinen kelip túsetin ótinishter sanynyń 10 esege ósýine ákeldi, al nesıeniń ortasha mólsheri tómendedi

«Iаǵnı suranystyń ósýi baıqaldy, biraq kólemde emes», - dep atap ótti Oljas Kýbenbaev.

Nesıeler boıynsha paıyzdyq mólsherlemeler jáne bankterdiń bızneske nesıe berýge daıyndyq deńgeıi sol deńgeıde qaldy. Birqatar bankter kepilge jáne qaryz alýshynyń qarjylyq jaǵdaıyna qoıylatyn talaptardy kóterdi. «Talaptardyń joǵarylaýyna sebep bolǵan negizgi faktor bankter ekonomıkanyń jekelegen salalarynda táýekelder profıliniń nasharlaýyn qarastyrady», - dep túsindirdi ol.

Respondentterdiń pikirinshe, kelesi toqsanda orta jáne iri bıznes sýbektileriniń nesıelendirýge suranysy ózgermeıdi dep kútilýde. Sonymen qatar, jekelegen bankterdiń jańa banktik ónimderdi shyǵarýy shaǵyn kásipkerlik sýbektileriniń suranysyna oń áser etýi múmkin.

«Jeke tulǵalarǵa nesıe berýge keletin bolsaq, 2020 jyldyń úshinshi toqsanynda bólshek nesıege suranys barlyq segmentterde de ósti. Kóptegen salalarda jumyspen qamtýdy qalpyna keltirý kezinde ıpotekalyq jáne tutynýshylyq nesıeler alýǵa ótinishter sany artty. Bankterdiń pikiri boıynsha ekinshi toqsanda ıpotekalyq nesıelendirýge suranys artty, buǵan jyljymaıtyn múlik naryǵynyń damý perspektıvalary jáne memlekettik baǵdarlamalar sheńberinde beriletin nesıelerdiń bolýy áser etti», - dedi Oljas Kýbenbaev.

О́tken toqsanmen salystyrǵanda ıpotekalyq nesıelendirýge kelip túsken ótinishter sany 85% ósti. Kepilsiz nesıelendirý segmentinde ótinimder sany 52% ósti. Jeńildetilgen avtonesıeler baǵdarlamasy boıynsha qarajatty ıgerý aıasynda avtonesıege suranystyń ósýi baıqaldy, ótinishterdiń sany 109% ósti, nesıelerdiń ortasha mólsheri azdap tómendedi.

«Joǵaryda atalǵan faktorlardan basqa bank ókilderi klıentterdiń nesıege degen qyzyǵýshylyǵynyń joǵarylaýyn karantındik sharalar kezeńinde keıinge qaldyrylǵan suranystyń oryndalýymen, sondaı-aq marketıngtik kampanııalarmen túsindiredi», - dedi ol. 2020 jyldyń 4-toqsanynda bankter bólshek nesıelendirýdiń barlyq segmentteri boıynsha suranystyń shamaly ósýin kútedi. Bankterdiń tutynýshylyq nesıe berýge daıyndyǵy da shamaly artady. Tutynýshylyq nesıeleý sharttary nesıelik lımıt jáne klıenttiń tólem qabilettiligine qoıylatyn talaptar turǵysynan jumsarady.

Saýalnamaǵa ekinshi deńgeıli 24 bank qatysty.

Sońǵy jańalyqtar

Elimizde taǵy 1050 adam indetten aıyqty

Koronavırýs • Búgin, 09:44

Semeıge Saqtaǵanov ákim boldy

Taǵaıyndaý • Keshe

Birneshe oblysta jol jabyldy

Qazaqstan • Keshe

Uqsas jańalyqtar